Aur jo cheezein napi ya toli jati hain takhmine se bantna ya mutthi bhar bhar kar taqseem kar lena, kyunke Musalmanon ne is mein koi muzaiqa nahi khayal kiya ke mushtarka zad-e-safar (ki mukhtalif cheezon mein se) koi shareek ek cheez kha le aur doosra doosri cheez, isi tarah sone chandi ke badal bin tole dher laga kar bantne mein, isi tarah do do khajoor utha kar khane mein
.

Hum se Abdullah Bin Yusuf ne bayan kiya, kaha hum ko Imam Malik ne khabar di, unhein Wahb Bin Kaisan ne aur unhein Jabir Bin Abdullah (Radi Allahu Anhuma) ne ke Rasul Allah (Sallallahu Alaihi Wasallam) ne (Rajab 7H mein) sahil-e-behar ki taraf ek lashkar bheja. Aur is ka ameer Abu Ubaidah Bin Jarrah (Radi Allahu Anhu) ko banaya. Faujiyon ki tadad teen so thi aur mein bhi un mein shareek tha. Hum nikle aur abhi raste hi mein thay ke tosha khatam ho gaya. Abu Ubaidah (Radi Allahu Anhu) ne hukm diya ke tamam fauji apne toshe (jo kuch bhi baqi reh gaye hon) ek jagah jama kar dein. Sab kuch jama karne ke baad khajoorn ke kul do thaile ho sake aur rozana hamein isi mein se thori thori khajoor khane ke liye milne lagi. Jab is ka bhi aksar hissa khatam ho gaya to hamein sirf ek ek khajoor milti rahi. Mein (Wahb Bin Kaisan) ne Jabir (Radi Allahu Anhu) se kaha bhala ek khajoor se kya hota hoga? Unhon ne batlaya ke is ki qadar hamein is waqt maloom hui jab wo bhi khatam ho gayi thi. Unhon ne bayan kiya ke aakhir hum samandar tak pahunch gaye. Ittefaq se samandar mein hamein ek aisi machli mil gayi jo (apne jism mein) pahar ki tarah maloom hoti thi. Sara lashkar is machli ko athara raaton tak khata raha. Phir Abu Ubaidah (Radi Allahu Anhu) ne is ki donon pasliyon ko khara karne ka hukm diya. Is ke baad onton ko un ke tale se chalne ka hukm diya. Aur wo in pasliyon ke neeche se ho kar guzre, lekin ont ne in ko chhuwa tak nahi
.