Aur Layth bin Saad ne byaan kiya ‘ kaha ke mujh se Yunus ne byaan kiya ‘ un se Ibn Shihab ne ‘ kaha mujh ko Abdullah bin Salabi bin Suayr razi Allahu anhu ne khabar di ke Nabi Karim salla Allahu alaihi wasallam Fatah Makkah ke din un ke chehre par (shafqat ki raah se) hath phera tha .

Mujh se Ibrahim bin Musa ne byaan kiya ‘ kaha hum ko Hisham bin Yusuf ne khabar di ‘ unhein Mamar ne aur unhein Zuhri ne ‘ unhein Sufyan ne ‘ unhein Abu Jumaylah ne ‘ Zuhri ne byaan kiya ke jab hum se Abu Jumaylah razi Allahu anhu ne hadees byaan ki to hum Saeed bin Musayyab ke saath thay byaan kiya ke Abu Jumaylah razi Allahu anhu ne kaha ke unhon ne Nabi Karim salla Allahu alaihi wasallam ki sohbat payi aur woh Aap ke saath Ghazwa Fatah Makkah ke liye niklay thay .

Hum se Sulayman bin Harb ne byaan kiya ‘ kaha hum se Hammad bin Zayd ne byaan kiya ‘ un se Ayub Sakhtiyani ne aur un se Abu Qulabah ne aur un se Amr bin Salmah razi Allahu anhu ne ‘ Ayub ne kaha ke mujh se Abu Qulabah ne kaha ‘ Amr bin Salmah razi Allahu anhu ki khidmat mein hazir ho kar yeh qissa kyun nahi poochte ? Abu Qulabah ne kaha ke phir main un ki khidmat mein gaya aur un se sawal kiya ‘ unhon ne kaha ke jahiliyat mein hamara qiyam ek chashma par tha jahan aam rasta tha . Sawar hamare qareeb se guzarte to hum un se poochte ‘ logon ka kya khayal hai ‘ is shakhs ka kya muamla hai ? (yeh isharah Nabi Karim salla Allahu alaihi wasallam ki taraf hota tha) Log batate ke woh kehte hain ke Allah ne unhein apna Rasool bana kar bheja hai aur Allah un par wahi nazil karta hai ‘ ya Allah ne un par wahi nazil ki hai (woh Quran ki koi aayat sunate) main woh furan yaad kar leta ‘ un ki baatein mere dil ko lagti thien . Idhar saare Arab wale Fatah Makkah par apne Islam ko mauqoof kiye huay thay . Un ka kehna yeh tha ke is Nabi ko aur is ki qaum (Quraysh) ko nimatne do ‘ agar woh un par ghalib aa gaye to phir waqayi woh sache Nabi hain . Chunanche jab Makkah fatah ho gaya to har qaum ne Islam lane mein pehal ki aur mere walid ne bhi meri qaum ke Islam mein jaldi ki . Phir jab (Madinah) se wapas aaye to kaha ke main Allah ki qasam ek sache Nabi ke paas se aa raha hoon . Unhon ne farmaya hai ke falan namaaz is tarah falan waqt parha karo aur jab namaaz ka waqt ho jaye to tum mein se koi ek shakhs azaan de aur imamat woh kare jise Quran sab se zyada yaad ho . Logon ne andaza kiya ke kise Quran sab se zyada yaad hai to koi shakhs un ke qabile mein mujh se zyada Quran yaad karne wala unhein nahi mila . Kyunke main aane jaane wale sawaron se sun kar Quran Majeed yaad kar liya karta tha . Is liye mujhe logon ne Imam banaya . Haalan ke is waqt meri umr chhay ya saat saal ki thi aur mere paas ek hi chadar thi . Jab main (usay lapait kar) sajda karta to oopar ho jati (aur peeche ki jagah) khul jati . Is qabile ki ek aurat ne kaha ‘ tum apne qaari ka chotarr to pehle chhupa do . Aakhir unhon ne kapra khareeda aur mere liye ek qamees banayi , main jitna khush is qamees se hua itna kisi aur cheez se nahi hua tha .

