Hum se Musaddad ne byaan kiya , kaha ke hum se Hammad bin Zayd ne byaan kiya , un se Ayub Sakhtiyani ne un se Muhammad bin Sireen ne , unhon ne kaha ke Anas bin Malik razi Allahu anhu se poocha gaya ke Nabi Karim salla Allahu alaihi wasallam ne subah ki namaaz mein Qunoot parha hai? Aap ne farmaya ke haan phir poocha gaya ke kya ruku se pehle? To Aap ne farmaya ke ruku ke baad thore dinon tak .

Hum se Moosa bin Ismail ne bayan kiya , unhon ne kaha hum se Ibrahim bin Saad ne bayan kiya , unhon ne kaha humein Ibn Shihab ne Humaid bin Abdur Rahman ke wastay se bayan kiya ke Abu Hurairah aur Abu Saeed Khudri raziyallahu anhuma ne unhen khabar di ke Rasool Allah salla Allahu alaihi wa sallam ne masjid ki deewar par balgham dekha , phir Rasool Allah salla Allahu alaihi wa sallam ne ek kankri li aur usay saaf kar diya . Phir farmaya ke jab tum mein se koi shakhs thookay to usay apne munh ke samne ya dayen taraf nahi thookna chahiye , balkay bayen taraf ya apne paon ke neechay thook lay .

Hum se Muaz bin Fadalaa ne byaan kiya , unhon ne Hisham Dastuwai se , unhon ne Yahya bin Abi Kathir se , unhon ne Abu Salamah se , unhon ne Abu Hurayrah razi Allahu anhu se , unhon ne kaha ke lo main tumhein Nabi Karim salla Allahu alaihi wasallam ki namaaz ke qareeb qareeb kar doon ga . Chunanchay Abu Hurayrah razi Allahu anhu , Zuhr , Isha aur subah ki aakhri rakaton mein qunoot parhaya karte thay . «Sami Allahu liman hamidah» ke baad . Yani momineen ke haq mein dua karte aur kuffar par lanat bhejte .

Hum se Musaddad bin Musarhad ne byaan kiya , kaha ke hum se Abdul Wahid bin Ziyad ne byaan kiya , kaha ke hum se Asim bin Sulayman ne byaan kiya , unhon ne kaha ke main ne Anas bin Malik razi Allahu anhu se Qunoot ke baare mein poocha to Aap ne farmaya ke Dua-e-Qunoot (Nabi Karim salla Allahu alaihi wasallam ke daur mein) parhi jati thi . Main ne poocha ke ruku se pehle ya us ke baad? Aap ne farmaya ke ruku se pehle . Asim ne kaha ke Aap hi ke hawale se falan shakhs ne khabar di hai ke Aap ne ruku ke baad farmaya tha . Is ka jawab Anas ne yeh diya ke unhon ne ghalat samjha . Rasool Allah salla Allahu alaihi wasallam ne ruku ke baad sirf aik mahina Dua-e-Qunoot parhi thi . Hua yeh tha ke Aap salla Allahu alaihi wasallam ne sahabah mein se sattar qariyon ke qareeb mushrikon ki aik qaum (Bani Aamir) ki taraf se un ko taleem dene ke liye bheje thay , yeh log un ke siwa thay jin par Aap ne bad-dua ki thi . In mein aur Nabi Karim salla Allahu alaihi wasallam ke darmiyan ahd tha , lekin unhon ne ahd shikni ki (aur qariyon ko maar dala) to Nabi Karim salla Allahu alaihi wasallam aik mahina tak (ruku ke baad) Qunoot parhte rahe in par bad-dua karte rahe .

Hum se Ahmad bin Yunus ne byaan kiya , kaha ke hum se Zaidah ne byaan kiya , in se Taymi ne , in se Abu Mijlaz ne , in se Anas bin Malik razi Allahu anhu ke Nabi Karim salla Allahu alaihi wasallam ne aik mahina tak Dua Qunoot parhi aur is mein qaba'il Rial wa Dhakwan par bad-dua ki thi .

