Hum se Muslim Bin Ibrahim ne bayan kiya, kaha hum se Jarir Bin Hazim ne bayan kiya, un se Muhammad Bin Sirin ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya, Bani Israel mein ek sahab thay, jin ka naam Juraij tha. Wo namaz parh rahe thay ke un ki walda aaein aur unhein pukara. Unhon ne jawab nahi diya. Sochte rahe ke jawab doon ya namaz parhoon. Phir wo dubara aaein aur (ghusse mein) bad-dua kar gayein, Ae Allah! ise maut na aaye jab tak kisi badkar aurat ka munh na dekh le. Juraij apne ibadat khane mein rehte thay. Ek aurat ne (jo Juraij ke ibadat khane ke paas apni maweshi charaya karti thi aur fahisha thi) kaha ke Juraij ko fitna mein dale baghair na rahoon gi. Chunanchay wo un ke samne aayi aur guftagu karni chahi, lekin unhon ne munh pher liya. Phir wo ek charwahe ke paas gayi aur apne jism ko us ke qabu mein de diya. Aakhir larka paida hua. Aur is aurat ne ilzam lagaya ke ye Juraij ka larka hai. Qoum ke log Juraij ke yahan aaye aur un ka ibadat khana tor diya. Unhein bahar nikala aur galiyan dein. Lekin Juraij ne wazu kiya aur namaz parh kar is larke ke paas aaye. Unhon ne us se poocha. Bacche! tumhara baap kaun hai? Baccha (Allah ke hukm se) bol para ke charwaha! (Qoum khush ho gayi aur) kaha ke hum aap ke liye sone ka ibadat khana banwa dein. Juraij ne kaha ke mera ghar to mitti hi se bane ga
.