Hum se Yahya bin Jafar ne byaan kiya , kaha hum ko Abdur Razzaq bin Hammam ne khabar di , unhein Ibn Jurayj ne khabar di , kaha ke mujhe Ibn Shihab ne liaan ke baare mein aur yeh ke shariat ki taraf se is ka sunnat tariqa kiya hai , khabar di Bani Sa'dah ke Sahl bin Saad razi Allahu anhu ne , unhon ne byaan kiya ke qabila Ansar ke ek sahabi Rasool Allah salla Allahu alaihi wasallam ki khidmat mein hazir huay aur arz kiya: ya Rasool Allah! Is shakhs ke mutalliq Aap ka kiya irshad hai jo apni biwi ke saath kisi ghair mard ko dekhe , kiya woh usay qatl kar de ya usay kiya karna chahiye ? Unhi ke baare mein Allah Ta'ala ne Quran Majeed ki woh aayat nazil ki jis mein liaan karne walon ke liye tafseelaat byaan hui hain . Nabi Karim salla Allahu alaihi wasallam ne in se farmaya ke Allah Ta'ala ne tumhari biwi ke baare mein faisla kar diya hai . Byaan kiya ke phir donon ne masjid mein liaan kiya , main is waqt wahan maujood thu . Jab donon liaan se farigh huay to Ansari sahabi ne arz kiya: ya Rasool Allah! Agar ab bhi main isay apne nikah mein rakhoon to is ka matlab yeh ho ga ke main ne is par jhooti tohmat lagayi ku . Chunanche liaan se farigh hone ke baad unhon ne Nabi Karim salla Allahu alaihi wasallam ke hukm se pehle hi unhein teen talaqein de dein . Nabi Karim salla Allahu alaihi wasallam ki maujoodgi mein hi unhein juda kar diya . (Sahl ne ya Ibn Shihab ne) kaha ke har liaan karne wale miyan biwi ke darmiyan yahi judayi ka sunnat tariqa muqarrar hua . Ibn Jurayj ne byaan kiya , in se Ibn Shihab ne byaan kiya ke in ke baad shariat ki taraf se tariqa yeh mutayyan hua ke do liaan karne walon ke darmiyan tafreeq kara di jaya kare . Aur woh aurat hamila thi . Aur in ka beta apni maan ki taraf mansoob kiya jata thu . Byaan kiya ke phir aaisi aurat ke mirath ke baare mein bhi yeh tariqa shariat ki taraf se muqarrar ho gaya ke bacha is ka waris ho ga aur woh bacha ki waris ho gi . Is ke mutabiq jo Allah Ta'ala ne wirasat ke silsila mein farz kiya hai . Ibn Jurayj ne byaan kiya , in se Ibn Shihab ne aur in se Sahl bin Saad Saadi razi Allahu anhu ne , isi hadees mein ke Nabi Karim salla Allahu alaihi wasallam ne farmaya tha ke agar (liaan karne wali khatoon) is ne surkh aur pasta-qad bacha jana jaise wahra to main samajhoon ga ke aurat hi sachi hai aur is ke shohar ne is par jhooti tohmat lagayi hai lekin agar kala , bari aankhon wala aur bare sareenon wala bacha jana to main samajhoon ga ke shohar ne is ke mutalliq sach kaha tha . (aurat jhooti hai) jab bacha paida hua to woh buri shakal ka tha (yani is mard ki surat par jis se woh bad-naam hui thi) .