Hum se Abdan ne bayan kiya, in se Abu Hamza ne bayan kiya, in se Aamash ne, in se Salih ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”jab Allah Ta'ala ne makhlooq ko paida kiya to apni kitab mein usay likha, us ne apni zaat ke mutalliq bhi likha aur yeh ab bhi arsh par likha hua maujood hai «in-na rahmatee taghlibu ghazhabee» ke ”meri rahmat meere ghazhab par ghalib hai.““

Hum se Umar bin Hafs ne bayan kiya, kaha hum se hamare walid ne, kaha hum se Aamash ne, kaha main ne Abu Salih se suna aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”Allah Ta'ala farmata hai ke main apne bande ke guman ke saath hoon aur jab woh mujhe apne dil mein yaad karta hai to main bhi usay apne dil mein yaad karta hoon aur jab woh mujhe majlis mein yaad karta hai to main usay is se behtar farishton ki majlis mein usay yaad karta hoon aur agar woh mujh se ek balisht qareeb aata hai to main is se ek hath qareeb ho jata hoon aur agar woh mujh se ek hath qareeb aata hai to main is se do hath qareeb ho jata hoon aur agar woh meri taraf chal kar aata hai to main is ke paas dour kar aa jata hoon.“

Hum se Qutaybah bin Saeed ne bayan kiya, kaha hum se Hammad ne bayan kiya, in se Amr ne aur in se Jabir bin Abdullah razi Allahu anhuma ne bayan kiya ke jab yeh aayat nazil hui «qul huwal-qaadiru alaaa ay-yab-asa alaikum azhaabam-min fauqikum» ”Aap keh dijiye ke woh qadir hai is par ke tum par tumhare oopar se azab nazil kare.“ To Nabi Karim salla Allahu alaihi wasallam ne kaha ”main tere munh ki panah maangta hoon.“ Phir aayat ke yeh alfaz nazil huay «au min tahti arjulikum» ”woh tumhare oopar se tum par azab nazil kare ya tumhare paon ke neeche se azab aa jaye.“ To Nabi Karim salla Allahu alaihi wasallam ne phir yeh dua ki ke main tere munh ki panah chahta hoon. Phir yeh aayat nazil hui «au yalbisakum shiy-an» ”ya tumhein firqa-bandi mein mubtala kar de (ke yeh bhi azab ki qism hai)“ to Nabi Karim salla Allahu alaihi wasallam ne farmaya ke yeh aasaan hai ba-nisbat agle azabon ke.

Allah Ta'ala ka irshad (Surah al-Qamar mein) «tajree bi-a-yuninaa» ”Nooh ki kashti hamari aankhon ke samne pani par teir rahi ku.“

Hum se Musa bin Ismail ne bayan kiya, unhon ne kaha hum se Juwayriyah ne bayan kiya, in se Nafi ne bayan kiya aur in se Abdullah razi Allahu anhu ne bayan kiya ke Nabi Karim salla Allahu alaihi wasallam ke paas Dajjal ka zikr hua to Aap salla Allahu alaihi wasallam ne farmaya ke tumhein achhi tarah maloom hai ke Allah kaana nahi hai aur Aap ne hath se apni aankh ki taraf isharah kiya aur Dajjal Maseeh ki dayein aankh kaani ho gi, jaise is ki aankh par angoor ka ek utha hua dana ho.

Hum se Hafs bin Umar ne bayan kiya, kaha hum se Shubah ne bayan kiya, kaha hamako Qatadah ne khabar di, kaha main ne Anas razi Allahu anhu se suna aur in se Nabi Karim salla Allahu alaihi wasallam ne farmaya ke Allah ne jitne Nabi bheije in sab ne jhoote kaane Dajjal se apni qaum ko daraya, woh Dajjal kaana ho ga aur tumhara Rabb (aankhon wala hai) kaana nahi hai, is Dajjal ki donon aankhon ke darmiyan likha hua ho ga (lafz) Kaafir.

