Hum se Bishr Bin Marhoom ne bayan kiya, kaha hum se Hatim Bin Ismail ne bayan kiya, un se Yazid Bin Abi Ubaid ne aur un se Salama (Radi Allahu Anhu) ne bayan kiya ke jab logon ke paas zad-e-raah khatam hone laga to Nabi Kareem (Sallallahu Alaihi Wasallam) ki khidmat mein log apne oont zibah karne ki ijazat lene hazir hue. Aap (Sallallahu Alaihi Wasallam) ne ijazat de di. Itne mein Umar (Radi Allahu Anhu) se un ki mulaqat hui. Is ijazat ki itla unhein bhi un logon ne di. Umar (Radi Allahu Anhu) ne sun kar kaha, in oonton ke baad phir tumhare paas baqi kya reh jaye ga (kyunke unhein par sawar ho kar itni door daraz ki masafat bhi to tay karni thi) is ke baad Umar (Radi Allahu Anhu) Nabi Kareem (Sallallahu Alaihi Wasallam) ki khidmat mein hazir hue aur arz kiya, ya Rasul Allah! Log agar apne oont bhi zibah kar dein ge. To phir is ke baad un ke paas baqi kya reh jaye ga? Aap (Sallallahu Alaihi Wasallam) ne farmaya: phir logon mein elan kar do ke (oonton ko zibah karne ke bajaye) apna bacha kucha tosha le kar yahan aa jayein. (Sab logon ne jo kuch bhi un ke paas khane ki cheez baqi bach gayi thi, Aap (Sallallahu Alaihi Wasallam) ke samne la kar rakh di) Aap (Sallallahu Alaihi Wasallam) ne dua farmai aur is mein barkat hui. Phir sab ko un ke bartanon ke sath Aap ne bulaya. Sab ne bhar-bhar kar is mein se liya. Aur jab sab log farigh ho gaye to Rasul Allah (Sallallahu Alaihi Wasallam) ne farmaya ke mein gawahi deta hoon ke Allah Ta'ala ke siwa aur koi mabood nahi aur mein Allah ka Rasul hoon
.