Hum se Muhammad bin Abdullah bin Haushab ne byaan kiya ‘ kaha ke hum se Abdul Wahhab ne byaan kiya . Kaha hum se Khalid Hazza ne ‘ un se Ikrima ne ‘ un se Ibn Abbas razi Allahu anhuma ne ke Nabi Karim salla Allahu alaihi wasallam ne farmaya ke Allah Ta'ala ne Makkah ko haram kiya hai . Na mujh se pehle kisi ke liye (yahan qatl o khoon) halal tha aur na mere baad ho ga aur mere liye bhi thori der ke liye (Fatah Makkah ke din) halal hua tha . Pas na is ki ghaas ukhaari jaye na is ke darakht qalam kiye jayein . Na yahan ke jaanwaroon ko (shikaar ke liye) bhagaya jaye aur siwa is shakhs ke jo elaan karna chahta ho (ke yeh giri hui cheez kis ki hai) kisi ke liye wahan se koi giri hui cheez uthani jaiz nahin . Is par Abbas razi Allahu anhu ne kaha ”lekin is se Idhkhir ka istishna kar dijiye ke yeh hamare sunaroon ke aur hamari qabroon mein kaam aati hai .“ Aap salla Allahu alaihi wasallam ne farmaya ke magar Idhkhir ki ijazat hai . Abu Hurairah razi Allahu anhu ki Nabi Karim salla Allahu alaihi wasallam se riwayat mein hai . ”Hamari qabroon aur gharon ke liye .“ Aur Aban bin Salih ne byaan kiya ‘ un se Hasan bin Muslim ne ‘ un se Safiya bint Shaybah ne ke unhon ne Nabi Karim salla Allahu alaihi wasallam se isi tarah suna tha . Aur Mujahid ne Tawoos ke wasta se byaan kiya aur un se Ibn Abbas razi Allahu anhuma ne yeh alfaz byaan kiye . Hamare Qayn (loharoon) aur gharon ke liye (Idhkhir ukharna haram se) jaiz kar dijiye .

Hum se Abdullah bin Yousuf ne bayan kiya, un se Laith ne, un se Sa’eed bin Abi Sa’eed ne, woh Abu Shuraih se riwayat karte hain ke unhon ne ’Amr bin Sa’eed (waali-e-Madinah) se jab woh Makkah mein (Ibn-e-Zubair se ladne ke liye) faujein bhej rahe the kaha ke aye ameer! Mujhe aap ijazat den to main woh Hadees aap se bayan kar dun, jo Rasoolullah Sallallahu Alaihi Wasallam ne Fatah-e-Makkah ke doosre din irshaad farmaayi thi, us (Hadees) ko mere dono kaanon ne suna aur mere dil ne use yaad rakha hai aur jab Rasoolullah Sallallahu Alaihi Wasallam yeh Hadees farmaa rahe the to meri aankhein Aap Sallallahu Alaihi Wasallam ko dekh rahi thein. Aap Sallallahu Alaihi Wasallam ne (pehle) Allah ki Hamd-o-Sana bayan ki, phir farmaaya ke Makkah ko Allah ne haraam kiya hai, aadmiyon ne haraam nahi kiya. To (sun lo) ke kisi shakhs ke liye jo Allah par aur yaum-e-aakhirat par imaan rakhta ho jaaiz nahi hai ke Makkah main khoonrezi kare, ya us ka koi ped kaate, phir agar koi Allah ke Rasool (ke ladne) ki wajah se us ka jawaaz nikaale to us se keh do Allah ne apne Rasool Sallallahu Alaihi Wasallam ke liye ijazat di thi, tumhaare liye nahi di aur mujhe bhi din ke kuch lamhon ke liye ijazat mili thi. Aaj is ki hurmat laut aayi, jaisi kal thi. Aur haazir ghaaib ko (yeh baat) pahuncha de. (Yeh Hadees sunne ke baad rawi-e-Hadees) Abu Shuraih se poocha gaya ke (aap ki yeh baat sun kar) ’Amr ne kya jawaab diya? Kaha yun ke aye (Abu Shuraih!) Hadees ko main tum se ziyada jaanta hun. Magar haram (Makkah) kisi khatakaar ko ya khoon kar ke aur fitnah phaila kar bhaag aane waale ko panaah nahi deta.