Hum se Amr bin Ali ne byaan kiya ‘ un se Muhammad bin Fudayl ne byaan kiya ‘ un se Asim Ahwal ne aur un se Anas razi Allahu anhu ne ke jab qaariyon ki ek jamaat shaheed kar di gayi to Rasool Allah salla Allahu alaihi wasallam ek maheena tak qunoot parhte rahe . Main ne Nabi Karim salla Allahu alaihi wasallam ko kabhi nahin dekha ke Aap salla Allahu alaihi wasallam in dinon se zyada kabhi ghamgeen rahe hon .

Hum se Hafs Bin Umar Hauzi ne bayan kiya, kaha hum se Hammam ne un se Ishaq ne aur un se Anas (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne Banu Sulaim ke (70) sattar aadmi (jo qari thay) Banu Aamir ke yahan bheje. Jab ye sab hazrat (Bair-e-Mauna par) pahunche to mere mamun Haram Bin Milhan (Radi Allahu Anhu) ne kaha mein (Banu Sulaim ke yahan) aage jata hoon agar mujhe unhon ne is baat ka aman de diya ke mein Rasul Allah (Sallallahu Alaihi Wasallam) ki batein un tak pahunchaun to behtar warna tum log mere qareeb to ho hi. Chunancha wo un ke yahan gaye aur unhon ne aman bhi de diya. Abhi wo qabila ke logon ko Rasul Allah (Sallallahu Alaihi Wasallam) ki batein suna hi rahe thay ke qabila walon ne apne ek aadmi (Aamir Bin Tufail) ko ishara kiya aur us ne Aap (Radi Allahu Anhu) ke jism par barcha paiwast kar diya jo aar-paar ho gaya. Is waqt un ki zaban se nikla Allahu Akbar mein kamyab ho gaya Kaabah ke Rab ki qasam! Is ke baad qabila wale Haram (Radi Allahu Anhu) ke doosre sathiyon ki taraf (jo sattar ki tadaad mein thay) barhe aur sab ko qatl kar diya. Albatta ek sahab jo langre thay, pahar par charh gaye. Hammam (rawi-e-hadees) ne bayan kiya mein samajhta hoon ke ek aur un ke sath (pahar par charhe thay) (Umar Bin Umayyah Zamri) is ke baad Jibrail (Alaihis Salam) ne Nabi Kareem (Sallallahu Alaihi Wasallam) ko khabar di ke aap ke sathi Allah Ta'ala se ja mile hain pas Allah khud bhi un se khush hai aur unhein bhi khush kar diya hai. Is ke baad hum (Quran ki doosri aayaton ke sath ye aayat bhi) parhte thay (Tarjuma) Hamari qaum ke logon ko ye paigham pahuncha do ke hum apne Rab se aa mile hain, pas hamara Rab khud bhi khush hai aur humein bhi khush kar diya hai. Is ke baad ye aayat mansookh ho gayi, Nabi Kareem (Sallallahu Alaihi Wasallam) ne chalis din tak subah ki namaz mein qabila Rial, Zakwan, Bani Lihyan aur Bani Assiyyah ke liye bad-dua ki thi jinhon ne Allah aur us ke Rasul (Sallallahu Alaihi Wasallam) ki na-farmani ki thi
.

