Hum se Musaddad bin Musarhad ne byaan kiya , kaha hum se Yahya bin Saeed Qattan ne byaan kiya , un se Ibn Jareer ne byaan kiya , unhein Amr bin Dinar ne khabar di aur unhon ne Jabir bin Abdullah Ansari razi Allahu anhuma se suna , unhon ne byaan kiya ke hum patton ki fauj mein shareek thay . Abu Ubaydah razi Allahu anhu hamare ameer thay . Phir hamain shiddat se bhook lagi , aakhir samundar ne ek aisi murdah machhli bahar phenki ke hum ne waisi machhli pehle kabhi nahi dekhi thi . Isay Ambar kehte thay . Woh machhli hum ne pandrah din tak khayi . Phir Abu Ubaydah razi Allahu anhu ne is ki haddi khari karwa di to oont ka sawar is ke neeche se guzar gaya . (Ibn Jareer ne byaan kiya ke) Phir mujhe Abu al-Zubayr ne khabar di aur unhon ne Jabir razi Allahu anhu se suna , unhon ne byaan kiya ke Abu Ubaydah razi Allahu anhu ne kaha is machhli ko khao phir jab hum Madinah laut kar aaye to hum ne is ka zikr Nabi Karim salla Allahu alaihi wasallam se kiya , Aap salla Allahu alaihi wasallam ne farmaya ke woh rozi khao jo Allah Ta'ala ne tumhare liye bheji hai . Agar tumhare paas is mein se kuch bachi ho to mujhe bhi khilao . Chunanche ek aadmi ne is ka gosht la kar Aap ki khidmat mein pesh kiya aur Aap ne bhi isay tanawul farmaya .