Hum se Abu Nu’aim Al-Fazl bin Dukain ne bayan kiya, un se Shaibaan ne Yahya ke waaste se naql kiya, woh Abu Salamah se, woh Abu Hurairah Radhiallahu Anhu se riwayat karte hain ke qabeela-e-Khuza’ah (ke kisi shakhs) ne banu Laith ke kisi aadmi ko apne kisi maqtool ke badle mein maar diya tha, yeh Fatah-e-Makkah waale saal ki baat hai, Rasoolullah Sallallahu Alaihi Wasallam ko yeh khabar di gayi, Aap ne apni oontni par sawaar ho kar khutbah padha aur farmaaya ke Allah ne Makkah se qatl ya haathi ko rok liya. Imam Bukhari Rahimahullah farmaate hain is lafz ko shak ke saath samjho, aisa hi Abu Nu’aim waghera ne «الْقَتْلَ» aur «الْفِيلَ» kaha hai. Un ke alawah doosre log «الْفِيلَ» kehte hain. (Phir Rasoolullah Sallallahu Alaihi Wasallam ne farmaaya) ke Allah ne un par apne Rasool aur musalmaanon ko ghaalib kar diya aur samajh lo ke woh (Makkah) kisi ke liye halaal nahi huwa. Na mujh se pehle aur na (aaindah) kabhi hoga aur mere liye bhi sirf din ke thode se hisse ke liye halaal kar diya gaya tha. Sun lo ke woh is waqt haraam hai. Na us ka koi kaanta toda jaaye, na us ke darakht kaate jaayen aur us ki giri-padi cheezein bhi wahi uthaaye jis ka mansha yeh ho ke woh us cheez ka taaruf kara dega. To agar koi shakhs maara jaaye to (us ke azeezon ko) ikhtiyaar hai do baaton ka, ya diyat len ya badla. Itne mein ek Yamani aadmi (Abu Shah naami) aaya aur kehne laga (yeh masaail) mere liye likhwa dijiye. Tab Aap Sallallahu Alaihi Wasallam ne farmaaya ke Abu Fulan ke liye (yeh masaail) likh do. To ek Quraishi shakhs ne kaha ke ya RasoolAllah! Magar Izkhir (yani Izkhir kaatne ki ijazat de dijiye) kiunki use hum gharon ki chaton par daalte hain. (Ya mitti mila kar) aur apni qabron mein bhi daalte hain (yeh sun kar) Rasoolullah Sallallahu Alaihi Wasallam ne farmaaya ke (haan) magar Izkhir, magar Izkhir.

Hum se Ali bin Abdullah bin Jafar ne byaan kiya , kaha ke hum se Jarir bin Abdul Hameed ne Mansoor se byaan kiya un se Mujahid ne , un se Ta'oos ne aur un se Ibn Abbas razi Allahu anhuma ne byaan kiya ke Rasool Allah salla Allahu alaihi wasallam ne fatah Makka par farmaya tha ke Allah Ta'ala ne is shehar (Makka) ko hurmat wala banaya hai (yani izzat di hai) pas is ke (darakhtoon ke) kaante tak bhi nahi kaate ja sakte yahan ke shikar bhi nahi hankaye ja sakte . Aur in ke alawa jo elaan kar ke (maalik tak puhanchane ka irada rakhte hon) koi shakhs yahan ki giri pari cheez bhi nahi utha sakta hai .