Hum se Ismail Bin Abdullah ne bayan kiya, kaha ke mujh se Imam Malik ne bayan kiya Ishaq Bin Abdullah Bin Abi Talha se aur un se Anas Bin Malik (Radi Allahu Anhu) ne bayan kiya ke Ashab Bair-e-Mauna (Radi Allahu Anhum) ko jin logon ne qatl kiya tha un par Rasul Allah (Sallallahu Alaihi Wasallam) ne tees din tak subah ki namaz mein bad-dua ki thi. Ye Rial, Zakwan aur Assiyyah qabail ke log thay jinhon ne Allah aur us ke Rasul ki na-farmani ki thi. Anas (Radi Allahu Anhu) ne bayan kiya ke jo (70 qari) sahaba Bair-e-Mauna ke mauqe par shaheed kar diye gaye thay, un ke bare mein Quran ki ye aayat nazil hui thi jise hum muddat tak parhte rahe thay baad mein aayat mansookh ho gayi thi (is aayat ka tarjuma ye hai) "Hamari qaum ko pahuncha do ke hum apne Rab se aa mile hain, hamara Rab hum se raazi hai aur hum us se raazi hain."
.

Hum se Muhammad Bin Bashar ne bayan kiya, kaha hum se Muhammad Bin Abi Adi aur Sahl Bin Yusuf ne bayan kiya, un se Said Bin Abi Arubah ne, un se Qatada ne aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ki khidmat mein Rial, Zakwan, Usaiya aur Banu Lihyan qabail ke kuch log aaye aur yaqeen dilaya ke wo log Islam la chuke hain aur unhon ne apni kafir qaum ke muqabil imdad aur taleem-o-tableegh ke liye Aap se madad chahi. To Nabi Kareem (Sallallahu Alaihi Wasallam) ne sattar Ansariyion ko un ke sath kar diya. Anas (Radi Allahu Anhu) ne bayan kiya, ke hum unhein Qari kaha karte thay. Wo log din mein jangal se lakriyan jama karte aur raat mein namaz parhte rehte. Ye hazrat in qabile walon ke sath chale gaye, lekin jab Bi'r Mauna par pahunche to unhein qabile walon ne in Sahaba ke sath dagha ki aur unhein shaheed kar dala. Nabi Kareem (Sallallahu Alaihi Wasallam) ne ek mahina tak (namaz mein) Qunoot parhi aur Rial-o-Zakwan aur Banu Lihyan ke liye bad-dua karte rahe. Qatada ne kaha ke hum se Anas (Radi Allahu Anhu) ne kaha ke (in shuhada ke bare mein) Quran Majeed mein hum ye ayat yun parhte rahe "Haan! Hamari qaum (Muslim) ko bata do ke hum apne Rabb se ja mile. Aur wo hum se razi ho gaya hai aur humein bhi us ne khush kiya hai." Phir ye ayat mansookh ho gayi thi
.

Hum se Abu-ul-Numan ne bayan kiya, kaha hum se Sabit Bin Yazid ne bayan kiya, hum se Asim Ahwal ne, kaha ke mein ne Anas (Radi Allahu Anhu) se dua-e-qunoot ke bare mein pucha to Aap ne farmaya ke ruku se pehle honi chahiye, mein ne arz kiya ke falan sahab (Muhammad Bin Sireen) to kehte hain ke Aap ne kaha tha ke ruku ke baad hoti hai, Anas (Radi Allahu Anhu) ne is par kaha tha ke unhon ne ghalat kaha hai. Phir unhon ne hum se ye hadees bayan ki ke Nabi Kareem (Sallallahu Alaihi Wasallam) ne ek mahine tak ruku ke baad dua-e-qunoot ki thi. Aur Aap ne is mein Banu Sulaim ke qabilion ke haqq mein bad-dua ki thi. Unhon ne bayan kiya ke Aap (Sallallahu Alaihi Wasallam) ne chalis ya sattar Quran ke aalam Sahaba ki ek jamaat, rawi ko shaq tha, Mushrikeen ke paas bheji thi, lekin Banu Sulaim ke log (jin ka sardar Aamir Bin Tufail tha) un ke aade aaye aur un ko maar dala. Halanke Nabi Kareem (Sallallahu Alaihi Wasallam) se un ka muahida tha. (Lekin unhon ne dagha di) Aap (Sallallahu Alaihi Wasallam) ko kisi muamle par itna ranjeeda aur ghamgeen nahi dekha jitna in Sahaba ki shahadat par Aap ranjeeda thay
.

