Hum se Abdullah bin Muhammad Musandi ne bayan kiya, kaha hum ko Sufyan Sawri ne khabar di, in se Amr bin Dinar ne, unhon ne Jabir razi Allahu anhu se suna, unhon ne bayan kiya ke Nabi Karim salla Allahu alaihi wasallam ne teen sau sawar rawana kiye. Hamare ameer Abu Ubaidah razi Allahu anhu thay. Hamain Quraysh ke tijarati qafila ki naqal o harakat par nazar rakhni thi phir (khana khatam ho jaane ki wajah se) hum sakht bhook aur faqa ki halat mein thay. Naubat yahan tak pahunch gayi thi ke hum Salam ke patte (khabt) kha kar waqt guzarte thay. Isi liye is muhim ka naam ”Jaish-ul-Khabt“ par gaya aur samundar ne ek machhli bahar daal di. Jis ka naam Anbar tha. Hum ne usay aadhe mahina tak khaya aur is ki charbi tail ke taur par apne jism par mali jis se hamare jism tandurust ho gaye. Bayan kiya ke phir Abu Ubaidullah razi Allahu anhu ne is ki ek pasli ki haddi le kar khari ki to ek sawar is ke neeche se guzar gaya. Hamare saath ek sahab (Qays bin Saad bin Ubadah razi Allahu anhuma) thay jab hum bahut zyada bhookay huay to unhon ne yake baad digar teen oont zibah kar diye. Baad mein Abu Ubaidah razi Allahu anhu ne unhein is se mana kar diya.