Hum se Qutaiba Bin Saeed ne bayan kiya, kaha hum se Laith Bin Saad ne bayan kiya, un se Saeed Bin Abi Saeed Maqbari ne, un se Abu Shuraih Adawi (Radi Allahu Anhu) ne ke jab Amr Bin Saeed Makkah par lashkar kashi kar raha tha to unhon ne kaha ameer ijazat de to mein ek aisi hadees sunaoon jo Rasul Allah (Sallallahu Alaihi Wasallam) ne Fatah-e-Makkah ke doosre din irshad farmayi thi, is hadees-e-mubarak ko mere in kanon ne suna, aur mere dil ne poori tarah usay yaad kar liya tha aur jab aap irshad farma rahe thay to meri aankhein aap ko dekh rahi theen. Aap (Sallallahu Alaihi Wasallam) ne Allah ki hamd aur is ki sana bayan ki, phir farmaya ke Makkah ki hurmat Allah ne qayam ki hai logon ne nahi! is liye kisi aise shakhs ke liye jo Allah aur Yaum-e-Akhirat par iman rakhta ho ye jaiz aur halal nahi ke yahan khoon bahaye aur koi yahan ka ek darakht bhi na kaate lekin agar koi shakhs Rasul Allah (Sallallahu Alaihi Wasallam) ke qital (Fatah-e-Makkah ke mauqe par) se is ka jawaz nikale to us se ye keh do ke Rasul Allah (Sallallahu Alaihi Wasallam) ko Allah ne ijazat di thi, lekin tumhein ijazat nahi hai aur mujhe bhi thori si dair ke liye ijazat mili thi phir dobara aaj is ki hurmat aisi hi qayam ho gayi jaise pehle thi aur han jo maujood hain wo ghaib ko (Allah ka ye paigham) pohancha dein, Abu Shuraih se kisi ne poocha ke phir Amr Bin Saeed ne (ye hadees sun kar) aap ko kya jawab diya tha ? Unhon ne bataya ke Amr ne kaha Abu Shuraih! mein ye hadees tum se bhi zyada janta hoon magar Haram kisi mujrim ko panah nahi deta aur na khoon kar ke aur na kisi jurm kar ke bhagne wale ko panah deta hai. «kharba» se murad «kharba baliya» hai
.

Hum se Muhammad Bin Muthanna ne bayan kiya, kaha hum se Abdul Wahhab ne bayan kiya, kaha hum se Khalid ne bayan kiya, un se Ikrima ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya Allah Ta'ala ne Makkah ko hurmat wala banaya hai mujh se pehle bhi ye kisi ke liye halal nahi tha is liye mere baad bhi wo kisi ke liye halal nahi ho ga. Mere liye sirf ek din ghari bhar halal hua tha is liye is ki ghaas na ukhari jaye aur is ke darakht na kaate jayein, is ke shikar na bharkaye jayein aur na wahan ki giri hui cheez uthayi jaye. Han ailan karne wala utha sakta hai. (Taake asal malik tak pohancha de) Abbas (Radi Allahu Anhu) ne kaha ke ya Rasul Allah! idhkhir ki ijazat dijiye kyunke ye hamare sunaron aur hamari qabron ke liye kaam aati hai. Aap (Sallallahu Alaihi Wasallam) ne farmaya ke idhkhir ki ijazat hai. Khalid ne riwayat kiya ke Ikrima (Rahimahullah) ne farmaya ke tum jante ho ke shikar ko na bharkane se kya murad hai ? Is ka matlab ye hai ke (agar kahin koi janwar saye mein betha hua hai to) usay saye se bhaga kar khud wahan qayam na kare
.

Hum se Usman Bin Abi Shaiba ne bayan kiya, kaha hum se Jareer ne bayan kiya, un se Mansoor ne, un se Mujahid ne, un se Taous ne aur un se Ibn Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne Fatah-e-Makkah ke din farmaya ab hijrat farz nahi rahi lekin (acchi) niyat aur jihad ab bhi baqi hai is liye jab tumhein jihad ke liye bulaya jaye to tayyar ho jana. Is shehar (Makkah) ko Allah Ta'ala ne isi din hurmat ata ki thi jis din us ne aasman aur zameen paida kiye, is liye ye Allah ki muqarrar ki hui hurmat ki wajah se muhtaram hai yahan kisi के liye bhi mujh se pehle larayi jaiz nahi thi aur mujhe bhi sirf ek din ghari bhar ke liye (Fatah-e-Makkah ke din ijazat mili thi) ab hamesha ye shehar Allah ki qayam ki hui hurmat ki wajah se qayamat tak ke liye hurmat wala hai pas is ka kanta kaata jaye na is ke shikar hanke jayein aur is shakhs ke siwa jo ailan karne ka irada rakhta ho koi yahan ki giri hui cheez na uthaye aur na yahan ki ghaas ukhari jaye. Abbas (Radi Allahu Anhu) ne kaha ya Rasul Allah! idhkhir (ek ghaas) ki ijazat to dijiye kyunke yahan ye kaari garon aur gharon ke liye zaroori hai to aap ne farmaya ke idhkhir ki ijazat hai
.

