Hum se Qutaybah bin Saeed ne bayan kiya, kaha hum se Jareer ne bayan kiya, in se Mansoor ne, in se Salim ne, in se Kuraib ne aur in se Ibn Abbas razi Allahu anhuma ne ke Rasool Allah salla Allahu alaihi wasallam ne farmaya ”jab tum mein se koi apni biwi ke paas jaane ka irada kare aur yeh dua parh le «bis-mil-laahi, allaahumma jan-nibnash-shaytaana, wa jan-nibish-shaytaana maa razaqtanaa» ”shuru Allah ke naam se, Ae Allah! hamain shaytan se door rakhna aur tu jo hamain bacha ata kare usay bhi shaytan se door rakhna.“ To agar isi suhbat mein in donon se koi bacha naseeb hua to shaytan usay kabhi nuqsan nahi pahuncha sake ga.“

Hum se Abdullah bin Maslamah ne bayan kiya, kaha hum se Fuzhail ne bayan kiya, in se Mansoor ne, in se Ibrahim ne, in se Humam ne, in se Adi bin Hatim razi Allahu anhu ne ke main ne Nabi Karim salla Allahu alaihi wasallam se poochha ke main apne sudhaye huay kut-te ko shikar ke liye chhorrta hoon. Nabi Karim salla Allahu alaihi wasallam ne farmaya ke jab tum sudhaye huay kut-te chhorro aur in ke saath Allah ka naam bhi le lo, phir woh koi shikar pakrein aur usay khayein nahi to tum usay kha sakte ho aur jab shikar par bin phaal ke teer yani lakri se koi shikar maare lekin woh nauk se lag kar janwar ka gosht cheer de to aisa shikar bhi khao.

Hum se Yusuf bin Musa ne bayan kiya, unhon ne kaha hum se Abu Khalid Ahmar ne bayan kiya, unhon ne kaha ke main ne Hisham bin Urwah suna, woh apne walid (Urwah bin Zubayr) se bayan karte thay ke in se Umm al-Momineen Aisha Siddiqa razi Allahu anha ne bayan kiya ke logon ne kaha: ya Rasool Allah! wahan ke qabile abhi haal hi mein Islam laaye aur woh hamain gosht la kar dete hain. Hamain yaqeen nahi hota ke zibah karte waqt unhon ne Allah ka naam bhi liya tha ya nahi (to kiya hum usay kha sakte hain?) Nabi Karim salla Allahu alaihi wasallam ne farmaya ke tum is par Allah ka naam le kar usay kha liya karo. Is riwayat ki mutabia-t Muhammad bin Abd-ul-Rahman Darawardi aur Usamah bin Hafs ne ki.

Hum se Hafs bin Umar ne bayan kiya, kaha hum se Hisham ne bayan kiya, in se Qatadah ne aur in se Anas razi Allahu anhu ne bayan kiya ke Nabi Karim salla Allahu alaihi wasallam ne do maindhon ki qurbani ki aur zibah karte waqt Bis-mil-laahi Allaahu akbar parha.

Hum se Hafs bin Umar Haudhi ne bayan kiya, kaha hum se Shubah ne bayan kiya, in se Aswad bin Qays ne aur in se Jundub razi Allahu anhu ne ke woh Nabi Karim salla Allahu alaihi wasallam ke saath Zhul-Hij-jah ki dasvein tareekh ko maujood thay Aap salla Allahu alaihi wasallam ne namaz parhayi phir khutba diya aur farmaya ”jis ne namaz se pehle janwar zibah kar liya to is ki jagah doosra janwar zibah kare aur jis ne zibah abhi na kiya ho to woh Allah ka naam le kar zibah kare.“

Hum se Abu Nuaym ne bayan kiya, unhon ne kaha hum se Warqa ne bayan kiya, in se Abdullah bin Dinar ne bayan kiya aur in se Abdullah bin Umar razi Allahu anhuma ne ke Nabi Karim salla Allahu alaihi wasallam ne farmaya ”apne baap dadon ki qasam na khaya karo, agar kisi ko qasam khani hi ho to Allah ke naam ki qasam khaye warna khamosh rahe.“

Aur Khubaib bin Adi razi Allahu anhu ne marte waqt kaha ke yeh sab takleef Allah ki zaat e muqad-das ke liye hai to Allah ke naam ke saath unhon ne «zhaat» ka lafz lagaya.

Hum se Abu al-Yaman ne bayan kiya, kaha hum ko Shuayb ne khabar di, unhein Zuhri ne, unhein Amr bin Abi Sufyan bin Asid bin Jariya Saqafi ne khabar di jo Bani Zhahra ke haleef thay aur Abu Hurairyah razi Allahu anhu ke shagirdon mein thay ke Abu Hurairyah razi Allahu anhu ne bayan kiya ke Nabi Karim salla Allahu alaihi wasallam ne Adhal aur Qarah walon ki darkhast par das akabir sahabah ko jin mein Khubaib razi Allahu anhu bhi thay, in ke haan bheija. Ibn Shihab ne kaha ke mujhe Ubaidullah bin Ay-yaazh ne khabar di ke Haris ki sahib-zadi Zeenat ne unhein bataya ke jab log Khubaib razi Allahu anhu ko qatl karne ke liye aamada huay (aur qaid mein thay) to isi zamane mein unhon ne in se safayi karne ke liye ustra liya tha, jab woh log Khubaib razi Allahu anhu ko haram se bahar qatl karne le gaye to unhon ne yeh ashaar kahe. ”Aur jab main Musalman hone ki halat mein qatl kiya ja raha hoon to mujhe is ki parwa nahi ke mujhe kis pehlu par qatl kiya jaye ga aur mera yeh marna Allah ke liye hai aur agar woh chahe ga to mere tukre tukre kiye huay aazha par barkat nazil kare ga.“ Phir Ibn al-Haris ne unhein qatl kar diya aur Nabi Karim salla Allahu alaihi wasallam ne apne sahabah ko is hadsa ki ittila isi din di jis din yeh hazrat shaheed kiye gaye thay.

Aur Allah Ta'ala ka irshad (Surah al-Maida mein) (Esa alaihissalam ke alfaz mein) «ta-lamu maa fee nafsee wa laaa a-lamu maa fee nafsika» ”aur ya Allah! tu woh jaanta hai jo mere nafs mein hai lekin main woh nahi jaanta jo tere nafs mein hai.“

Hum se Umar bin Hafs bin Ghiyas ne bayan kiya, unhon ne kaha mujh se mere walid ne bayan kiya, unhon ne kaha hum se Aamash ne bayan kiya, in se Shaqeeq ne aur in se Abdullah ne bayan kiya ke Nabi Karim salla Allahu alaihi wasallam ne farmaya ”koi bhi Allah se zyada ghairat-mand nahi aur isi liye us ne fawaahish ko haram qarar diya hai aur Allah se zyada koi tareef pasand karne wala nahi.“