Mujh se Muhammad bin Abi Bakr ne bayan kiya , unhon ne kaha hum se Mutamir ne bayan kiya , in se Ubaidullah ne bayan kiya , in se Saeed bin Abi Saeed ne bayan kiya , in se Abu Salamah bin Abdur Rahman ne aur in se Aisha razi Allahu anha ne bayan kiya ke Rasool Allah salla Allahu alaihi wasallam raat mein chitayi ka ghera bana laite thay aur in ghere mein namaz parhte thay aur isi chitayi ko din mein bichhate thay aur is par baithte thay phir log (raat ki namaz ke waqt) Nabi Karim salla Allahu alaihi wasallam ke paas jama hone lage aur Nabi Karim salla Allahu alaihi wasallam ki namaz ki iqteda karne lage jab majma zyada barh gaya to Nabi Karim salla Allahu alaihi wasallam mutawajjo huay aur farmaya ke logo! Amal itne hi kiya karo jitni ke tum mein taqat ho kyunke Allah Ta'ala (ajar dene se) nahi thakta magar tum (amal se) thak jaate ho aur Allah ki bargah mein sab se zyada pasand woh amal hai jise pabandi se hamesha kiya jaye , khwah woh kam hi ho .

Aur Layth bin Saad ne kaha ke mujh se Ibn Abi Mulaykah ne bayan kiya , in se Miswar bin Makhrama razi Allahu anhu ne ke in se un ke walid Makhrama razi Allahu anhu ne kaha bete mujhe maloom hua hai ke Nabi Karim salla Allahu alaihi wasallam ke paas kuch qabayein aayin hain aur Aap unhein taqseem farma rahe hain . Hamain bhi Nabi Karim salla Allahu alaihi wasallam ke paas le chalo . Chunanche hum gaye aur Nabi Karim salla Allahu alaihi wasallam ko Aap ke ghar hi mein paya . Walid ne mujh se kaha bete mera naam le kar Nabi Karim salla Allahu alaihi wasallam ko bulao . Main ne usay bahut bari toheen-ameiz baat samjha (ke Nabi Karim salla Allahu alaihi wasallam ko apne walid ke liye bula kar takleef doon) chunanche main ne walid sahab se kaha ke main Aap ke liye Nabi Karim salla Allahu alaihi wasallam ko bulaoon! Unhon ne kaha ke bete haan . Aap koi jabir sifat insan nahi hain . Chunanche main ne bulaya to Nabi Karim salla Allahu alaihi wasallam bahar tashreef le aaye . Aap salla Allahu alaihi wasallam ke oopar deeba ki ek qaba thi jis mein sone ki ghundiyaan lagi hui thien . Aap salla Allahu alaihi wasallam ne farmaya ke Makhrama usay main ne tumhare liye chhupa ke rakkha hua thu . Chunanche Aap salla Allahu alaihi wasallam ne woh qaba unhein inayat farma di .

Hum se Adam bin Abi Iyas ne bayan kiya , kaha hum se Shubah ne bayan kiya , kaha hum ko Ash-as bin Sulaym ne kaha ke main ne Muawiyah bin Suwayd bin Muqarrin se suna , unhon ne kaha ke main ne Bara bin Azib razi Allahu anhu se suna , unhon ne kaha ke Nabi Karim salla Allahu alaihi wasallam ne hamain saat cheezon se roka tha . Aap salla Allahu alaihi wasallam ne hamain sone ki angoothi se ya rawi ne kaha ke sone ke chhalle se , resham se , istabraq se , deeba se , surkh maysarah se , qasi se aur chaandi ke bartan se mana farmaya tha aur hamain Aap salla Allahu alaihi wasallam ne saat cheezon yani beemar ki mizaj-pursa karne , janaza ke peeche chalne , chheinkne wale ka jawab dene , salam ke jawab dene , dawat karne wale ki dawat qabool karne , (kisi baat par) qasam kha lene wale ki qasam poori karaane aur mazloom ki madad karne ka hukm farmaya tha .

Mujh se Muhammad bin Bashar ne bayan kiya , kaha hum se Ghundar ne bayan kiya , kaha hum se Shubah ne bayan kiya , in se Qatadah ne , in se Nadr bin Anas ne , in se Basheer bin Nuhaik ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne sone ki angoothi ke pehnne se mardon ko mana farmaya tha . Aur Amr ne bayan kiya , kaha hum ko Shubah ne khabar di , unhein Qatadah ne , unhon ne Nadr se suna aur unhon ne Basheer se suna , aage isi tarah riwayat bayan ki .