Hum se Abu Ma'mar ne bayan kiya, kaha hum se Abdul Waris Bin Saeed ne bayan kiya, kaha hum se Abdul Aziz Bin Suhaib ne bayan kiya, un se Anas Bin Malik Radi Allahu Anhu ne bayan kiya ke Nabi Kareem Sallallahu Alaihi Wasallam ne sattar sahaba ki ek jamaat tableegh-e-Islam ke liye bheji thi. Unhein Qari kaha jata tha. Raste mein Banu Sulaim ke do qabile Rial aur Zakwan ne ek kunwein ke qareeb in ke sath muzahimat ki. Ye kunwan Bir Mauna ke naam se mashhoor tha. Sahaba ne in se kaha ke Allah ki qasam! Hum tumhare khilaf, yahan larne nahi aaye balkey humein to Rasul Allah Sallallahu Alaihi Wasallam ki taraf se ek zarurat par mamoor kiya gaya hai. Lekin kuffar ke in qabiloon ne tamam sahaba ko shaheed kar diya. Is waqia ke baad Nabi Kareem Sallallahu Alaihi Wasallam subah ki namaz mein in ke liye ek mahine tak bad-dua karte rahe. Isi din se dua-e-qunoot ki ibtida hui, warna is se pehle hum dua-e-qunoot nahi parha karte thay aur Abdul Aziz Bin Suhaib ne bayan kiya ke ek sahib (Asim Ahwal) ne Anas Radi Allahu Anhu se dua-e-qunoot ke bare mein pucha ke ye dua ruku ke baad parhi jaye gi ya qirat-e-Quran se farigh hone ke baad? (Ruku se pehle) Anas Radi Allahu Anhu ne farmaya ke nahi balkey qirat-e-Quran se farigh hone ke baad (ruku se pehle)
.

Hum se Muslim Bin Ibrahim ne bayan kiya, kaha hum se Hisham Dastuwai ne bayan kiya, kaha hum se Qatada ne bayan kiya aur un se Anas Radi Allahu Anhu ne bayan kiya ke Rasul Allah Sallallahu Alaihi Wasallam ne ruku ke baad ek mahine tak qunoot parhi jis mein Aap Sallallahu Alaihi Wasallam Arab ke chand qabail (Rial-o-Zakwan waghaira) ke liye bad-dua karte thay
.

Mujh se Abd-ul-A'la Bin Hammad ne bayan kiya, kaha hum se Yazid Bin Zurai ne bayan kiya, kaha hum se Saeed Bin Abi Aroobah ne bayan kiya, un se Qatada ne aur un se Anas Bin Malik Radi Allahu Anhu ne bayan kiya ke Rial, Zakwan, Usayyah aur Banu Lihyan ne Rasul Allah Sallallahu Alaihi Wasallam se apne dushmanon ke muqabil madad chahi. Nabi Kareem Sallallahu Alaihi Wasallam ne sattar Ansari sahaba ko in ki kumak ke liye ravana kiya. Hum in hazrat ko Qari kaha karte thay. Apni zindagi mein ma'ash ke liye din mein lakriyan jama karte thay aur raat mein namaz parha karte thay. Jab ye hazrat Bir Mauna par pahunche to in qabile walon ne unhein dhoka diya aur unhein shaheed kar diya. Jab Nabi Kareem Sallallahu Alaihi Wasallam ko is ki khabar hui to Aap ne subah ki namaz mein ek mahine tak bad-dua ki. Arab ke unhi chand qabail Rial, Zakwan, Usayyah aur Banu Lihyan ke liye. Anas Radi Allahu Anhu ne bayan kiya ke in sahaba ke bare mein Quran mein (ayat nazil hui aur) hum is ki tilawat karte thay. Phir wo ayat mansookh ho gayi (ayat ka tarjuma) ”Hamari taraf se hamari qaum (musalmanon) ko khabar pahuncha do ke hum apne rabb ke pas aa gaye hain. Hamara rabb hum se raazi hai aur humein bhi (apni nematon se) is ne khush rakha hai.“ Aur Qatada se riwayat hai un se Anas Bin Malik Radi Allahu Anhu ne bayan kiya ke Nabi Kareem Sallallahu Alaihi Wasallam ne ek mahine tak subah ki namaz mein, Arab ke chand qabail yani Rial, Zakwan, Usayyah aur Banu Lihyan ke liye bad-dua ki thi. Khalifa Bin Khayyat (Imam Bukhari Rahimahullah ke sheikh) ne ye izafa kiya ke hum se Yazid Bin Zurai ne bayan kiya, kaha hum se Saeed Bin Abi Aroobah ne bayan kiya, un se Qatada ne ke hum se Anas Radi Allahu Anhu ne bayan kiya ke ye sattar sahaba qabila-e-Ansar se thay aur unhein Bir Mauna ke pas shaheed kar diya gaya tha
.

