Hum se Amr bin Ali ne bayan kiya, kaha hum se Yahya ne bayan kiya, kaha hum se Sufyan ne bayan kiya, kaha ke mujh se Mansoor aur Sulayman ne bayan kiya, in se Abu Wail ne, in se Abu Maysarah ne aur in se Abdullah bin Masood razi Allahu anhu ne bayan kiya ke main ne poochha: ya Rasool Allah! Kaun sa gunah sab se bada hai. Farmaya yeh ke tum Allah ka kisi ko shareek banao, haalan-ke usi ne tumhein paida kiya hai. Main ne poochha: is ke baad? Farmaya yeh ke tum apni aulad ko is khatre se maar dalo ke woh tumhare khane mein tumhare saath shareek ho gi. Main ne poochha: is ke baad? Farmaya yeh ke tum apne parosi ki biwi se zina karo, Yahya ne bayan kiya, in se Sufyan ne bayan kiya, in se Wasil ne bayan kiya, in se Abu Wail ne aur in se Abdullah bin Masood razi Allahu anhu ne ke main ne arz kiya: ya Rasool Allah! Phir isi hadees ki tarah bayan kiya. Amr ne kaha ke phir main ne is hadees ka zikr Abd-ur-Rahman bin Mahdi se kiya aur unhon ne hamase yeh hadees Sufyan Sawri se bayan ki, in se Aamash, Mansoor aur Wasil ne, in se Abu Wail ne aur in se Abu Maysarah ne. Abd-ur-Rahman bin Mahdi ne kaha ke tum is sanad ko jaane bhi do.