Hum se Abu Aasim ne bayan kiya, in se Imam Malik ne, in se Sumay ne, in se Abu Salih ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke pait ki beemari mein yani haiza se marne wala shaheed hai aur taoon ki beemari mein marne wala shaheed hai.

Hum se Ishaq bin Rahwayh ne bayan kiya, kaha hum ko Habban ne khabar di, kaha hum se Dawood bin Abi al-Furat ne bayan kiya, kaha hum se Abdullah bin Buraydah ne, in se Yahya bin Umar ne aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke Aap ne Rasool Allah salla Allahu alaihi wasallam se taoon ke mutalliq poochha. Nabi Karim salla Allahu alaihi wasallam ne farmaya ke yeh ek azab tha Allah Ta'ala jis par chahta is par is ko bhejta tha phir Allah Ta'ala ne usay momineen (ummat e Muhammadiya ke liye) rahmat bana diya ab koi bhi Allah ka banda agar sabr ke saath is shehar mein thehra rahe jahan taoon phoot para ho aur yaqeen rakhta hai ke jo kuch Allah Ta'ala ne is ke liye likh diya hai is ke siwa is ko aur koi nuqsan nahi pahunch sakta aur phir taoon mein is ka intiqal ho jaye to usay shaheed jaisa sawab mile ga. Habban bin Hilal ke saath is hadees ko Nadr bin Shumayl ne bhi Dawood se riwayat kiya hai.

Mujh se Ibrahim bin Musa ne bayan kiya, kaha hum ko Hisham ne khabar di, unhein Mamar ne, unhein Zuhri ne, unhein Urwah ne aur in se Aisha razi Allahu anha ne ke Nabi Karim salla Allahu alaihi wasallam apne marz-ul-wafat mein apne oopar mo'azzat (Surah al-Ikhlas, Surah al-Falaq aur Surah al-Naas) ka dum kiya karte thay. Phir jab Aap ke liye dushwar ho gaya to main in ka dum Aap par kiya karti thi aur barkat ke liye Nabi Karim salla Allahu alaihi wasallam ka hath Aap ke jism e mubarak par bhi pher leti thi. Phir main ne is ke mutalliq poochha ke Nabi Karim salla Allahu alaihi wasallam kis tarah dum karte thay, unhon ne bataya ke apne hath par dum kar ke hath ko chehre par phera karte thay.

Is baab mein Ibn Abbas razi Allahu anhuma ne Nabi Karim salla Allahu alaihi wasallam se ek riwayat ki hai.

Mujh se Muhammad bin Bashar ne bayan kiya, kaha hum se Ghundar ne, in se Shubah ne, in se Abu Bishr ne, in se Abu al-Mutawakkil ne, in se Abu Saeed Khudri razi Allahu anhu ne ke Nabi Karim salla Allahu alaihi wasallam ke chand sahabah dar halat e safar Arab ke ek qabila par guzre. Qabila walon ne in ki ziyafat nahi ki kuch der baad is qabila ke sardar ko bichhoo ne kaat liya, ab qabila walon ne in sahabah se kaha ke Aap logon ke paas koi dawa ya koi jhaarne wala hai. Sahabah ne kaha ke tum logon ne hamain mehman nahi banaya aur ab hum is waqt tak dum nahi karein ge jab tak tum hamare liye is ki mazdoori na muqarrar kar do. Chunanche in logon ne chand bakriyaan deni manzoor kar lein phir (Abu Saeed Khudri razi Allahu anhu) Surah Fatiha parhne lage aur is par dum karne mein munh ka thook bhi is jagah par daalne lage. Is se woh shakhs achha ho gaya. Chunanche qabila wale bakriyaan le kar aaye lekin sahabah ne kaha ke jab tak hum Nabi Karim salla Allahu alaihi wasallam se na pooch lein yeh bakriyaan nahi le sakte phir jab Nabi Karim salla Allahu alaihi wasallam se poochha to Aap muskuraye aur farmaya tumhein kaise maloom ho gaya tha ke Surah Fatiha se dum bhi kiya ja sakta hai, in bakriyon ko le lo aur is mein mera bhi hissa lagao.