Hum se Musa Bin Ismail ne bayan kiya, kaha hum se Hammam Bin Yahya ne bayan kiya, un se Ishaq Bin Abdullah Bin Abi Talha ne bayan kiya aur un se Anas Radi Allahu Anhu ne bayan kiya ke Nabi Kareem Sallallahu Alaihi Wasallam ne in ke mamoon, Umm-e-Sulaim (Anas ki walida) ke bhai ko bhi in sattar sawaron ke sath bheja tha. Is ki wajah ye hui thi ke mushrikon ke sardar Amir Bin Tufail ne Nabi Kareem Sallallahu Alaihi Wasallam ke samne (shararait aur takabbur se) teen suraten rakhi thin. Is ne kaha ke ya to ye kijiye ke dehati abadi par Aap ki hukumat ho aur shehri abadi par meri ho ya phir mujhe Aap ka jansheen muqarrar kiya jaye warna phir mein hazaron Ghatafaniyon ko le kar Aap par charhayi kar doonga. (Is par Nabi Kareem Sallallahu Alaihi Wasallam ne is ke liye bad-dua ki) aur Umm-e-Falaan ke ghar mein wo marz-e-ta'oon mein giraftar hua. Kehne laga ke is falaan ki aurat ke ghar ke jawan oont ki tarah mujhe bhi ghudood nikal aaya hai. Mera ghora lao. Chunancha wo apne ghore ki pusht par hi mar gaya. Baharhaal Umm-e-Sulaim ke bhai Haram Bin Milhan ek aur sahabi jo langre thay aur teesre sahabi jin ka talluq Bani Falaan se tha, aage barhe. Haram ne (apne dono sathiyon se Banu Amir tak pahunch kar pehle hi) keh diya ke tum dono mere qareeb hi kahin rehna. Mein in ke pas pehle jata hoon agar unhon ne mujhe aman de diya to tum log qareeb hi ho aur agar unhon ne qatl kar diya to Aap hazrat apne sathiyon ke pas chale jana. Chunancha qabila mein pahunch kar unhon ne in se kaha, kya tum mujhe aman deyte ho ke mein Rasul Allah Sallallahu Alaihi Wasallam ka paigham tumhein pahuncha doon? Phir wo Aap Sallallahu Alaihi Wasallam ka paigham unhein pahunchane lage to qabila walon ne ek shakhs ko ishara kiya aur is ne peeche se aa kar in par neza se waar kiya. Hammam ne bayan kiya, mera khayal hai ke neza aar paar ho gaya tha. Haram ki zaban se is waqt nikla ”Allahu Akbar, Kaaba ke rabb ki qasam! Mein ne to apni murad hasil kar li.“ Is ke baad in mein se ek sahabi ko bhi mushrikeen ne pakar liya (jo Haram Radi Allahu Anhu ke sath thay aur unhein bhi shaheed kar diya) phir is muhim ke tamam sahaba ko shaheed kar diya. Sirf langre sahabi bach nikalne mein kamyab ho gaye wo pahar ki choti par charh gaye thay. In shuhada ki shan mein Allah Ta'ala ne ayat nazil farmai, baad mein wo ayat mansookh ho gayi (ayat ye thi) «inna qad laqaina rabbana faraziya anna wa arzana» . Nabi Kareem Sallallahu Alaihi Wasallam ne in qabail Rial, Zakwan, Banu Lihyan aur Usayyah ke liye jinhon ne Allah aur is ke Rasul ki nafarmani ki thi tees din tak subah ki namaz mein bad-dua ki
.

