Lafz «intabazat» «nabaza» se nikla hai jaise Yunus (Alaihis Salam) ke qisse mein farmaya «nabaznahu» yani hum ne un ko daal diya. «sharqiyyan» poorab rukh (yani masjid se ya un ke ghar se poorab ki taraf) «fa-aja-aha» ke maani is ko lachaar aur be-qarar kar diya. «tusaqitu» gire ga. «qasiyyan» door. «fariyyan» bara ya bura. «nisyan» nachiz. Abdullah Bin Abbas (Radi Allahu Anhuma) ne aisa hi kaha. Doosron ne kaha «nisyan» kehte hain haqeer cheez ko (ye «fatihah» Suddi se manqool hai) Abu Wail ne kaha ke Maryam ye samjhi ke parhezgar wohi hota hai jo aqlmand hota hai. Jab unhon ne kaha (Jibrail (Alaihis Salam) ko ek jawan mard ki shakal mein dekh kar) agar tu parhezgar hai Allah se darta hai. Wakee ne Israel se naqal kiya unhon ne Abu Ishaq se unhon ne Bara Bin Azib se «sariyyan» Suriyani zaban mein chhoti nehar ko kehte hain

Hum se Muslim Bin Ibrahim ne bayan kiya kaha hum se Jarir Bin Hazim ne bayan kiya un se Muhammad Bin Sireen ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "God mein teen bacchon ke siwa aur kisi ne baat nahi ki. Awwal Isa (Alaihis Salam) (doosre ka waqia ye hai ke) Bani Israel mein ek buzurg thay naam Juraij tha. Wo namaz parh rahe thay ke un ki maan ne unhein pukara. Unhon ne (apne dil mein) kaha ke mein walida ka jawab doon ya namaz parhta rahoon? Is par un ki walida ne (ghussa ho kar) bad-dua ki: Ae Allah! Is waqt tak ise mout na aaye jab tak ye zaniya auraton ka munh na dekh le. Juraij apne ibadat khane mein raha karte thay. Ek martaba un ke samne ek fahisha aurat aayi aur un se bad-kari chahi lekin unhon ne (is ki khwahish poori karne se) inkar kiya. Phir ek charwahe ke pas aayi aur ise apne upar qaboo de diya is se ek baccha paida hua. Aur is ne un par ye tuhmat dhari ke ye Juraij ka baccha hai. Un ki qoum ke log aaye aur un ka ibadat khana tor diya unhein neeche utar kar laye aur unhein gaaliyan dein. Phir unhon ne wazu kar ke namaz parhi is ke baad bacche ke pas aaye aur is se poocha ke tera baap kaun hai? Baccha (Allah ke hukam se) bol para ke charwaha hai is par (un ki qoum sharminda hui aur) kaha hum aap ka ibadat khana sone ka banayein ge. Lekin unhon ne kaha hargiz nahi mitti hi ka bane ga (teesra waqia) aur ek Bani Israel ki aurat thi apne bacche ko doodh pila rahi thi. Qareeb se ek sawar nihayat izzat wala aur khush posh guzra. Is aurat ne dua ki: Ae Allah! Mere bacche ko bhi isi jaisa bana de lekin baccha (Allah ke hukam se) bol para ke ae Allah! Mujhe is jaisa na banana. Phir is ke seene se lag kar doodh peene laga. Abu Hurairah (Radi Allahu Anhu) ne bayan kiya ke jaise mein is waqt bhi dekh raha hoon ke Nabi Kareem (Sallallahu Alaihi Wasallam) apni ungli choos rahe hain (bacche ke doodh peene ki kaifiyat batlate waqt) phir ek baandi is ke qareeb se le jayi gayi (jise is ke malik maar rahe thay) to is aurat ne dua ki ke ae Allah! Mere bacche ko is jaisa na banana. Bacche ne phir is ka pistan chor diya aur kaha ke ae Allah! Mujhe isi jaisa bana de. Is aurat ne poocha. Aisa tu kyun keh raha hai? Bacche ne kaha ke wo sawar zalimon mein se ek zalim shakhs tha aur is baandi se log keh rahe thay ke tum ne chori ki aur zina kiya halanke is ne kuch bhi nahi kiya tha."