Aur Allah Paak ne Surah al-Baqarah mein farmaya talaq do baar hai . Is ke baad ya dastoor ke muwafiq aurat ko rakh lena chahiye ya achhi tarah rukhwat kar dena . Aur Abdullah bin Zubayr razi Allahu anhuma ne kaha agar kisi beemar shakhs ne apni aurat ko talaq e baain de di to woh apne khawand ki waris na ho gi aur Aamir Shabi ne kaha waris ho gi . (is ko Saeed bin Mansoor ne wasl kiya) aur Ibn Shubrumah (Kufa ke qazi) ne Shabi se kaha , kya woh aurat iddat ke baad doosre se nikah kar sakti hai ? Unhon ne kaha haan . Ibn Shubrumah ne kaha , phir agar is ka doosra khawand bhi mar jaye (to woh kya donon ki waris ho gi ?) is par Shabi ne apne fatway se ruju kiya .

Hum se Abdullah bin Yusuf Taneesi ne byaan kiya , kaha hum ko Imam Malik ne khabar di , unhein Ibn Shihab ne aur unhein Sahl bin Saad Saadi razi Allahu anhu ne khabar di ke Uwaimir al-Ajlaani razi Allahu anhu Aasim bin Adi Ansari razi Allahu anhu ke paas aaye aur in se kaha ke Ae Aasim! Tumhara kya khayal hai , agar koi apni biwi ke saath kisi ghair ko dekhe to kya usay woh qatl kar sakta hai ? Lekin phir tum qisas mein usay (shohar ko) bhi qatl kar do ge ya phir woh kya kare ga ? Aasim mere liye yeh masla Aap Rasool Allah salla Allahu alaihi wasallam se pooch dijiye . Aasim razi Allahu anhu ne jab Nabi Karim salla Allahu alaihi wasallam se yeh masla poocha to Nabi Karim salla Allahu alaihi wasallam ne is sawalat ko napasand farmaya aur is silsile mein Nabi Karim salla Allahu alaihi wasallam ke kalimat Aasim razi Allahu anhu par garan guzre aur jab woh wapas apne ghar aa gaye to Uwaimir razi Allahu anhu ne aa kar in se poocha ke bataiye Aap se Nabi Karim salla Allahu alaihi wasallam ne kya farmaya ? Aasim ne is par kaha tum ne mujhko aafat mein dala . Jo sawal tum ne poocha tha woh Nabi Karim salla Allahu alaihi wasallam ko nagowar guzra . Uwaimir ne kaha ke Allah ki qasam! Yeh masla Nabi Karim salla Allahu alaihi wasallam se poochay baghair mein baaz nahi aaoon ga . Chunanche woh rawana huay aur Nabi Karim salla Allahu alaihi wasallam ki khidmat mein pahunche . Nabi Karim salla Allahu alaihi wasallam logon ke darmiyan mein tashreef rakhte thay . Uwaimir razi Allahu anhu ne arz kiya: ya Rasool Allah! Agar koi shakhs apni biwi ke saath kisi ghair ko pa leta hai to Aap ka kya khayal hai ? Kya woh usay qatl kar de ? Lekin is surat mein Aap usay qatl kar dein ge ya phir usay kya karna chahiye ? Nabi Karim salla Allahu alaihi wasallam ne farmaya ke Allah Ta'ala ne tumhari biwi ke baare mein wahi nazil ki hai , is liye tum jao aur apni biwi ko bhi saath lao . Sahl ne byaan kiya ke phir donon (miyan biwi) ne liaan kiya . Logon ke saath main bhi Rasool Allah salla Allahu alaihi wasallam ke saath is waqt maujood tha . Liaan se jab donon farigh huay to Uwaimir razi Allahu anhu ne arz kiya: ya Rasool Allah! Agar is ke baad bhi main isay apne paas rakhoon to (is ka matlab yeh ho ga ke) main jhoota hoon . Chunanche unhon ne Nabi Karim salla Allahu alaihi wasallam ke hukm se pehle hi apni biwi ko teen talaq di . Ibn Shihab ne byaan kiya ke phir liaan karne wale ke liye yahi tariqa jaari ho gaya .