Hum se Abul Waleed ne bayan kiya, kaha ke hum se Shuba ne bayan kiya, unhein Salama Bin Kuhail ne khabar di, kaha ke mein ne Abu Salama se suna, wo humare ghar mein Abu Hurairah (Radi Allahu Anhu) se hadees bayan kar rahe thay ke ek shakhs ne Rasul Allah (Sallallahu Alaihi Wasallam) se apne qarz ka taqaza kiya aur sakht sust kaha. Sahaba (Radi Allahu Anhum) ne is ko saza deni chahi to Aap (Sallallahu Alaihi Wasallam) ne farmaya ke ise kehne do. Sahab-e-haq ke liye kehne ka haq hota hai aur ise ek oont khareed kar day do. Logon ne arz kiya ke is ke oont se (jo us ne Aap ko qarz diya tha) acchi umar hi ka oont mil raha hai. Aap (Sallallahu Alaihi Wasallam) ne farmaya ke wahi khareed ke ise day do. Kyunke tum mein accha wahi hai jo qarz ada karne mein sab se accha ho. (Hadees aur baab ki mutabiqat zahir hai)
.