Mujh se Abdullah bin Maslamah Qanabi ne byaan kiya , kaha hum se Imam Malik ne byaan kiya , un se Ibn Shihab ne , un se Urwah bin Zubayr ne aur un se Aisha razi Allahu anha ne byaan kiya , Nabi Karim salla Allahu alaihi wasallam se (doosri sanad aur Layth bin Saad ne kaha mujh se Yunus ne byaan kiya , un se Ibn Shihab ne , unhein Urwah bin Zubayr ne khabar di aur un se Aisha razi Allahu anha ne byaan kiya ke Utbah bin Abi Waqqas ne (marte waqt zamana e jahiliyat mein) apne bhai (Saad bin Abi Waqqas razi Allahu anhu) ko wasiyat ki thi ke woh Zam'ah bin Laythi ki baandi se paida hone wale bache ko apne qabze mein le lein . Utbah ne kaha tha ke woh mera larka ho ga . Chunanche jab Fatah Makkah ke mauqa par Rasool Allah salla Allahu alaihi wasallam Makkah mein dakhil huay to Saad bin Abi Waqqas razi Allahu anhu is bache ko le kar Nabi Karim salla Allahu alaihi wasallam ki khidmat mein hazir huay aur un ke saath Abd bin Zam'ah bhi aaye . Saad bin Abi Waqqas razi Allahu anhu ne to yeh kaha ke yeh mere bhai ka larka hai . Lekin Abd bin Zam'ah ne kaha: ya Rasool Allah! Yeh mera bhai hai (mere walid) Zam'ah ka beta hai kyunke unhi ke bistar par paida hua hai . Nabi Karim salla Allahu alaihi wasallam ne Zam'ah ki baandi ke larke ko dekha to woh waqayi (Saad ke bhai) Utbah bin Abi Waqqas ki shakal par tha lekin Nabi Karim salla Allahu alaihi wasallam ne (qanoon e shariat ke mutabiq) faisle mein yeh kaha ke ae Abd bin Zam'ah! Tumhein is bache ko rakho , yeh tumhara bhai hai , kyunke yeh tumhare walid ke firash par (is ki baandi ke batan se paida hua hai . Lekin doosri taraf Umm al-Momineen Sawdah razi Allahu anha se jo Zam'ah ki beti thien farmaya Sawdah! Is larke se parda kiya karna kyunke Aap ne is larke mein Utbah bin Abi Waqqas razi Allahu anhu ki shabahat payi thi . Ibn Shihab ne kaha un se Aisha razi Allahu anha ne byaan kiya ke Rasool Allah salla Allahu alaihi wasallam ne farmaya tha ke larka us ka hota hai jis ki joro ya laundi ke pait se paida hua ho aur zina karne wale ke hisse mein sang hi hain . Ibn Shihab ne byaan kiya ke Abu Hurairah razi Allahu anhu is hadees ko pukaar pukaar kar byaan kiya karte thay .

Hum se Muhammad bin Muqatil ne byaan kiya , kaha ke hum ko Abdullah bin Mubarak ne khabar di , unhein Yunus ne khabar di , unhein Zuhri ne , kaha ke mujhe Urwah bin Zubayr ne khabar di ke Ghazwa Fatah (Makkah) ke mauqa par ek aurat ne Nabi Karim salla Allahu alaihi wasallam ke ahad mein chori kar li thi . Is aurat ki qaum ghabrayi hui Usamah bin Zayd razi Allahu anhuma ke paas aayi taake woh Nabi Karim salla Allahu alaihi wasallam se is ki sifarish kar dein (ke is ka hath chori ke jurm mein na kaata jaye) . Urwah ne byaan kiya ke jab Usamah razi Allahu anhu ne is ke baare mein Nabi Karim salla Allahu alaihi wasallam se guftagu ki to Aap salla Allahu alaihi wasallam ke chehre ka rang badal gaya aur Aap salla Allahu alaihi wasallam ne farmaya! Tum mujh se Allah ki qaim ki hui ek had ke baare mein sifarish karne aaye ho . Usamah razi Allahu anhu ne arz kiya: mere liye dua e maghfirat kijiye , ya Rasool Allah! Phir dopahar baad Nabi Karim salla Allahu alaihi wasallam ne sahabah razi Allahu anhum ko khitab kiya , Allah Ta'ala ki us ke shaan ke mutabiq tareef karne ke baad farmaya: Amma baad! Tum mein se pehle log is liye halak ho gaye ke agar un mein se koi muazzaz shakhs chori karta to usay chhor dete lekin agar koi kamzor chori kar leta to us par had qaim karte aur is zaat ki qasam jis ke hath mein Muhammad salla Allahu alaihi wasallam ki jaan hai agar Fatima bint Muhammad bhi chori kar le to main is ka hath kaatoon ga . Is ke baad Nabi Karim salla Allahu alaihi wasallam ne is aurat ke liye hukm diya aur un ka hath kaat diya gaya . Phir is aurat ne sidq e dil se tauba kar li aur shaadi bhi kar li . Aisha razi Allahu anha ne byaan kiya ke baad mein woh mere yahan aati thien . Un ko aur koi zaroorat hoti to main Rasool Allah salla Allahu alaihi wasallam ke samne pesh kar deti .

Hum se Amr bin Khalid ne byaan kiya , kaha hum se Zuhayr bin Muawiyah ne byaan kiya , kaha hum se Aasim bin Sulayman ne byaan kiya , un se Abu Usman Nahdi ne byaan kiya aur un se Mujashia bin Masood razi Allahu anhu ne byaan kiya ke Fatah Makkah ke baad main Rasool Allah salla Allahu alaihi wasallam ki khidmat mein apne bhai (Mujalid) ko le kar hazir hua aur arz kiya ke ya Rasool Allah! Main isay is liye le kar hazir hua hoon taake Aap hijrat par is se bai'at le lein . Nabi Karim salla Allahu alaihi wasallam ne farmaya ke hijrat karne wale is ki fazeelat o sawab ko haasil kar chuke (yani ab hijrat karne ka zamana to guzar chuka) . Main ne arz kiya: phir Aap is se kis cheez par bai'at lein ge ? Nabi Karim salla Allahu alaihi wasallam ne farmaya ke iman , Islam aur jihad par . Abi Usman Nahdi ne kaha ke phir main (Mujashia ke bhai) Abu Ma'bad Mujalid se mila woh donon bhaiyon se bare thay , main ne un se bhi is hadees ke mutalliq poocha to unhon ne kaha ke Mujashia ne hadees theek tarah byaan ki hai .

