Hum se Abu al-Yaman ne byaan kiya , kaha hum ko Shuayb ne khabar di , un se Zuhri ne byaan kiya , kaha mujhe Ubaydullah bin Sabbaq ne khabar di aur un se Zayd bin Sabit Ansari razi Allahu anhu ne jo katib e wahi thay , byaan kiya ke jab (11 Hijri) mein Yamama ki larayi mein (jo Musaylamah Kazzab se hui thi) bahut se sahabah maarey gaye to Abu Bakr Siddique razi Allahu anhu ne mujhe bulaya , un ke paas Umar razi Allahu anhu bhi maujood thay . Unhon ne mujh se kaha , Umar razi Allahu anhu mere paas aaye aur kaha ke Jang e Yamama mein bahut zyada Musalman shaheed ho gaye hain aur mujhe khatra hai ke (kuffar ke saath) laraiyon mein yunhi Quran ke ulema aur qaari shaheed hon ge aur is tarah bahut sa Quran zaya ho jaye ga . Ab to ek hi surat hai ke Aap Quran ko ek jagah jama kara dein aur meri rai to yeh hai ke Aap zaroor Quran ko jama kara dein . Abu Bakr razi Allahu anhu ne kaha ke is par main ne Umar razi Allahu anhu se kaha , aisa kaam main kis tarah kar sakta hoon jo khud Rasool Allah salla Allahu alaihi wasallam ne nahi kiya tha . Umar razi Allahu anhu ne kaha , Allah ki qasam! Yeh to mahz ek naik kaam hai . Is ke baad Umar razi Allahu anhu mujh se is muamla par baat karte rahe aur aakhir mein Allah Ta'ala ne is khidmat ke liye mera bhi seena khol diya aur meri bhi rai wahi ho gayi jo Umar razi Allahu anhu ki thi . Zayd bin Sabit razi Allahu anhu ne byaan kiya ke Umar razi Allahu anhu wahin khamosh baithe huay thay . Phir Abu Bakr razi Allahu anhu ne kaha: tum jawan aur samajhdar ho hamain tum par kisi qism ka shubha bhi nahi aur tum Nabi Karim salla Allahu alaihi wasallam ki wahi likha bhi karte thay , is liye tum hi Quran Majeed ko jaba-ja se talash kar ke usay jama kar do . Allah ki qasam! Ke agar Abu Bakr razi Allahu anhu mujh se koi pahar utha ke le jaane ke liye kehte to yeh mere liye itna bhaari nahi tha jitna Quran ki tarteeb ka hukm . Main ne arz kiya Aap log ek aise kaam ke karne par kis tarah aamada ho gaye , jise Rasool Allah salla Allahu alaihi wasallam ne nahi kiya tha to Abu Bakr razi Allahu anhu ne kaha: Allah ki qasam! Yeh ek naik kaam hai . Phir main un se is masla par guftagu karta raha , yahan tak ke Allah Ta'ala ne is khidmat ke liye mera bhi seena khol diya . Jis tarah Abu Bakr o Umar razi Allahu anhuma ka seena khola tha . Chunanche main utha aur main ne khaal , haddi aur khajoor ki shakhon se (jin par Quran Majeed likha hua tha , is daur ke rawaj ke mutabiq) Quran Majeed ko jama karna shuru kar diya aur logon ke (jo Quran ke hafiz thay) hafiza se bhi madad li aur Surah at-Tauba ki do aayatein Khuzaymah Ansari razi Allahu anhu ke paas mujhe milien . In ke alawa kisi ke paas mujhe nahi mili thi . (woh aayatein yeh thien) «laqad ja'akum rasoolum min anfusikum azeezun alayhi ma anittum hareesun alaykum» aakhir tak . Phir mus-haf jis mein Quran Majeed jama kiya gaya tha , Abu Bakr razi Allahu anhu ke paas raha , Aap ki wafat ke baad Umar razi Allahu anhu ke paas mahfooz raha , phir Aap ki wafat ke baad Aap ki sahib-zadi (Umm al-Momineen Hafsa razi Allahu anha ke paas mahfooz raha) . Shuayb ke saath is hadees ko Usman bin Amr aur Layth bin Saad ne bhi Yunus se , unhon ne Ibn Shihab se riwayat kiya , aur Layth ne kaha mujh se Abdur Rahman bin Khalid ne byaan kiya , unhon ne Ibn Shihab se riwayat kiya is mein Khuzaymah ke badle Abu Khuzaymah Ansari hai aur Musa ne Ibrahim se riwayat ki , kaha hum se Ibn Shihab ne byaan kiya , is riwayat mein bhi Abu Khuzaymah hai . Musa bin Ismail ke saath is hadees ko Yaqoob bin Ibrahim ne bhi apne walid Ibrahim bin Saad se riwayat kiya aur Abu Sabit Muhammad bin Ubaydullah Madini ne , kaha hum se Ibrahim ne byaan kiya is riwayat mein shak ke saath Khuzaymah ya Abu Khuzaymah mazkoor hai .