Hum se Momil Bin Hisham ne bayan kiya, kaha ke hum se Ismail Bin Aliyyah ne bayan kiya, un se Ayub Sakhtiyani ne aur un se Hafsa Bint Sireen ne bayan kiya ke hum apni kunwari larkiyon ko bahar nikalne se rokte thay. Phir ek khatoon aayin aur Bani Khalaf ke mahal mein (jo Basre mein tha) thehereen. Unhon ne bayan kiya ke un ki behen (Umm-e-Atiya Radi Allahu Anha) Nabi Kareem (Sallallahu Alaihi Wasallam) ke ek sahabi ke ghar mein theen. Un ke shohar ne Nabi Kareem (Sallallahu Alaihi Wasallam) ke sath barah jihad kiye thay aur meri behen cheh jihadon mein un ke sath rahi theen. Wo bayan karti theen ke hum (maidan-e-jang mein) zakhamiyon ki marham patti karti theen aur mareezon ki timardari karti thi. Meri behen ne Rasul Allah (Sallallahu Alaihi Wasallam) se poocha ke agar hamare paas chadar na ho to kya koi haraj hai agar hum eidgah jaane ke liye bahar na niklein? Nabi Kareem (Sallallahu Alaihi Wasallam) ne farmaya, is ki saheli ko apni chadar ise urha deni chahiye aur phir Musalmanon ki dua aur naik kaamon mein shirkat karna chahiye. Phir jab Imam Atiya (Radi Allahu Anha) khud Basra aayin to mein ne un se bhi yahi poocha ya ye kaha ke hum ne un se poocha unhon ne bayan kiya Umm-e-Atiya (Radi Allahu Anha) jab bhi Rasul Allah (Sallallahu Alaihi Wasallam) ka zikr karteen to kehteen mere baap Aap par fida hon. Haan to mein ne un se poocha, kya aap ne Rasul Allah (Sallallahu Alaihi Wasallam) se is tarah suna hai? Unhon ne farmaya ke haan mere baap Aap par fida hon. Unhon ne kaha ke Rasul Allah (Sallallahu Alaihi Wasallam) ne farmaya ke kunwari larkiyan aur parda waliyan bhi bahar niklein ya ye farmaya ke parda wali doshizaon aur haiza auratein sab bahar niklein aur Musalmanon ki dua aur khair ke kaamon mein shirkat karein. Lekin haiza auratein namaz ki jagah se alag rahein. Mein ne kaha aur haiza bhi niklein? Unhon ne farmaya ke kya haiza aurat Arafat aur falan falan jagah nahi jati hain? (Phir eidgah hi jaane mein kya haraj hai)
.