Hum se Ahmad bin Salih ne bayan kiya, kaha hum se Ibn Wahb ne bayan kiya, kaha mujhko Yunus ne khabar di, unhein Ibn Shihab ne, kaha mujhe Abd-ul-Rahman bin Abdullah bin Kabb bin Malik ne khabar di, jab Kabb razi Allahu anhu nabina ho gaye thay to in ki aulad mein ek yahi kahin aane jaane mein in ke saath rehte thay. Unhon ne bayan kiya ke main ne Kabb bin Malik razi Allahu anhu se in ke waqia aur aayat «alat-salaasatil-lazheena khul-lifoo» ke silsila mein suna, unhon ne apni hadees ke aakhir mein kaha ke (main ne Nabi Karim salla Allahu alaihi wasallam ke samne yeh pesh-kash ki ke) apni tauba ki khushi mein main apna maal Allah aur is ke Rasool ke deen ki khidmat mein sadqa kar doon. Nabi Karim salla Allahu alaihi wasallam ne is par farmaya ke apna kuch maal apne paas hi rakkho, yeh tumhare liye behtar hai.