Sufyan bin Uyaynah ne kaha «saba taraa'iqa» se saaton aasman murad hain . «laha saabiquna» yani un ki qismat mein (roz e azal se) sa'adat aur naik bakhti likh di gayi . «wajilatun» darne wale . Ibn Abbas ne kaha «hayhaata hayhaata» ka maani door hai door hai . «fas'alil aaddeena» yani ginne wale farishton se (jo aamal ka hisab karte hain) pooch lo . «lanaakiboona» seedhi raah se murr jaane wale . «kaalihoona» tursh-ru , bad-shakal munh banane wale . Auron ne kaha «sulalatun» se murad bacha aur nutfa hai . «jinnatun» aur «junoonun» donon ka ek hi maani hai yani deewangi , baolapan . «ghusa'un» phain aur aaisi cheez jo pani par tair aaye aur kaam na aaye (balkay phenk diya jaye) . «yaja'roona» aawaz buland karein ge jaise gaye takleef ke waqt nikalti hai . «ala aqabikum» Arab log bolte hain «raja-a ala aqabayhi» yani peeth pher kar chal diya . «saamiran» , «samarun» se nikla hai is ki jama «summaarun» hai , yahan «saamiran» jama ke ma'non mein hai (yani raat ko gup shup karne wale) . «tus-haroona» jadoo se andhe ho rahe hain .

«min khilaalihi» ka maani baadal ke pardon ke beech mein se . «sana barqihi» is ki bijli ki roshni . «muz-ineena» , «muz-inun» ki jama hai yani aajzi karne wala . «ashtatan» aur «shatta» aur «shataatun» aur «shattun» sab ke ek hi maani hain (yani alag alag) aur Ibn Abbas razi Allahu anhuma ne kaha «suratun anzalnaha» ka maani hum ne is ko khol kar byaan kiya ke suraton ke majmua ki wajah se Quran ka naam para aur Surah ko Surah is wajah se kehte hain ke woh doosri Surah se alaihda hoti hai phir jab ek Surah doosri ke qareeb kar di gayi to majmua ko Quran kehne lage , (to yeh «qarnun» se nikla hai) aur Saad bin Ayadh Sumali ne kaha (is ko Ibn Shaheen ne wasal kiya) . «mishkaatun» kehte hain taaq ko yeh Habshi zaban ka lafz hai . Aur yeh jo Surah Qiyamah mein farmaya hum par is ka jama karna aur «qur-aanan» karna hai to «qur-aanan» se is ka jorrna aur ek tukray se doosra tukra milana murad hai . Phir farmaya «fa-izha qara'naahu fattabi qur-aanahu» yani jab hum is ko jorr dein aur murattab kar dein to is majmua ki pairwi kar yani is mein jis baat ka hukm hai usay baja la aur jis ki Allah ne mamanat ki hai is se baaz reh aur Arab log kehte hain is ke shairon ka Quran nahi hai . Yani koi majmua nahi hai aur «qur-aanan» ko «furqaanan» bhi kehte hain kyunke woh haq aur baatil ko juda karta hai aur aurat ke haq mein kehte hain «ma qara'at bisalin qattu» yani is ne apne pait mein bacha kabhi nahi rakkha aur kaha «faradnaha» tashdeed se to maani yeh ho ga hum ne is mein mukhtalif faraiz nazil kiye aur jis ne «faradnaha» takhfeef se parha hai to maani yeh ho ga hum ne tum par aur jo log Qayamat tak tumhare baad aayein ge un par farz kiya . Mujahid ne kaha «awit-tif-lillazheena lam yazhharu» se woh kam-sin bache murad hain jo kam-sini ki wajah se auraton ki sharmgah ya jima se waqif nahi hain aur Shabi ne kaha «ghayri ulil irbati» se woh mard murad hain jin ko auraton ki ihtiyaj na ho . Aur Taoos ne kaha (is ko Abdur Razzaq ne wasal kiya) woh ahmaq murad hai jis ko auraton ka khayal na ho aur Mujahid ne kaha (is ko Tabari ne wasal kiya) jin ko apne pait ki dhun lagi ho un se yeh darr na ho ke auraton ko hath lagayein ge .

Hum se Ishaq bin Mansoor ne byaan kiya , kaha hum se Muhammad bin Yusuf Faryabi ne , kaha hum se Imam Awzai ne , kaha ke mujh se Zuhri ne byaan kiya . Un se Sahl bin Saad ne byaan kiya ke Uwaymir bin Harith bin Zayd bin Jadd bin Ajlaan Aasim bin Adi ke paas aaye . Aasim Bani Ajlaan ke sardar thay . Unhon ne Aap se kaha ke Aap logon ka ek aaisi shakhs ke baare mein kya khayal hai jo apni biwi ke saath kisi ghair mard ko pa leta hai kya woh usay qatl kar de ? Lekin tum phir usay qisas mein qatl kar do ge! Aakhir aaisi surat mein insan kya tariqa ikhtiyar kare ? Rasool Allah salla Allahu alaihi wasallam se is ke mutalliq pooch ke mujhe bataiye . Chunanche Aasim , Nabi Karim salla Allahu alaihi wasallam ki khidmat mein hazir huay aur arz kiya: ya Rasool Allah! (surat e mazkoora mein khawand kya kare) Nabi Karim salla Allahu alaihi wasallam ne in masail (mein sawal o jawab) ko napasand farmaya . Jab Uwaymir ne in se poocha to unhon ne bata diya ke Rasool Allah salla Allahu alaihi wasallam ne in masail ko napasand farmaya hai . Uwaymir ne in se kaha ke wallah main khud Nabi Karim salla Allahu alaihi wasallam se usay poochoon ga . Chunanche woh Nabi Karim salla Allahu alaihi wasallam ki khidmat mein hazir huay aur arz kiya . Ya Rasool Allah! Ek shakhs apni biwi ke saath ek ghair mard ko dekhta hai kya woh is ko qatl kar de ? Lekin phir Aap qisas mein is ko qatl karein ge . Aaisi surat mein is ko kya karna chahiye ? Nabi Karim salla Allahu alaihi wasallam ne farmaya ke Allah Ta'ala ne tumhare aur tumhari biwi ke baare mein Quran ki aayat utari hai . Phir Aap ne unhein Quran ke bataye huay tariqa ke mutabiq liaan ka hukm diya . Aur Uwaymir ne apni biwi ke saath liaan kiya , phir unhon ne kaha: ya Rasool Allah! Agar main apni biwi ko roke rakkhoon to main zhaalim hoon ga . Is liye Uwaymir ne usay talaq de di . Is ke liaan ke baad miyaan biwi mein judayi ka tariqa jaari ho gaya . Nabi Karim salla Allahu alaihi wasallam ne phir farmaya ke dekhte raho agar is aurat ke kala , bahut kaali putliyon wala , bhaari sureen aur bhari hui pindliyon wala bacha paida ho to mera khayal hai ke Uwaymir ne ilzam ghalat nahi lagaya hai . Lekin agar surkh surkh girgat jaisa paida ho to mera khayal hai ke Uwaymir ne ghalat ilzam lagaya hai . Is ke baad in aurat ke jo bacha paida hua woh unhi sifaat ke mutabiq tha jo Nabi Karim salla Allahu alaihi wasallam ne byaan ki thien aur jis se Uwaymir ki tasdeeq hoti thi . Chunanche is larke ka nasab is ki maan ki taraf rakkha gaya .