Hum se Abu Naeem ne byaan kiya ‘ kaha hum se Sufyan Sawri ne byaan kiya (doosri sanad) aur hum se Qubaysah bin Uqbah ne byaan kiya ‘ kaha hum se Sufyan Sawri ne byaan kiya ‘ un se Yahya bin Abi Ishaq ne aur un se Anas razi Allahu anhu ne byaan kiya ke hum Nabi Karim salla Allahu alaihi wasallam ke saath (Makkah mein) das din thehray thay aur is muddat mein hum namaaz qasr karte thay .

Hum se Abdan ne byaan kiya ‘ kaha hum ko Abdullah bin Mubarak ne khabar di ‘ kaha hum ko Aasim ne khabar di ‘ unhein Ikrimah ne aur un se Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ne Makkah mein anees din qiyam farmaya tha aur is muddat mein namaaz do rakaton (qasr) parhte thay .

Hum se Ahmad bin Yunus ne byaan kiya ‘ kaha hum se Abu Shihab ne byaan kiya ‘ un se Aasim ne ‘ un se Ikrimah ne aur un se Abdullah bin Abbas razi Allahu anhuma ne byaan kiya ke hum Nabi Karim salla Allahu alaihi wasallam ke saath safar mein (Fatah Makkah ke baad) anees din tak to namaaz qasr parhte thay ‘ lekin jab is se zyada muddat guzar jati to phir poori namaaz parhte thay .