Hum se Ishaq ne bayan kiya, kaha hum se Affan ne bayan kiya, kaha hum se Wuhaib ne bayan kiya, kaha hum se Musa bin Uqbah ne bayan kiya, kaha mujh se Muhammad bin Yahya bin Habban ne bayan kiya, in se Ibn Muhaireez ne aur in se Abu Saeed Khudri razi Allahu anhu ne ke Ghazwa e Banu al-Mustaliq mein unhein baandiyan ghaneemat mein milein to unhon ne chaha ke in se hum-bistari karein lekin hamal na thehre. Chunanche logon ne Nabi Karim salla Allahu alaihi wasallam se azhal ke mutalliq poochha: to Aap salla Allahu alaihi wasallam ne farmaya ke agar tum azhal bhi karo to koi qabahat nahi magar Qayamat tak jis jaan ke mutalliq Allah Ta'ala ne paida hona likh diya hai woh zaroor paida ho kar rahe gi (is liye tumhara azhal karna bekar hai). Aur Mujahid ne Qaza-a se bayan kiya ke unhon ne Abu Saeed Khudri razi Allahu anhu se suna, unhon ne bayan kiya ke Nabi Karim salla Allahu alaihi wasallam ne farmaya ke koi bhi jaan jo paida honi hai, Allah Ta'ala zaroor usay paida kar ke rahe ga.