Hum se Ishaq Bin Shaheen ne bayan kiya, kaha ke hum se Khalid Bin Abdullah ne bayan kiya, un se Khalid ne, un se Ikrima ne aur un se Ibn Abbas (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, Allah Ta'ala ne Makkah ko hurmat wala shehar qarar diya hai. Ye na mujh se pehle kisi ke liye halal tha aur na mere baad kisi ke liye halal ho ga. Mere liye bhi ek din chand lamhat ke liye halal hua tha. So ab is ki na ghaas kaati jaye, na is ke darakht kaate jayein, na is ke shikar bhagaye jayein, aur na is mein koi giri hui cheez utthayi jaye. Sirf «mu'arrif» (yaani gumshuda cheez ko asal malik tak ailan ke zariya pohanchane wale) ko is ki ijazat hai. Abbas Bin Abdul Muttalib (Radi Allahu Anhu) ne arz kiya ke idhkhir ke liye ijazat de dijiye, ke ye hamare sunaron aur hamare gharon ki chhaton ke kaam mein aati hai. To Aap (Sallallahu Alaihi Wasallam) ne idhkhir ki ijazat de di. Ikrima ne kaha, ye bhi maloom hai ke haram ke shikar ko bhagane ka matlab kya hai ? Is ka matlab ye hai ke (kisi darakht ke saye tale agar wo baitha hua ho to) tum saye se usay hata kar khud wahan baith jao. Abdul Wahhab ne Khalid se (apni riwayat mein ye alfaz) bayan kiye ke (idhkhir) hamare sunaron aur hamari qabron ke kaam mein aati hai
.

Aur Ahmad Bin Saad ne kaha, un se Rauh ne bayan kiya, un se Zakariya ne bayan kiya, un se Amr Bin Dinar ne bayan kiya, un se Ikrimah ne aur un se Ibn Abbas (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, Makkah ke darakht na kaate jayein, wahan ke shikar na chhairhe jayein, aur wahan ke luqtah ko sirf wahi uthaye jo elan kare, aur is ki ghas na kaati jaye. Abbas (Radi Allahu Anhu) ne kaha ke Ya Rasul Allah! idhkhir ki ijazat day dijiyi-ay chunanche Aap (Sallallahu Alaihi Wasallam) ne idhkhir ki ijazat day di
.

Hum se Yahya Bin Musa ne bayan kiya, un se Waleed Bin Muslim ne bayan kiya, un se Imam Awzai ne bayan kiya, kaha ke mujh se Yahya Bin Abi Kaseer ne bayan kiya, kaha ke mujh se Abu Salama Bin Abdur Rahman ne bayan kiya, kaha ke mujh se Abu Hurairah (Radi Allahu Anhu) ne bayan kiya, unhon ne kaha ke jab Allah Ta'ala ne Rasul Allah (Sallallahu Alaihi Wasallam) ko Makkah fatah kara diya to Aap (Sallallahu Alaihi Wasallam) logon ke samne khare hue aur Allah Ta'ala ki hamd-o-sana ke baad farmaya Allah Ta'ala ne hathiyon ke lashkar ko Makkah se rok diya tha, lekin apne Rasul aur Musalmanon ko ise fatah kara diya. Dekho! ye Makkah mujh se pehle kisi ke liye halal nahi hua tha (yani wahan larna) aur mere liye sirf din ke thore se hisse mein durust hua. Ab mere baad kisi ke liye durust nahi ho ga. Pas is ke shikar na chhairhe jayein aur na is ke kaante kaate jayein. Yahan ki giri hui cheez sirf usi ke liye halal ho gi jo is ka elan kare. Jis ka koi aadmi qatal kiya gaya ho ise do baaton ka ikhtiyar hai ya (qatil se) fidiya (maal) lay lay, ya jaan ke badle jaan lay. Abbas (Radi Allahu Anhu) ne kaha: Ya Rasul Allah! idhkhir kaatne ki ijazat ho, kyunke hum ise apni qabron aur gharon mein istemal karte hain. To Aap (Sallallahu Alaihi Wasallam) ne farmaya ke accha idhkhir kaatne ki ijazat hai. Phir Abu Shah Yemen ke ek Sahabi ne khare ho kar kaha, Ya Rasul Allah! mere liye ye khutba likhwa dijiyi-ay, chunanche Rasul Allah (Sallallahu Alaihi Wasallam) ne Sahaba ko hukum farmaya ke Abu Shah ke liye ye khutba likh do. Mein ne Imam Awzai se poocha ke is se kya murad hai ke ”mere liye ise likhwa dijiyi-ay“ to unhon ne kaha ke wahi khutba murad hai jo unhon ne Rasul Allah (Sallallahu Alaihi Wasallam) se (Makkah mein) suna tha
.

