Hum se Ali bin Abdullah Madini ne byaan kiya , kaha hum se Sufyan bin Uyaynah ne byaan kiya , kaha ke hum ne Amr bin Dinar se jo yaad kiya woh yeh hai ke unhon ne byaan kiya ke main ne Jabir bin Abdullah razi Allahu anhuma se suna , unhon ne byaan kiya ke hamain Rasool Allah salla Allahu alaihi wasallam ne teen sau sawaron ke saath bheja aur hamara ameer Abu Ubaydah bin Jarrah razi Allahu anhu ko banaya . Taake hum Quraysh ke qafila e tijarat ki talash mein rahein . Sahil e samundar par hum pandrah din tak parao daale rahe . Hamain (is safar mein) bari sakht bhook aur faaqe ka samna karna para , yahan tak naubat pahunchi ke hum ne babool ke patte kha kar waqt guzara . Isi liye is fauj ka laqab patton ki fauj ho gaya . Phir ittifaq se samundar ne hamare liye ek machhli jaisa janwar sahil par phenk diya , is ka naam Ambar tha , hum ne is ko pandrah din tak khaya aur is ki charbi ko tail ke taur par (apne jismon par) mala . Is se hamare badan ki taqat o quwwat phir laut aayi . Baad mein Abu Ubaydah razi Allahu anhu ne is ki ek pasli nikal kar khari karwayi aur jo lashkar mein sab se lambe aadmi thay , unhein is ke neeche se guzara . Sufyan bin Uyaynah ne ek martaba is tarah byaan kiya ke ek pasli nikal kar khari kar di aur ek shakhs ko oont par sawar karaya woh is ke neeche se nikal gaya . Jabir razi Allahu anhu ne byaan kiya ke lashkar ke ek aadmi ne pehle teen oont zibah kiye phir teen oont zibah kiye aur jab teesri martaba teen oont zibah kiye to Abu Ubaydah ne unhein rok diya kyunke agar sab oont zibah kar dete to safar kaise hota aur Amr bin Dinar ne byaan kiya ke hum ko Abu Salih Zhakwan ne khabar di ke Qays bin Saad razi Allahu anhu ne (wapas aa kar) apne walid (Saad bin Ubadah razi Allahu anhu) se kaha ke main bhi lashkar mein tha jab logon ko bhook lagi to Abu Ubaydah razi Allahu anhu ne kaha ke oont zibah karo , Qays bin Saad razi Allahu anhu ne byaan kiya ke main ne zibah kar diya kaha ke phir bhookay huay to unhon ne kaha ke oont zibah karo , main ne zibah kiya , byaan kiya ke jab phir bhookay huay to kaha ke oont zibah karo , main ne zibah kiya , phir bhookay huay to kaha ke oont zibah karo , phir Qays razi Allahu anhu ne byaan kiya ke is martaba mujhe ameer e lashkar ki taraf se mana kar diya gaya .