(Surah al-Araf mein) Allah Azzawajal ka hukm hai «khuzu zinatakum inda kulli masjidin» ke tum kapre pehna karo har namaz ke waqt aur jo ek hi kapra badan par lapait kar namaz padhe (us ne bhi farz ada kar liya) aur Salamah bin Akwa se manqool hai ke Nabi Kareem Sallallahu Alaihi Wasallam ne farmaya ke (agar ek hi kapre mein namaz padhe to) apne kapre ko taank le agarchay kaante hi se taankna pade, is ki sanad mein guftagu hai aur woh shakhs jo isi kapre se namaz padhta hai jise pehen kar woh jima karta hai (to namaz durust hai) jab tak woh is mein koi gandagi na dekhe aur Nabi Kareem Sallallahu Alaihi Wasallam ne hukm diya tha ke koi nanga Baitullah ka tawaf na kare. 104689

Hum se Musa bin Ismail ne bayan kiya, kaha hum se Yazid bin Ibrahim ne bayan kiya, woh Muhammad se, woh Umm Atiyyah se, unhon ne farmaya ke humein hukm hua ke hum Eidain ke din haiza aur parda nasheen auraton ko bhi bahar le jayen. Taake woh musalmanon ke ijtima aur un ki duaon mein shareek ho sakein. Albatta haiza auraton ko namaz padhne ki jagah se door rakhein. Ek aurat ne kaha Ya Rasool Allah! Hum mein baaz auratein aisi bhi hoti hain jin ke paas (parda karne ke liye) chadar nahi hoti. Aap Sallallahu Alaihi Wasallam ne farmaya ke us ki saathi aurat apni chadar ka ek hissa use adha de. Aur Abdullah bin Rajaa ne kaha hum se Imran Qattan ne bayan kiya, kaha hum se Muhammad bin Sireen ne, kaha hum se Umm Atiyyah ne, main ne Nabi Kareem Sallallahu Alaihi Wasallam se suna aur yehi hadees bayan ki. 104690