Hum se Ali Bin Abdullah ne bayan kiya ' kaha hum se Yahya Bin Saeed Qattan ne bayan kiya ' kaha hum se Sufyan Sawri ne bayan kiya ' kaha ke mujh se Mansoor Bin Mutamir ne bayan kiya Mujahid se ' unhon ne Taoos se aur un se Ibn Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne farmaya "Fatah Makkah ke baad ab hijrat (farz) nahi rahi albatta jehad aur niyat-e-bakhair karna ab bhi baqi hain aur jab tumhein jehad ke liye bulaya jaye to nikal kharay hua karo."
.

Hum se Amr Bin Ali Fallas ne bayan kiya, hum se Yahya Qattan ne bayan kiya, kaha hum se Sufyan Sauri ne bayan kiya, kaha ke mujh se Mansur ne bayan kiya Mujahid se, unhon ne Taous se aur unhon ne Ibn Abbas (Radi Allahu Anhuma) se ke Nabi Kareem (Sallallahu Alaihi Wasallam) ne fatah Makkah ke din farmaya tha Makkah fatah hone ke baad (ab Makkah se Madinah ke liye) hijrat baqi nahi hai, lekin khuloos-e-niyat ke sath jihad ab bhi baqi hai is liye tumhein jihad ke liye bulaya jaye to nikal khare ho
.

Hum se Adam Bin Abi Iyas ne bayan kiya, kaha hum se Shaiban ne bayan kiya, un se Mujahid ne, un se Taoos ne aur un se Abdullah Bin Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne fatah-e-Makkah ke din farmaya "Ab hijrat (Makkah se Madinah ke liye) baqi nahi rahi, albatta husn-e-niyat aur Jihad baqi hai. Is liye jab tumhein Jihad ke liye bulaya jaye to fauran nikal jao."
.

Hum se Ali Bin Abdullah ne bayan kiya, kaha hum se Jareer ne bayan kiya, un se Mansoor ne, un se Mujahid ne, un se Taoos ne aur un se Abdullah Bin Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne fatah-e-Makkah ke din farmaya tha, ab (Makkah se) hijrat farz nahi rahi. Albatta Jihad ki niyat aur Jihad ka hukm baqi hai. Is liye jab tumhein Jihad ke liye nikala jaye to fauran nikal jao aur Aap (Sallallahu Alaihi Wasallam) ne fatah-e-Makkah ke din ye bhi farmaya tha ke jis din Allah Ta'ala ne aasman aur zameen paida kiye, isi din is shehar (Makkah) ko haram qarar de diya. Pas ye shehar Allah ki hurmat ke sath Qiyamat tak ke liye haram hi rahega, aur mujh se pehle yahan kisi ke liye ladna jayiz nahi hua. Aur mere liye bhi din ki sirf ek ghadi ke liye jayiz kiya gaya. Pas ab ye mubarak shehar Allah Ta'ala ki hurmat ke sath Qiyamat tak ke liye haram hai, is ki hudood mein na (kisi darakht ka) kanta toda jaye, na yahan ke shikar ko sataya jaye, aur koi yahan ki giri hui cheez na uthaye siwa is shakhs ke jo (malik tak cheez ko pahunchane ke liye) elan kare aur na yahan ki hari ghaas kaati jaye. Is par Abbas (Radi Allahu Anhu) ne kaha, Ya Rasul Allah! Izkhar ki ijazat de dijiye. Kyunke ye yahan ke sunaron aur gharon ki chhaton par dalne ke kaam aati hai. To Aap (Sallallahu Alaihi Wasallam) ne farmaya ke accha Izkhar ki ijazat hai
.

