Aur Abdullah Bin Amr (Radi Allahu Anhuma) ne apne wakeel ko jo un se ghaib tha ye likha ke chhote bade un ke tamam ghar walon ki taraf se wo Sadaqah-e-Fitr nikal dein
.

Hum se Abu Nuaym Fadl Bin Dukain ne bayan kiya, kaha ke hum se Sufyan Sawri ne bayan kiya, un se Salama Bin Kuhail ne bayan kiya, un se Abu Salama ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) par ek shakhs ka ek khas umar ka oont qarz tha. Wo shakhs taqaza karne aya to Aap (Sallallahu Alaihi Wasallam) ne (apne Sahaba se) farmaya ke ada kar do. Sahaba (Radi Allahu Anhum) ne us umar ka oont talash kiya lekin nahi mila. Albatta is se ziyada umar ka (mil saka) Aap (Sallallahu Alaihi Wasallam) ne farmaya ke yahi unhein day do. Is par us shakhs ne kaha ke aap ne mujhe poora poora haq day diya. Allah Ta'ala aap ko bhi poora badla day. Phir Nabi Kareem (Sallallahu Alaihi Wasallam) ne farmaya ke tum mein sab se behtar wo log hain jo qarz waghairah ko poori tarah ada kar dete hain
.