Aur isi tarah har mulk wala haaji jo Umrah kar ke Makkah reh gaya ho. Aur Ata Bin Abi Rabah se poocha gaya jo shakhs Makkah hi mein rehta ho wo Haj ke liye labbaik kahe to unhon ne kaha ke Ibn Umar (Radi Allahu Anhuma) athwein Zi Al-Hijjah mein namaz-e-Zohar parhne ke baad jab sawari par achi tarah baith jate to labbaik kehte. Abdul Malik Bin Abi Sulaiman ne Ata se, unhon ne Jabir (Radi Allahu Anhu) se bayan kiya ke Nabi Kareem (Sallallahu Alaihi Wasallam) ke sath hum Hajjat-ul-Wida mein Makkah aaye. Phir athwein Zi Al-Hijjah tak ke liye hum halal ho gaye. Aur (is din Makkah se nikalte hue) jab hum ne Makkah ko apni pusht par chhora to Haj ka talbiyah keh rahe thay. Abu Al-Zubair ne Jabir (Radi Allahu Anhu) se yun bayan kiya ke hum ne Batha se ihram bandha tha. Aur Ubaid Bin Jurayj ne Ibn Umar (Radi Allahu Anhuma) se kaha ke jab aap Makkah mein thay to mein ne dekha aur tamam logon ne ihram chand dekhte hi bandh liya tha lekin aap (Radi Allahu Anhu) ne athwein Zi Al-Hijjah se pehle ihram nahi bandha. Aap ne farmaya ke mein ne Rasul Allah (Sallallahu Alaihi Wasallam) ko dekha. Jab tak Aap Mina jaane ko ontni par sawar na ho jate ihram na bandhte
.

Hum se Abdullah Bin Muhammad ne bayan kiya, kaha ke hum se Ishaq Azraq ne bayan kiya, kaha ke hum se Sufyan Suri ne Abdul Aziz Bin Rafiee ke waste se bayan kiya, kaha ke mein ne Anas Bin Malik (Radi Allahu Anhu) se poocha ke Rasul Allah (Sallallahu Alaihi Wasallam) ne Zohar aur Asr ki namaz athwein Zi Al-Hijjah mein kahan parhi thi? Agar aap ko Nabi Kareem (Sallallahu Alaihi Wasallam) se yaad hai to mujhe bataiye. Unhon ne jawab diya ke Mina mein. Mein ne poocha ke barahwein tareekh ko Asr kahan parhi thi? Farmaya ke Muhassab mein. Phir unhon ne farmaya ke jis tarah tumhare hukkam karte hain isi tarah tum bhi karo
.