Hum se Amr bin Khalid ne byaan kiya , kaha hum se Zuhayr bin Muawiyah ne byaan kiya , kaha hum se Aasim bin Sulayman ne byaan kiya , un se Abu Usman Nahdi ne byaan kiya aur un se Mujashia bin Masood razi Allahu anhu ne byaan kiya ke Fatah Makkah ke baad main Rasool Allah salla Allahu alaihi wasallam ki khidmat mein apne bhai (Mujalid) ko le kar hazir hua aur arz kiya ke ya Rasool Allah! Main isay is liye le kar hazir hua hoon taake Aap hijrat par is se bai'at le lein . Nabi Karim salla Allahu alaihi wasallam ne farmaya ke hijrat karne wale is ki fazeelat o sawab ko haasil kar chuke (yani ab hijrat karne ka zamana to guzar chuka) . Main ne arz kiya: phir Aap is se kis cheez par bai'at lein ge ? Nabi Karim salla Allahu alaihi wasallam ne farmaya ke iman , Islam aur jihad par . Abi Usman Nahdi ne kaha ke phir main (Mujashia ke bhai) Abu Ma'bad Mujalid se mila woh donon bhaiyon se bare thay , main ne un se bhi is hadees ke mutalliq poocha to unhon ne kaha ke Mujashia ne hadees theek tarah byaan ki hai .

Hum se Muhammad bin Abi Bakr ne byaan kiya , kaha hum se Fudayl bin Sulayman ne byaan kiya , kaha hum se Aasim bin Sulayman ne byaan kiya , un se Abu Usman Nahdi ne aur un se Mujashia bin Masood razi Allahu anhu ne ke main apne bhai (Abu Ma'bad razi Allahu anhu) ko Nabi Karim salla Allahu alaihi wasallam ki khidmat mein Aap se hijrat par bai'at karane ke liye le gaya . Nabi Karim salla Allahu alaihi wasallam ne farmaya ke hijrat ka sawab to hijrat karne walon ke saath khatam ho chuka . Albatta main is se Islam aur jihad par bai'at leta hoon . Abu Usman ne kaha ke phir main ne Abu Ma'bad razi Allahu anhu se mil kar un se is ke mutalliq poocha to unhon ne kaha ke Mujashia razi Allahu anhu ne theek byaan kiya aur Khalid Hazza ne bhi Abu Usman se byaan kiya , un se Mujashia razi Allahu anhu ne ke woh apne bhai Mujalid razi Allahu anhu ko le kar aaye thay , (phir hadees ko aakhir tak byaan kiya , is ko Ismail ne wasal kiya hai) .

Hum se Muhammad bin Abi Bakr ne byaan kiya , kaha hum se Fudayl bin Sulayman ne byaan kiya , kaha hum se Aasim bin Sulayman ne byaan kiya , un se Abu Usman Nahdi ne aur un se Mujashia bin Masood razi Allahu anhu ne ke main apne bhai (Abu Ma'bad razi Allahu anhu) ko Nabi Karim salla Allahu alaihi wasallam ki khidmat mein Aap se hijrat par bai'at karane ke liye le gaya . Nabi Karim salla Allahu alaihi wasallam ne farmaya ke hijrat ka sawab to hijrat karne walon ke saath khatam ho chuka . Albatta main is se Islam aur jihad par bai'at leta hoon . Abu Usman ne kaha ke phir main ne Abu Ma'bad razi Allahu anhu se mil kar un se is ke mutalliq poocha to unhon ne kaha ke Mujashia razi Allahu anhu ne theek byaan kiya aur Khalid Hazza ne bhi Abu Usman se byaan kiya , un se Mujashia razi Allahu anhu ne ke woh apne bhai Mujalid razi Allahu anhu ko le kar aaye thay , (phir hadees ko aakhir tak byaan kiya , is ko Ismail ne wasal kiya hai) .

Mujh se Muhammad bin Bashar ne byaan kiya , kaha hum se Ghundar ne byaan kiya , kaha hum se Shubah ne byaan kiya , un se Abu Bishr ne aur un se Mujahid ne ke main ne Ibn Umar razi Allahu anhuma se arz kiya ke mera irada hai ke main mulk e Sham ko hijrat kar jaon , farmaya: ab hijrat baqi nahi rahi , jihad hi baqi reh gaya hai . Is liye jao aur khud ko pesh karo . Agar tum ne kuch pa liya to behtar warna wapas aa jana .