Mujh se Habban ne bayan kiya, kaha hum ko Abdullah ne khabar di, in ko Ma'mar ne khabar di, unhon ne kaha ke mujh se Sumamah Bin Abdullah Bin Anas ne bayan kiya aur unhon ne Anas Bin Malik Radi Allahu Anhu se suna wo bayan karte thay ke jab Haram Bin Milhan ko jo in ke mamoon thay Bir Mauna ke mauqe par zakhmi kiya gaya to zakham par se khoon ko hath mein le kar unhon ne apne chehra aur sar par laga liya aur kaha Kaaba ke rabb ki qasam! Meri murad hasil ho gayi
.

Hum se Ubaid Bin Ismail ne bayan kiya, kaha hum se Abu Usama ne bayan kiya, un se Hisham Bin Urwah ne, un se in ke walid ne aur un se Aisha Radi Allahu Anha ne bayan kiya ke jab Makka mein mushrik log Abu Bakr Siddiq Radi Allahu Anhu ko sakht takleef dene lage to Rasul Allah Sallallahu Alaihi Wasallam se Abu Bakr Radi Allahu Anhu ne bhi ijazaat chahi. Nabi Kareem Sallallahu Alaihi Wasallam ne farmaya ke abhi yahin thahre raho. Unhon ne arz kiya: Ya Rasul Allah! Kya Aap bhi (Allah Ta'ala se) apne liye hijrat ki ijazaat ke umeerdwar hain. Aap Sallallahu Alaihi Wasallam ne farmaya: Haan mujhe is ki umeed hai. Aisha Radi Allahu Anha kehti hain ke phir Abu Bakr Radi Allahu Anhu intizar karne lage. Aakhir Nabi Kareem Sallallahu Alaihi Wasallam ek din zohar ke waqt (hamare ghar) tashreef laye aur Abu Bakr Radi Allahu Anhu ko pukara aur farmaya ke takhliya kar lo. Abu Bakr Radi Allahu Anhu ne kaha ke sirf meri dono larkiyan yahan maujood hain. Nabi Kareem Sallallahu Alaihi Wasallam ne farmaya ke tum ko maloom hai mujhe bhi hijrat ki ijazaat de di gayi hai. Abu Bakr Radi Allahu Anhu ne arz kiya: Ya Rasul Allah! Kya mujhe bhi sath chalne ki sa'adat hasil hogi? Aap Sallallahu Alaihi Wasallam ne farmaya ke haan tum bhi mere sath chalo ge. Abu Bakr Radi Allahu Anhu ne arz kiya: Ya Rasul Allah! Mere pas do oontniyan hain aur mein ne unhein hijrat hi ki niyat se tayyar kar rakha hai. Chunancha unhon ne ek oontni jis ka naam ”Al-Jada“ tha Aap Sallallahu Alaihi Wasallam ko de di. Dono buzurg sawar ho kar ravana hue aur ye ghar Saur pahari ka tha is mein ja kar dono posheeda ho gaye. Amir Bin Fuhairah jo Abdullah Bin Tufail Bin Sanjarah, Aisha Radi Allahu Anha ke walida ki taraf se bhai thay, Abu Bakr Radi Allahu Anhu ki ek doodh dene wali oontni thi to Amir Bin Fuhairah subah-o-sham (aam maweshiyon ke sath) ise charane le jate aur raat ke aakhri hisse mein Nabi Kareem Sallallahu Alaihi Wasallam aur Abu Bakr Radi Allahu Anhu ke pas aate thay. (Ghar-e-Saur mein in hazrat ki khorak isi ka doodh thi) aur phir ise