Mujh se Maaz bin Fazhala ne bayan kiya, kaha hum se Hisham Dastawai ne, unhon ne Qatadah bin Da-aama se, unhon ne Anas razi Allahu anhu se ke Nabi Karim salla Allahu alaihi wasallam ne farmaya ”Allah Ta'ala Qayamat ke din isi tarah jaise hum duniya mein jama hote hain, momino ko ikat-tha kare ga (woh garmi waghaira se pareshan ho kar) kahein ge kaash hum kisi ki sifarish apne maalik ke paas le jaate taake hamain apni is halat se aaram milta. Chunanche sab mil kar Adam alaihissalam ke paas aayein ge. In se kahein ge Adam! Aap logon ka haal nahi dekhte kis bala mein giriftar hain. Aap ko Allah Ta'ala ne (khaas) apne hath se banaya aur farishton se Aap ko sajda karaya aur har cheez ke naam Aap ko batlaye (har lughat mein bolna baat karna sikh-laya) kuch sifarish kijiye taake hum logon ko is jagah se najat ho kar aaram mile. Kahein ge main is laiq nahi, un ko woh gunah yaad aa jaye ga jo unhon ne kiya thu (mamnoo darakht mein se khana). (Woh kahein ge) magar tum log aisa karo Nooh alaihissalam Paighambar ke paas jao woh pehle Paighambar hain jin ko Allah Ta'ala ne zameen walon ki taraf bheija thu. Aakhir woh log sab Nooh alaihissalam ke paas aayein ge, woh bhi yahi jawab dein ge, main is laiq nahi apni khata jo unhon ne (duniya mein) ki thi yaad karein ge. Kahein ge tum log aisa karo Paighambar Ibrahim alaihissalam ke paas jao jo Allah ke khaleel hain (log in ke paas jayein ge) woh bhi apni khatayein yaad kar ke kahein ge main is laiq nahi tum Musa alaihissalam Paighambar ke paas jao Allahne un ko Tauraat inayat farmayi, in se bol kar baatein kien. Yeh log Musa alaihissalam ke paas aayein ge woh bhi yahi kahein ge main is laiq nahi apni khata jo unhon ne duniya mein ki ku yaad karein ge magar tum aisa karo Esa alaihissalam Paighambar ke paas jao woh Allah ke bande, us ke Rasool, us ke khaas kalma aur khaas rooh hain. Yeh log Esa alaihissalam ke paas aayein ge woh kahein ge main is laiq nahi tum aisa karo Muhammad salla Allahu alaihi wasallam ke paas jao woh Allah ke aise bande hain jin ki agli pichhli khatayein sab bakhsh di gayi hain. Aakhir yeh sab log jama ho kar meere paas aayein ge. Main chaloon ga aur apne Parvardigar ki bargah mein hazir hone ki ijazat maangoon ga, mujhko ijazat mile gi. Main apne Parvardigar ko dekhte hi sajde mein gir paroon ga aur jab tak us ko manzhur hai woh mujhko sajde hi mein para rehne de ga. Is ke baad hukm ho ga ”Muhammad salla Allahu alaihi wasallam apna sar uthao aur arz karo tumhari arz suni jaye gi tumhari darkhast manzhur ho gi, tumhari sifarish maqbool ho gi is waqt main apne maalik ki aaisi aaisi tareefein karoon ga jo woh mujhko sikha chuka hai. (ya sikh-laye ga) phir logon ki sifarish shuru kar doon ga. Sifarish ki ek hadd muqarrar kar di jaye gi. Main un ko bahisht mein le jaoon ga, phir laut kar apne Parvardigar ke paas hazir hoon ga aur usay dekhte hi sajde mein gir paroon ga jab tak Parvardigar chahe ga mujhko sajde hi mein para rehne de ga. Is ke baad irshad ho ga ”Muhammad apna sar uthao jo tum kaho ge suna jaye ga aur sifarish karo ge to qabool ho gi phir main apne Parvardigar ki aaisi tareefein karoon ga jo Allahne mujhko sikh-layien (ya sikh-laye ga) is ke baad sifarish kar doon ga lekin sifarish ki ek hadd muqarrar kar di jaye gi. Main un ko bahisht mein le jaoon ga phir laut kar apne Parvardigar ke paas hazir hoon ga usay dekhte hi sajde mein gir paroon ga jab tak Parvardigar chahe ga mujhko sajde hi mein para rehne de-ga. Is ke baad irshad ho ga Muhammad apna sar uthao jo tum kaho ge suna jaye ga aur sifarish karo ge to qabool ho gi phir main apne Parvardigar ki aaisi tareefein karoon ga jo Allahne mujhko sikh-layien (ya sikh-laye ga) is ke baad sifarish shuru kar doon ga lekin sifarish ki ek hadd muqarrar kar di jaye gi. Main un ko bahisht mein le jaoon ga phir laut kar apne Parvardigar ke paas hazir hoon ga. Arz karoon ga: ya paak Parvardigar! ab to dozakh mein aise hi log reh gaye hain jo Quran ke bamujib dozakh hi mein hamesha rehne ke laiq hain (yani kafir aur mushrik). Anas razi Allahu anhu ne kaha Nabi Karim salla Allahu alaihi wasallam ne farmaya ke dozakh se woh log nikaal liye jayein ge jinon ne (duniya mein) Laa ilaaha illallaah kaha ho ga aur in ke dil mein ek jau barabar iman ho ga phir woh log bhi nikaal liye jayein ge jinon ne Laa ilaaha illallaah kaha ho ga aur in ke dil mein gehoon barabar iman ho ga. (Gehoon jau se chhota hota hai) phir woh bhi nikaal liye jayein ge jinon ne Laa ilaaha illallaah kaha ho ga aur in ke dil mein cheenty barabar (ya bhangey barabar) iman ho ga.

Hum se Abu al-Yaman ne bayan ki kaha hamako Shuayb ne khabar di, kaha hamase Abu al-Zinad ne bayan kiya, in se Aaraj ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”Allah ka hath bhara hua hai, usay raat din ki bakhshish bhi kam nahi karti, Aap salla Allahu alaihi wasallam ne farmaya kiya tumhein maloom hai ke jab us ne aasman o zameen paida kiye hain us ne kitna kharch kiya hai us ne bhi is mein koi kami nahi paida ki jo is ke hath mein hai aur farmaya ke is ka arsh pani par hai aur is ke doosre hath mein tarazu hai, jise woh jhukata aur uthata rehta hai.“

Hum se Muqad-dam bin Muhammad ne bayan kiya, unhon ne kaha hum se hamare chacha Qasim bin Yahya ne bayan kiya, in se Ubaidullah ne bayan kiya, in se Nafi ne bayan kiya aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ”Qayamat ke din zameen is ki mut-thi mein ho gi aur aasman is ke dahne hath mein ho ga, phir kahe ga ke main badshah hoon.“ Is ki riwayat Saeed ne Malik se ki.