Hum se Saydan bin Muzarib Abu Muhammad Bahili ne bayan kiya, kaha hum se Abu Mashar Yusuf bin Yazid al-Bara ne bayan kiya, kaha ke mujh se Ubaidullah bin Akhnas Abu Malik ne bayan kiya, in se Ibn Abi Mulaykah ne aur in se Ibn Abbas razi Allahu anhuma ne ke chand sahabah ek pani se guzre jis ke paas ke qabila mein bichhoo ka kaata hua (ladeergh ya saleem rawi ko in donon lafzon ke mutalliq shubha tha) ek shakhs tha. Qabila ka ek shakhs in ke paas aaya aur kaha kya Aap logon mein koi dum jhaarr karne wala hai. Hamare qabila mein ek shakhs ko bichhoo ne kaat liya hai chunanche sahabah ki is jama'at mein se ek sahabi is shakhs ke saath gaye aur chand bakriyon ki shart ke saath is shakhs par Surah Fatiha parhi, is se woh achha ho gaya woh sahab shart ke mutabiq bakriyaan apne sathiyon ke paas laaye to unhon ne usay qabool kar lena pasand nahi kiya aur kaha ke Allah ki kitab par tum ne ujrat le li. Aakhir jab sab log Madinah aaye to arz kiya ke ya Rasool Allah! In sahab ne Allah ki kitab par ujrat le li hai. Aap salla Allahu alaihi wasallam ne farmaya ke jin cheezon par tum ujrat le sakte ho in mein se zyada is ki mustahiq Allah ki kitab hi hai.

Hum se Muhammad bin Kaseer ne bayan kiya, kaha hum ko Sufyan ne khabar di, kaha ke mujh se Ma'bad bin Khalid ne bayan kiya, kaha ke main ne Abdullah bin Shaddad se suna, in se Aisha razi Allahu anha ne bayan kiya ke Rasool Allah salla Allahu alaihi wasallam ne mujhe hukm diya ya (Aap ne is tarah bayan kiya ke Nabi Karim salla Allahu alaihi wasallam ne) hukm diya ke nazar e bad lag jaane par mo'azzatain se dum kar liya jaye.

Hum se Muhammad bin Khalid ne bayan kiya, kaha hum se Muhammad bin Wahb bin Atiyyah Dimashqi ne bayan kiya, kaha hum se Muhammad bin Harb ne bayan kiya, kaha hum se Muhammad bin Waleed Zubaydi ne bayan kiya, kaha hum ko Zuhri ne khabar di, unhein Urwah bin Zubayr ne, unhein Zaynub bint Abi Salamah razi Allahu anha ne aur in se Umm Salamah razi Allahu anha ne ke Nabi Karim salla Allahu alaihi wasallam ne in ke ghar mein ek larki dekhi jis ke chehre par (nazar e bad lagne ki wajah se) kaale dhabbe par gaye thay. Nabi Karim salla Allahu alaihi wasallam ne farmaya ke is par dum kara do kyunke usay nazar e bad lag gayi hai. Aur Aqeel ne kaha in se Zuhri ne, unhein Urwah ne khabar di aur unhon ne usay Nabi Karim salla Allahu alaihi wasallam se mursalan riwayat kiya hai. Muhammad bin Harb ke saath is hadees ko Abdullah bin Salim ne bhi Zubaydi se riwayat kiya hai.

Hum se Ishaq bin Nadr ne bayan kiya, kaha hum se Abd-ur-Razzaq ne bayan kiya, in se Mamar ne, in se Humam ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke nazar e bad lagna haq hai aur Nabi Karim salla Allahu alaihi wasallam ne jism par godne se mana farmaya.

Hum se Musa bin Ismail ne bayan kiya, kaha hum se Abd-ul-Wahid ne bayan kiya, kaha hum se Sulayman Shaybani ne bayan kiya, kaha hum se Abd-ur-Rahman bin Aswad ne aur in ke walid ne bayan kiya ke main ne Aisha razi Allahu anha se zahreele janwar ke kaatne mein jhaarne ke mutalliq poochha to unhon ne kaha ke har zahreele janwar ke kaatne mein jhaarne ki Nabi Karim salla Allahu alaihi wasallam ne ijazat di hai.