Mujh se Muhammad bin Nasr Nayshapuri ne byaan kiya , kaha hum se Ahmad bin Abi Shuayb ne byaan kiya , kaha hum se Musa bin Ayan ne byaan kiya , kaha hum se Ishaq bin Rashid ne byaan kiya , un se Zuhri ne byaan kiya , kaha ke mujhe Abdur Rahman bin Abdullah bin Kabb bin Malik ne khabar di , un se un ke walid Abdullah ne byaan kiya ke main ne apne walid Kabb bin Malik razi Allahu anhu se suna . Woh in teen sahabah mein se thay jin ki tauba qabool ki gayi thi . Unhon ne byaan kiya ke do ghazwon , Ghazwa e Usrat (yani Ghazwa Tabook) aur Ghazwa Badr ke siwa aur kisi ghazwa mein kabhi main Rasool Allah salla Allahu alaihi wasallam ke saath jaane se nahi ruka tha . Unhon ne byaan kiya chasht ke waqt jab Rasool Allah salla Allahu alaihi wasallam (ghazwa se wapas tashreef laye) to main ne sach bolne ka pukhta irada kar liya aur Aap ka safar se wapas aane mein mamool yeh tha ke chasht ke waqt hi Aap (Madinah) pahunchte thay aur sab se pehle masjid mein tashreef le jate aur do rakat namaz parhte (bahar-haal) Aap salla Allahu alaihi wasallam ne mujh se aur meri tarah uzr byaan karne wale do aur sahabah se doosre sahabah ko baat cheet karne se mana kar diya . Hamare alawa aur bhi bahut se log (jo zahir mein Musalman thay) is ghazwe mein shareek nahi huay lekin Aap ne un mein se kisi se bhi baat cheet ki mamanat nahi ki thi . Chunanche logon ne hum se baat cheet karna chhor diya . Main isi halat mein thehra raha . Muamla bahut ttool pakarta ja raha tha . Idhar meri nazar mein sab se ahem muamla yeh tha ke agar kahin (is arsa mein) main mar gaya to Aap salla Allahu alaihi wasallam mujh par namaz e janaza nahi parhayein ge ya Aap salla Allahu alaihi wasallam ki wafat ho jaye to afsos logon ka yahi tarz e amal mere saath phir hamesha ke liye baqi reh jaye ga , na mujh se koi guftagu kare ga aur na mujh par namaz e janaza parhe ga . Aakhir Allah Ta'ala ne hamari tauba ki bisharat Aap salla Allahu alaihi wasallam par is waqt nazil ki jab raat ka aakhri tihayi hissa baqi reh gaya tha . Aap salla Allahu alaihi wasallam is waqt Umm Salamah razi Allahu anha ke ghar mein tashreef rakhte thay . Umm Salamah razi Allahu anha ka mujh par bara ihsan o karam tha aur woh meri madad kiya karti thien . Aap salla Allahu alaihi wasallam ne farmaya ke Umm Salamah! Kabb ki tauba qabool ho gayi . Unhon ne arz kiya . Phir main un ke yahan kisi ko bhej kar yeh khush-khabri na pahunchwa doon ? Aap salla Allahu alaihi wasallam ne farmaya ke yeh khabar sunte hi log jama ho jayein ge aur saari raat tumhein sone nahi dein ge . Chunanche Nabi Karim salla Allahu alaihi wasallam ne Fajr ki namaz parhne ke baad bataya ke Allah ne hamari tauba qabool kar li hai . Nabi Karim salla Allahu alaihi wasallam ne jab yeh khush-khabri sunayi to Aap ka chehra mubarak munawwar ho gaya jaise chaand ka tukra ho aur (ghazwa mein na shareek hone wale doosre logon se) jinon ne mazrat ki thi aur un ki mazrat qabool bhi ho gayi thi . Hum teen sahabah ka muamla bilkul mukhtalif tha ke Allah Ta'ala ne hamari tauba qabool hone ke mutalliq wahi nazil ki , lekin jab in doosre ghazwa mein shareek na hone wale logon ka zikr kiya , jinon ne Aap salla Allahu alaihi wasallam ke samne jhoot bola tha aur jhooti mazrat ki thi to is darja burayi ke saath kiya ke kisi ka bhi itni burayi ke saath zikr na kiya ho ga . Allah Ta'ala ne farmaya «yatizhiroona ilaykum izha raja'tum ilayhim qul la tatizhiroo lan numina lakum qad nabba'anallahu min akhbarikum wa sayarallahu amalakum wa rasooluhu» ke ”yeh log tumhare sab ke samne uzr pesh karein ge , jab tum un ke paas wapas jao ge to Aap keh dein ke bahane na banao hum hargiz tumhari baat na maanein ge! Beshak hamain Allah tumhari khabar de chuka hai aur anqareeb Allah aur us ke Rasool tumhara amal dekh lein ge .“ Aakhir aayat tak .