Hum se Ubayd bin Ismail ne byaan kiya ‘ kaha hum se Abu Usamah ne byaan kiya ‘ un se Hisham bin Urwah ne ‘ un se un ke walid ne byaan kiya ke jab Rasool Allah salla Allahu alaihi wasallam Fatah Makkah ke liye rawana huay to Quraysh ko is ki khabar mil gayi thi . , Chunanche Abu Sufyan bin Harb ‘ Hakeem bin Hizam aur Budayl bin Warqa Nabi Karim salla Allahu alaihi wasallam ke baare mein maloomat ke liye Makkah se niklay . Yeh log chalte chalte maqam Marr al-Zhahran par jab pahunche to unhein jagah jagah aag jalti hui dikhayi di . Aisa maloom hota tha ke maqam Arafat ki aag hai . Abu Sufyan ne kaha yeh aag kaisi hai ? Yeh Arafat ki aag ki tarah dikhayi deti hai . Is par Budayl bin Warqa ne kaha ke yeh Bani Amr (yani Quba ke qabile) ki aag hai . Abu Sufyan ne kaha ke Bani Amr ki tadaad is se bahut kam hai . Itne mein Nabi Karim salla Allahu alaihi wasallam ke muhafiz daste ne unhein dekh liya aur un ko pakar kar Nabi Karim salla Allahu alaihi wasallam ki khidmat mein laye ‘ phir Abu Sufyan razi Allahu anhu ne Islam qabool kiya . Is ke baad jab Nabi Karim salla Allahu alaihi wasallam aage (Makkah ki taraf) barhay to Abbas razi Allahu anhu se farmaya ke Abu Sufyan ko aisi jagah par roke rakho jahan ghoron ka jate waqt hujoom ho taake woh Musalmanon ki fauji quwwat ko dekh lein . Chunanche Abbas razi Allahu anhu unhein aise hi maqam par rok kar kharay ho gaye aur Nabi Karim salla Allahu alaihi wasallam ke saath qabail ke daste ek ek kar ke Abu Sufyan ke samne se guzarne lage . Ek dasta guzra to unhon ne poocha: Abbas! Yeh kaun hain ? Unhon ne bataya ke yeh qabila Ghifar hai . Abu Sufyan ne kaha ke mujhe Ghifar se kya sarokar ‘ phir qabila Juhaynah guzra to un ke mutalliq bhi unhon ne yahi kaha ‘ qabila Sulaym guzra to un ke mutalliq bhi yahi kaha . Aakhir ek dasta samne aaya . Is jaisa fauji dasta nahi dekha gaya ho ga . Abu Sufyan razi Allahu anhu ne poocha yeh kaun log hain ? Abbas razi Allahu anhu ne kaha ke yeh Ansar ka dasta hai . Saad bin Ubadah razi Allahu anhu is ke ameer hain aur unhi ke hath mein (Ansar ka alam hai) Saad bin Ubadah razi Allahu anhu ne kaha: Abu Sufyan! Aaj ka din qatl e aam ka din hai . Aaj Kaaba mein bhi larna durust kar diya gaya hai . Abu Sufyan razi Allahu anhu is par bolay: Ae Abbas! (Quraysh ki halakat o barbadi ka din achha aa laga hai . Phir ek aur dasta aaya yeh sab se chota dasta tha . Is mein Rasool Allah salla Allahu alaihi wasallam aur Aap ke sahabah razi Allahu anhum thay . Nabi Karim salla Allahu alaihi wasallam ka alam Zubayr bin al-Awwam razi Allahu anhu uthaye huay thay . Jab Nabi Karim salla Allahu alaihi wasallam Abu Sufyan ke qareeb se guzray to unhon ne kaha Aap ko maloom nahi ‘ Saad bin Ubadah razi Allahu anhu kya keh gaye hain . Aap salla Allahu alaihi wasallam ne daryaft farmaya ke unhon ne kya kaha hai ? To Abu Sufyan ne bataya ke yeh yeh keh gaye hain ke Aap Quraysh ka kaam tamam kar dein ge . (sab ko qatl kar dalein ge) . Aap salla Allahu alaihi wasallam ne farmaya ke Saad ne ghalat kaha hai balkay aaj ka din woh hai jis mein Allah Kaaba ki azmat aur zyada kar de ga . Aaj Kaaba ko ghilaf pehnaya jaye ga . Urwah ne byaan kiya phir Aap salla Allahu alaihi wasallam ne hukm diya ke Aap ka alam maqam Juhun mein gaarr diya jaye . Urwah ne byaan kiya aur mujhe Nafi bin Jubayr bin Mut'im ne khabar di ‘ kaha ke main ne Abbas razi Allahu anhu se suna ‘ unhon ne Zubayr bin Awwam razi Allahu anhu se kaha (Fatah Makkah ke baad) ke Nabi Karim salla Allahu alaihi wasallam ne un ko yahin jhanda gaarne ke liye hukm farmaya tha . Rawi ne byaan kiya ke is din Nabi Karim salla Allahu alaihi wasallam ne Khalid bin Waleed razi Allahu anhu ko hukm diya tha ke Makkah ke balayi ilaqa Kada ki taraf se dakhil hon aur khud Nabi Karim salla Allahu alaihi wasallam Kada (nishibi ilaqa) ki taraf se dakhil huay . Is din Khalid razi Allahu anhu ke daste ke do sahabi ‘ Hubaysh bin Ash'ar aur Kurz bin Jabir Fihri shaheed huay thay .

