Aur Abu Mamar (Abdullah bin Amr Manqari) ne itna zyada kiya ke hum se Ismail bin Jafar ne byaan kiya, un se Imam Malik bin Anas ne, un se Abdur Rahman bin Abdullah bin Abdur Rahman bin Abi Sasah ne, un se un ke walid ne aur un se Abu Saeed Khudri razi Allahu anhu ne ke mujhe mere bhai Qatadah bin Numan razi Allahu anhu ne khabar di ke ek sahabi Nabi Karim salla Allahu alaihi wasallam ke zamane mein sehri ke waqt se kharay «qul huwallahu ahadun» parhte rahe. In ke siwa aur kuch nahi parhte thay. Phir jab subah hui to doosre sahabi Nabi Karim salla Allahu alaihi wasallam ki khidmat mein hazir huay (baqi hissa) pichhli hadees ki tarah byaan kiya.

Hum se Umar bin Hafs bin Ghiyas ne byaan kiya, kaha mujh se mere walid ne byaan kiya, kaha hum se Aamash ne byaan kiya, kaha hum se Ibrahim Nakhai aur Dahhak Mashriqi ne byaan kiya aur un se Abu Saeed Khudri razi Allahu anhu ne ke Nabi Karim salla Allahu alaihi wasallam ne apne sahabah se farmaya ke kya tum mein se kisi ke liye yeh mumkin nahi ke Quran ka ek tihayi hissa ek raat mein parha kare? Sahabah ko yeh amal bara mushkil maloom hua aur unhon ne arz kiya: ya Rasool Allah! Hum mein se kaun is ki taqat rakhta hai. Nabi Karim salla Allahu alaihi wasallam ne is par farmaya ke «al-waahid-us-samadu» (yani «qul huwallahu ahadun») Quran Majeed ka ek tihayi hissa hai. Muhammad bin Yusuf Farabri ne byaan kiya ke main ne Abu Abdullah Imam Bukhari rahmahullah ke katib Abu Jafar Muhammad bin Abi Hatim se suna, woh kehte thay ke Imam Bukhari rahmahullah ne kaha Ibrahim Nakhai ki riwayat Abu Saeed Khudri razi Allahu anhu se munqata hai (Ibrahim ne Abu Saeed se nahi suna) lekin Dahhak Mashriqi ki riwayat Abu Saeed se muttasil hai.

Hum se Abdullah bin Yusuf Taneesi ne byaan kiya, kaha hum ko Imam Malik ne khabar di, unhein Ibn Shihab ne, unhein Urwah bin Zubayr ne aur unhein Aisha razi Allahu anha ne ke Rasool Allah salla Allahu alaihi wasallam jab beemar parte to Muawwizhat ki surtein parh kar usay apne oopar dam karte (is tarah ke hawa ke saath kuch thook bhi nikalta) phir jab (Marz-ul-Maut mein) Aap ki takleef barh gayi to main in suraton ko parh kar Nabi Karim salla Allahu alaihi wasallam ke hathon se barkat ki umeed mein Aap ke jasad e mubarak par pherti thi.

Hum se Qutaybah bin Saeed ne byaan kiya, unhon ne kaha hum se Mufaddal bin Fadala ne byaan kiya, unhon ne kaha hum se Aqeel bin Khalid ne byaan kiya, unhon ne kaha hum se Ibn Shihab ne byaan kiya, un se Urwah ne byaan kiya, aur un se Umm al-Momineen Aisha razi Allahu anha ne byaan kiya ke Nabi Karim salla Allahu alaihi wasallam har raat jab bistar par aaram farmate to apni donon hatheliyon ko mila kar «qul huwallahu ahadun» , «qul aoozhu bi-rabbil falaqi» aur «qul aoozhu bi-rabbin-naasi» (teenon surtein mukammal) parh kar un par phoonkte aur phir donon hatheliyon ko jahan tak mumkin hota apne jism par pheerte thay. Pehle sar aur chehra par hath pheerte aur samne ke badan par. Yeh amal Aap salla Allahu alaihi wasallam ne teen dafa karte thay.