Hum se Musaddad ne bayan kiya , kaha hum se Yahya bin Abi Kaseer ne bayan kiya , in se Ubaidullah ne bayan kiya , kaha ke mujh se Nafi ne bayan kiya aur in se Abdullah bin Umar razi Allahu anhuma ne ke Rasool Allah salla Allahu alaihi wasallam ne sone ki ek angoothi banwayi aur is ka nageena hatheli ki jaanib rakkha phir kuch doosre logon ne bhi isi tarah ki angoothiyaan banwa lein . Aakhir Nabi Karim salla Allahu alaihi wasallam ne usay phenk diya aur chaandi ki angoothi banwa li .

Hum se Yusuf bin Musa ne bayan kiya , kaha hum se Abu Usamah ne bayan kiya , kaha hum se Ubaidullah ne bayan kiya , in se Nafi ne aur in se Abdullah bin Umar razi Allahu anhuma ne ke Rasool Allah salla Allahu alaihi wasallam ne sone ya chaandi ki angoothi banwayi aur is ka nageena hatheli ki taraf rakkha aur is par «Muhammadun Rasool-ullahi» ke alfaz khudwaye phir doosre logon ne bhi isi tarah ki angoothiyaan banwa lein . Jab Nabi Karim salla Allahu alaihi wasallam ne dekha ke kuch doosre logon ne bhi is tarah ki angoothiyaan banwa li to Aap ne usay phenk diya aur farmaya ke ab main usay kabhi nahi pehnoon ga . Phir Aap ne chaandi ki angoothi banwayi aur doosre logon ne bhi chaandi ki angoothiyaan banwa lein . Ibn Umar razi Allahu anhuma ne bayan kiya ke Nabi Karim salla Allahu alaihi wasallam ke baad is angoothi ko Abu Bakr razi Allahu anhu ne pehna phir Umar razi Allahu anhu aur phir Usman ne pehna . Aakhir Usman razi Allahu anhu ke ahad e khilafat mein woh angoothi Areis ke kunwien mein gir gayi .

Hum se Abdullah bin Maslamah ne bayan kiya , kaha hum se Imam Malik ne , in se Abdullah bin Dinar ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam (hurmat se pehle) sone ki angoothi pehnte thay phir hurmat ka hukm aane par Aap ne usay phenk diya aur farmaya ke main ab se kabhi nahi pehnoon ga aur logon ne bhi apni angoothiyaan phenk dein .

Hum se Yahya bin Bukayr ne bayan kiya , unhon ne kaha hum se Layth bin Saad ne bayan kiya , unhon ne kaha in se Yunus ne , in se Ibn Shihab ne unhon ne kaha ke mujh se Anas bin Malik razi Allahu anhu ne bayan kiya ke unhon ne Nabi Karim salla Allahu alaihi wasallam ke hath mein ek din chaandi ki angoothi dekhi phir doosre logon ne bhi chaandi ki angoothiyaan banwani shuru kar dein aur pehnne lage to Nabi Karim salla Allahu alaihi wasallam ne apni angoothi phenk di aur doosre logon ne bhi apni angoothiyaan phenk di . Is riwayat ki mutabia-t Ibrahim bin Saad , Ziyad aur Shuayb ne Zuhri se ki hai aur Ibn Musafir ne Zuhri se bayan kiya ke mera khayal hai ke «khaatamam-min wariqin» bayan kiya .

Hum se Abdan ne bayan kiya , kaha hum ko Yazid bin Zuray ne khabar di , kaha hum ko Humayd ne khabar di , kaha unhon ne ke Anas razi Allahu anhu se poochha gaya kya Nabi Karim salla Allahu alaihi wasallam ne angoothi banwayi thi ? Unhon ne bayan kiya ke Nabi Karim salla Allahu alaihi wasallam ne ek raat Isha ki namaz aadhi raat mein parhayi . Phir chehra mubarak hamari taraf kiya , jaise ab bhi main Nabi Karim salla Allahu alaihi wasallam ki angoothi ki chamak dekh raha hoon . Farmaya ke bahut se log namaz parh kar so chuke hon ge lekin tum is waqt bhi namaz mein ho jab tak tum namaz ka intizar karte rahe ho .

Hum se Ishaq ne bayan kiya , kaha hum ko Mutamir ne khabar di , kaha ke main ne Humayd se suna , woh Anas razi Allahu anhu se bayan karte thay ke Nabi Karim salla Allahu alaihi wasallam ki angoothi chaandi ki thi aur is ka nageena bhi isi ka tha aur Yahya bin Ayub ne bayan kiya ke mujh se Humayd ne bayan kiya , unhon ne Anas razi Allahu anhu se suna , unhon ne Nabi Karim salla Allahu alaihi wasallam se isi tarah bayan kiya .