Hum se Saeed bin Sharahbeel ne byaan kiya ‘ kaha hum se Layth bin Saad ne byaan kiya ‘ un se Maqbari ne ke Abu Shurayh Adawi razi Allahu anhu ne (Madinah ke ameer) Amr bin Saeed se kaha jabke Amr bin Saeed (Abdullah bin Zubayr razi Allahu anhuma ke khilaf) Makkah ki taraf lashkar bhej rahe thay ke ae ameer! Mujhe ijazat dijiye ke main Aap se ek hadees byaan karoon jo Rasool Allah salla Allahu alaihi wasallam ne Fatah Makkah ke doosre din irshad farmayi thi . Is hadees ko Nabi Karim salla Allahu alaihi wasallam irshad farma rahe thay to main apni aankhon se Aap ko dekh raha tha . Nabi Karim salla Allahu alaihi wasallam ne pehle Allah ki hamd o sana byaan ki aur phir farmaya ‘ bilashubba Makkah ko Allah Ta'ala ne hurmat wala shehar qarar diya hai kisi insan ne usay apni taraf se hurmat wala qarar nahi diya . Is liye kisi shakhs ke liye bhi jo Allah aur yaum e aakhirat par iman rakhta ho ‘ jaiz nahi ke is mein kisi ka khoon bahaye aur koi is sar zameen ka koi darakht kaate aur agar koi shakhs Rasool Allah salla Allahu alaihi wasallam ke (Fatah Makkah ke mauqa par) jang se apne liye bhi rukhsat nikale to tum us se keh dena ke Allah Ta'ala ne sirf apne Rasool ko (thori der ke liye) is ki ijazat di thi . Hamare liye bilkul ijazat nahi hai aur mujhe bhi is ki ijazat din ke thore se hisse ke liye mili thi aur aaj phir is ki hurmat isi tarah laut aayi hai jis tarah kal yeh shehar hurmat wala tha . Pas jo log yahan maujood hain woh (in ko mera kalam) pahuncha dein jo maujood nahi . Abu Shurayh se poocha gaya ke Amr bin Saeed ne Aap ko phir jawab kya diya tha ? To unhon ne bataya ke us ne kaha ke main yeh masail tum se zyada jaanta hoon ‘ Haram kisi gunahgar ko panah nahi deta ‘ na kisi ka khoon kar ke bhagne wale ko panah deta hai ‘ mufsid ko bhi panah nahi deta .

Hum se Ishaq bin Mansoor ne byaan kiya , kaha hum se Abu Aasim Nabeel ne byaan kiya , un se Ibn Jurayj ne byaan kiya , kaha mujh ko Hasan bin Muslim ne khabar di aur unhein Mujahid ne ke Rasool Allah salla Allahu alaihi wasallam Fatah Makkah ke din khutba sunane kharay huay aur farmaya ”Jis din Allah Ta'ala ne aasman o zameen ko paida kiya tha , isi din us ne Makkah ko hurmat wala shehar qarar de diya tha . Pas yeh shehar Allah ke hukm ke mutabiq qayamat tak ke liye hurmat wala rahe ga . Jo mujh se pehle kabhi kisi ke liye halal nahi hua aur na mere baad kisi ke liye halal ho ga aur mere liye bhi sirf ek ghari ke liye halal hua tha . Yahan hudood e Haram mein shikar ke qabil janwar na chheray jayein . Yahan ke kante dar darakht na kaate jayein na yahan ki ghaas ukhaari jaye aur yahan par giri pari cheez is shakhs ke siwa jo aalan karne ka irada rakhta ho aur kisi ke liye uthani jaiz nahi .“ Is par Abbas bin Abdul Muttalib razi Allah ne kaha: ya Rasool Allah! Idhkhir (ghaas) ki ijazat de dijiye kyunke sunaron ke liye aur makanat (ki tameer waghaira) ke liye yeh zaroori hai . Aap salla Allahu alaihi wasallam khamosh ho gaye phir farmaya ”Idhkhir is hukm se alag hai is ka (kaatna) halal hai .“ Doosri riwayat Ibn Jurayj se (isi sanad se) aisi hi hai unhon ne Abdul Kareem bin Malik se , unhon ne Ibn Abbas se aur Abu Hurairah razi Allahu anhu ne bhi Nabi Karim salla Allahu alaihi wasallam se aise hi riwayat ki hai .

