Hum se Bishr Bin Marhoom ne bayan kiya, kaha ke hum se Hatim Bin Ismail ne bayan kiya, un se Yazid Bin Abi Ubaidah ne aur un se Salama (Radi Allahu Anhu) ne bayan kiya ke (Ghazwa-e-Hawazin mein) logon ke toshe khatam ho gaye aur faqr-o-mohtaji aa gayi, to log Nabi Kareem (Sallallahu Alaihi Wasallam) ki khidmat mein hazir hue. Apne onton ko zibah karne ki ijazat lene (taake unhein ke gosht se pait bhar sakein) Aap (Sallallahu Alaihi Wasallam) ne unhein ijazat de di. Raste mein Umar (Radi Allahu Anhu) ki mulaqat un se ho gayi to unhein bhi in logon ne itla di. Umar (Radi Allahu Anhu) ne kaha onton ko kaat dalo ge to phir tum kaise zinda raho ge. Chunanchay aap Rasul Allah (Sallallahu Alaihi Wasallam) ki khidmat mein hazir hue aur kaha, Ya Rasul Allah! agar unhon ne ont bhi zibah kar liye to phir ye log kaise zinda rahein ge. Rasul Allah (Sallallahu Alaihi Wasallam) ne farmaya ke accha, tamam logon mein elan kar do ke un ke paas jo kuch toshe bach rahe hain wo le kar yahan aa jayein. Is ke liye ek chamre ka dastar khawan bicha diya gaya. Aur logon ne toshe isi dastar khawan par la kar rakh diye. Is ke baad Rasul Allah (Sallallahu Alaihi Wasallam) uthe aur is mein barkat ki dua farmai. Ab Aap (Sallallahu Alaihi Wasallam) ne phir sab logon ko apne apne bartanon ke sath bulaya aur sab ne donon hathon se toshe apne bartanon mein bhar liye. Jab sab log bhar chuke to Rasul Allah (Sallallahu Alaihi Wasallam) ne farmaya "Mein gawahi deta hoon ke Allah ke siwa koi mabood nahi aur ye ke mein Allah ka sacha Rasul hoon"
.