Ibn Jurayj ne kaha ke Hasan bin Muslim ne mujhe khabar di , unhein Tawus ne , unhein Abdullah bin Abbas razi Allahu anhuma ne , unhon ne farmaya ke main Nabi Karim salla Allahu alaihi wasallam aur Abu Bakr , Umar aur Usman razi Allahu anhum ke sath Eid ul-Fitr ki namaaz parhne gaya hoon . Yeh sab hazraat khutbah se pehle namaaz parhte aur baad mein khutbah dete thay . Nabi Karim salla Allahu alaihi wasallam uthe , meri nazron ke saamne woh manzar hai , jab Aap salla Allahu alaihi wasallam logon ko haath ke isharah se bitha rahe thay . Phir Aap salla Allahu alaihi wasallam safon se guzarte hue auraton ki taraf aaye . Aap salla Allahu alaihi wasallam ke sath Bilal thay . Aap salla Allahu alaihi wasallam ne yeh aayat tilawat farmayi ”Ay Nabi! jab tumhare paas momin auraten bayt ke liye aayein“ Al-aayah . Phir jab khutbah se farigh hue to farmaya ke kya tum in baaton par qaim ho? Aik aurat ne jawab diya ke haan . In ke alawa koi aurat na boli , Hasan ko maloom nahi ke bolne wali khatoon kaun theen . Aap salla Allahu alaihi wasallam ne khairat ke liye hukm farmaya aur Bilal razi Allahu anhu ne apna kapra phaila diya aur kaha ke lao tum par mere maan baap fida hon . Chunanche auraten chhalley aur angoothiyan Bilal razi Allahu anhu ke kapre mein daalne lageen . Abdur Razzaq ne kaha «fatkh» bare (chhalley) ko kehte hain jis ka jahiliyat ke zamana mein istemal tha .