Hum se Abu Nuaym ne bayan kiya, kaha hum se Shayban Nahwi ne, in se Yahya ne, in se Abu Salamah ne aur in se Abu Hurairah razi Allahu anhu ne ke qabila Khuza-a ke logon ne ek aadmi ko qatl kar diya thu. Aur Abdullah bin Rajaa ne kaha, in se Harb bin Shaddad ne, in se Yahya bin Abi Kaseer ne, in se Abu Salamah bin Abd-ur-Rahman ne bayan kiya aur in se Abu Hurairah razi Allahu anhu ne bayan kiya ke fatah Makkah ke mauqa par qabila Khuza-a ne Bani Layth ke ek shakhs (Ibn Asua) ko apne jahiliyat ke maqtul ke badle mein qatl kar diya thu. Is par Rasool Allah salla Allahu alaihi wasallam khare huay aur farmaya ”Allah Ta'ala ne Makkah Mukarramah se hathiyon ke (Shah e Yaman Abraha ke) lashkar ko rok diya thu lekin us ne apne Rasool aur mominon ko is par ghalba diya. Haan yeh mujh se pehle kisi ke liye halal nahi hua thu aur na mere baad kisi ke liye halal ho ga aur mere liye bhi din ko sirf ek sa'at ke liye. Ab is waqt se is ki hurmat phir qaim ho gayi. (Sun lo) is ka kaanta na ukhara jaye, is ka darakht na tarasha jaye aur siwa is ke jo elaan karne ka irada rakkhta hai koi bhi yahan ki giri hui cheez na uthaye aur dekho jis ka koi azeez qatl kar diya jaye to usay do baaton mein ikhtiyar hai ya usay is ka khoon baha diya jaye ya qisas diya jaye.“ Yeh waz sun kar is par ek Yamani sahab Abu Shah naami khare huay aur kaha: ya Rasool Allah! Is waz ko mere liye likhwa dijiye. Nabi Karim salla Allahu alaihi wasallam ne farmaya yeh waz Abu Shah ke liye likh do. Is ke baad Quraish ke ek sahab Abbas razi Allahu anhu khare huay aur kaha: ya Rasool Allah izkhir ghaas ki ijazat farma dijiye kyunke hum usay apne gharon mein aur apni qabron mein bichhate hain. Chunanche Nabi Karim salla Allahu alaihi wasallam ne izkhir ghaas ukharne ki ijazat de di. Aur is riwayat ki mutabia-t Ubaidullah ne Shayban ke wasta se hathiyon ke waqia ke zikr ke silsila mein ki. Baaz ne Abu Nuaym ke hawala se «al-qatlu» ka lafz riwayat ka hai aur Ubaidullah ne bayan kiya ke ya maqtul ke ghar walon ko qisas diya jaye.

Hum se Qutaibah bin Sa’eed ne bayan kiya, kaha hum se Ismail bin Ja’far ne bayan kiya, unhon ne Hameed se, unhon ne Anas Radhiallahu Anhu se, kaha mujh ko Ubadah bin Saamit ne khabar di ke Nabi Kareem Sallallahu Alaihi Wasallam apne hujre se nikle, logon ko shab-e-Qadr bataana chaahte the (woh kaun si raat hai) itne mein do musalmaan aapas mein lad pade, Aap Sallallahu Alaihi Wasallam ne farmaaya, main to is liye bahar nikla tha ke tum ko shab-e-Qadr batlaaun aur falaan falaan aadmi lad pade to woh mere dil se utha li gayi aur shayad isi mein kuch tumhaari behtari ho. (To ab aisa karo ke) shab-e-Qadr ko Ramadhan ki sattayeeswien, unteeswien aur pachcheeswien raat mein dhoonda karo.