charane ke liye le kar ravana ho jate. Is tarah koi charwaha is par agah na ho saka. Phir jab Aap Sallallahu Alaihi Wasallam aur Abu Bakr Radi Allahu Anhu ghar se nikal kar ravana hue to peeche peeche Amir Bin Fuhairah bhi pahunche thay. Aakhir dono hazrat Madina pahunch gaye. Bir Mauna ke hadise mein Amir Bin Fuhairah Radi Allahu Anhu bhi shaheed ho gaye thay. Abu Usama se riwayat hai, un se Hisham Bin Urwah ne bayan kiya, unhein in ke walid ne khabar di, unhon ne bayan kiya ke jab Bir Mauna ke hadise mein qari sahaba shaheed kiye gaye aur Amr Bin Umayya Zamri Radi Allahu Anhu qaid kiye gaye to Amir Bin Tufail ne in se pucha ke ye kaun hai? Unhon ne ek lash ki taraf ishara kiya. Amr Bin Umayya Radi Allahu Anhu ne unhein bataya ke ye Amir Bin Fuhairah Radi Allahu Anhu hain. Is par Amir Bin Tufail Radi Allahu Anhu ne kaha ke mein ne dekha ke shaheed ho jane ke baad in ki lash aasman ki taraf uthayi gayi. Mein ne upar nazar uthayi to lash aasman-o-zameen ke darmiyan latak rahi thi. Phir wo zameen par rakh di gayi. In shuhada ke mutaliq Nabi Kareem Sallallahu Alaihi Wasallam ko Jibrail Alaihis Salam ne bi-izn-e-khuda bata diya tha. Chunancha Nabi Kareem Sallallahu Alaihi Wasallam ne in ki shahadat ki khabar sahaba ko di aur farmaya ke tumhare saathi shaheed kar diye gaye hain aur shahadat ke baad unhon ne apne rabb ke huzoor mein arz kiya ke Ai hamara rabb! Hamare (musalman) bhaiyon ko is ki ittela dede ke hum tere pas pahunch kar kis tarah khush hain aur tu bhi hum se raazi hai. Chunancha Allah Ta'ala ne (Quran Majeed ke zariye) musalmanon ko is ki ittela de di. Isi hadise mein Urwah Bin Asma Bin Salt (Radi Allahu Anhuma) bhi shaheed hue thay (phir Zubair Radi Allahu Anhu ke bete jab paida hue) to in ka naam Urwah, unhi Urwah Ibn Asma (Radi Allahu Anhuma) ke naam par rakha gaya. Munzir Bin Amr Radi Allahu Anhu is hadise mein shaheed hue thay. (Aur Zubair Radi Allahu Anhu ke dusre sahib zade ka naam) Munzir unhi ke naam par rakha gaya tha
.

Hum se Muhammad Bin Muqatil ne bayan kiya, kaha hum ko Abdullah Bin Mubarak ne khabar di, kaha hum ko Sulaiman Taimi ne khabar di, unhein Abu Mijlaz (Lahiq Bin Humaid) ne aur un se Anas Bin Malik Radi Allahu Anhu ne bayan kiya ke Rasul Allah Sallallahu Alaihi Wasallam ne ek mahine tak ruku ke baad duaye qunoot parhi. Is duaye qunoot mein Aap Sallallahu Alaihi Wasallam ne Rial aur Zakwan nami qabail ke liye bad-dua ki. Aap Sallallahu Alaihi Wasallam farmate thay ke qabila-e-Usayyah ne Allah aur is ke Rasul ki nafarmani ki
.

