Hum se Abu Ma'mar ne byaan kiya , unhon ne kaha ke hum se Abdul Waris ne byaan kiya , unhon ne kaha ke hum se Ayub Sakhtiyani ne Hafsa bin Sireen ke waasta se byaan kiya , unhon ne kaha ke hum apni larki'an ko Eidgah jaane se mana karte thay . Phir aik khatoon bahar se aayi aur Qasr-e-Banu Khalaf mein unhon ne qiyam kiya main un se milne ke liye hazir hui to unhon ne byaan kiya ke un ki behen ke shauhar Nabi Karim salla Allahu alaihi wasallam ke sath barah larai'on mein shareek rahe aur khud un ki behen apne shauhar ke sath chheh larai'on mein shareek hui theen , un ka byaan tha ke hum mareezon ki khidmat kiya karte thay aur zakhmiyon ki marham patti karte thay . Unhon ne poocha ke ya Rasool Allah! kya hum mein se agar kisi ke paas chadar na ho aur is wajah se woh Eid ke din (Eidgah) na ja sake to koi harj hai? Aap salla Allahu alaihi wasallam ne farmaya ke us ki saheli apni chadar ka aik hissa ise orha de aur phir woh khair aur musalmanon ki dua mein shareek hon . Hafsa razi Allahu anha ne byaan kiya ke phir jab Umm Atiyyah razi Allahu anha yahan tashreef layeen to main un ki khidmat mein bhi hazir hui aur daryaft kiya ke aap ne falan falan baat suni hai . Unhon ne farmaya ke haan mere baap Aap par fida hon . Umm Atiyyah razi Allahu anha jab bhi Nabi Karim salla Allahu alaihi wasallam ka zikr karteen to yeh zaroor kehteen ke mere baap Aap par fida hon , haan to unhon ne batlaya ke Nabi Karim salla Allahu alaihi wasallam ne farmaya ke jawan parda wali ya jawan aur parda wali bahar niklein . Shuba Ayub ko tha . Albatta haiza auraten Eidgah se alaihda ho kar baithein unhein khair aur musalmanon ki dua mein zaroor shareek hona chahiye . Hafsa ne kaha ke main ne Umm Atiyyah razi Allahu anha se daryaft kiya ke haiza auraten bhi? Unhon ne farmaya kya haiza auraten Arafat nahi jaateun aur kya woh falan falan jagahon mein shareek nahi hoteun (phir ijtima-e-Eid hi ki shirkat mein kaun si qabahat hai) .