Hum se Yahya Bin Bukair ne bayan kiya, kaha hum se Imam Malik ne bayan kiya, un se Ishaq Bin Abdullah Bin Abi Talha ne aur un se Anas Bin Malik Radi Allahu Anhu ne bayan kiya ke Nabi Kareem Sallallahu Alaihi Wasallam ne in logon ke liye jinhon ne Aap ke muazzaz ashab (qariyon) ko Bir Mauna mein shaheed kar diya tha. Tees din tak subah ki namaz mein bad-dua ki thi Aap Sallallahu Alaihi Wasallam qabail Rial, Banu Lihyan aur Usayyah ke liye in namazon mein bad-dua karte thay, jinhon ne Allah aur is ke Rasul Sallallahu Alaihi Wasallam ki nafarmani ki thi. Anas Radi Allahu Anhu ne bayan kiya ke phir Allah Ta'ala ne apne Nabi Kareem Sallallahu Alaihi Wasallam par unhi ashab ke bare mein jo Bir Mauna mein shaheed kar diye gaye thay, Quran Majeed ki ayat nazil ki. Hum is ayat ki tilawat kiya karte thay lekin baad mein wo ayat mansookh ho gayi (is ayat ka tarjuma ye hai) ”Hamari qaum ko khabar pahuncha do ke hum apne rabb se aa mile hain. Hamara rabb hum se raazi hai aur hum bhi is se raazi hain“
.

Hum se Musa Bin Ismail ne bayan kiya, kaha hum se Abdul Wahid Bin Ziyad ne bayan kiya, kaha hum se Asim Bin Ahwal Bin Sulaiman ne bayan kiya, kaha ke mein ne Anas Bin Malik Radi Allahu Anhu se namaz mein qunoot ke bare mein pucha ke qunoot ruku se pehle hai ya ruku ke baad? Unhon ne kaha ke ruku se pehle. Mein ne arz kiya ke falaan sahib ne Aap hi ka naam le kar mujhe bataya ke qunoot ruku ke baad. Anas Radi Allahu Anhu ne kaha ke unhon ne ghalt kaha. Rasul Allah Sallallahu Alaihi Wasallam ne ruku ke baad sirf ek mahine tak qunoot parhi. Aap ne sahaba (Radi Allahu Anhum) ki ek jamaat ko jo qariyon ke naam se mashhoor thi jo sattar ki tidad mein thay, mushrikeen ke baaz qabail ke yahan bheja tha. Mushrikeen ke in qabail ne Nabi Kareem Sallallahu Alaihi Wasallam ko in sahaba ke bare mein pehle hifz-o-aman ka yaqeen dilaya tha lekin baad mein ye log sahaba (Radi Allahu Anhum) ki is jamaat par ghalib aa gaye (aur ghaddari ki aur unhein shaheed kar diya) Rasul Allah Sallallahu Alaihi Wasallam ne isi mauqe par ruku ke baad ek mahine tak qunoot parhi thi aur is mein in mushrikeen ke liye bad-dua ki thi
.

Hum se Hasan bin Rabee ne bayan kiya, kaha hum se Abu al-Ahwas ne bayan kiya, in se Aasim ne aur in se Anas razi Allahu anhu ne ke Nabi Karim salla Allahu alaihi wasallam ne ek muhim bheji, jis mein shareek logon ko Qurraa (yani Quran Majeed ke qaari) kaha jata thu. In sab ko shaheed kar diya gaya. Main ne nahi dekha ke Nabi Karim salla Allahu alaihi wasallam ko kabhi kisi cheez ka itna gham hua ho jitna Aap ko in ki shahadat ka gham hua thu. Chunanche Nabi Karim salla Allahu alaihi wasallam ne ek mahine tak fajr ki namaz mein in ke liye bad-dua ki, Aap kehte ke Usay-yah ne Allah aur is ke Rasool ki nafarmani ki.

Aur aap ne qabail Bani Sulaim ke liye ek mahine tak duaye qonoot parhi jis mein un ke liye bad-dua ki.