Aur Layth bin Saad ne byaan kiya ke mujh se Yazid bin al-Haad ne byaan kiya, in se Muhammad bin Ibrahim ne ke Usayd bin Huzayr razi Allahu anhu ne byaan kiya ke raat ke waqt woh Surah al-Baqarah ki tilawat kar rahe thay aur un ka ghora un ke paas hi bandha hua tha. Itne mein ghora badakne laga to unhon ne tilawat band kar di to ghora bhi ruk gaya. Phir unhon ne tilawat shuru ki to ghora phir badakne laga. Is martaba bhi jab unhon ne tilawat band ki to ghora bhi khamosh ho gaya. Teesri martaba unhon ne tilawat shuru ki to phir ghora badka. In ke bete Yahya kyunke ghore ke qareeb hi thay is liye is darr se ke kahin unhein koi takleef na pahunch jaye. Unhon ne tilawat band kar di aur bache ko wahan se hata diya phir oopar nazar uthayi to kuch na dikhayi diya. Subah ke waqt yeh waqia unhon ne Nabi Karim salla Allahu alaihi wasallam se byaan kiya. Nabi Karim salla Allahu alaihi wasallam ne farmaya: Ibn Huzayr! Tum parhte rehte tilawat band na karte (to behtar tha) unhon ne arz kiya ya Rasool Allah! Mujhe darr laga ke kahin ghora mere bache Yahya ko na kachal daale, woh is se bahut qareeb tha. Main sar oopar uthaya aur phir Yahya ki taraf gaya. Phir main ne aasman ki taraf sar uthaya to ek chhatri si nazar aayi jis mein roshan chiragh thay. Phir jab main dobara bahar aaya to main ne usay nahi dekha. Nabi Karim salla Allahu alaihi wasallam ne farmaya ke tumhein maloom bhi hai woh lya cheez thi? Usayd ne arz kiya ke nahi. Nabi Karim salla Allahu alaihi wasallam ne farmaya ke woh farishte thay tumhari aawaz sunne ke liye qareeb ho rahe thay agar tum raat bhar parhte rehte to subah tak aur log bhi unhein dekhte woh logon se chhupte nahi. Aur Ibn al-Haad ne byaan kiya, kaha mujh se yeh hadees Abdullah bin Khabbab ne byaan ki, un se Abu Saeed Khudri razi Allahu anhu ne aur un se Usayd bin Huzayr razi Allahu anhu ne.

Hum se Qutaybah bin Saeed ne byaan kiya, kaha hum se Sufyan bin Uyaynah ne byaan kiya, un se Abdul Aziz bin Rafee ne byaan kiya ke main aur Shaddad bin Maqal Ibn Abbas razi Allahu anhuma ke paas gaye. Shaddad bin Maqal ne in se poocha kiya Nabi Karim salla Allahu alaihi wasallam ne is Quran ke siwa koi aur bhi Quran chhora tha. Ibn Abbas razi Allahu anhuma ne kaha Nabi Karim salla Allahu alaihi wasallam ne (wahi matloo) jo kuch bhi chhori hai woh sab ki sab in do gutton ke darmiyan sahifa mein mahfooz hai Abdul Aziz bin Rafee kehte hain ke hum Muhammad bin Hanifa ki khidmat mein bhi hazir huay aur in se bhi poocha to unhon ne kaha ke Nabi Karim salla Allahu alaihi wasallam ne jo bhi wahi matloo chhori woh sab do daftiyon ke darmiyan (Quran Majeed ki shakal mein) mahfooz hai.

Hum se Abu Khalid Hudbah bin Khalid ne byaan kiya, kaha hum se Hammam bin Yahya ne byaan kiya, kaha hum se Qatadah ne byaan kiya un se Anas bin Malik ne byaan kiya aur un se Abu Musa Ash'ari razi Allahu anhu ne ke Nabi Karim salla Allahu alaihi wasallam ne farmaya ke is ki (momin ki) misal jo Quran ki tilawat karta hai sangtaray ki si hai jis ka maza bhi lazeez hota hai aur jis ki khushboo bhi behtareen hoti hai aur jo momin Quran ki tilawat nahi karta is ki misal khajoor ki si hai is ka maza to umdah hota hai lekin is mein khushboo nahi hoti aur is bad-kaar (munafiq) ki misal jo Quran ki tilawat karta hai rayhanah ki si hai ke is ki khushboo to achhi hoti lekin maza karwa hota hai aur is bad-kaar ki misal jo Quran ki tilawat bhi nahi karta indrain ki si hai jis ka maza bhi karwa hota hai aur is mein koi khushboo bhi nahi hoti.

Hum se Musaddad bin Musarhad ne byaan kiya, un se Yahya bin Saeed Ansari ne byaan kiya, un se Sufyan Sawri ne kaha ke mujh se Abdullah bin Dinar ne byaan kiya, kaha ke main ne Abdullah bin Umar razi Allahu anhuma se suna, Nabi Karim salla Allahu alaihi wasallam ne farmaya ke Musalmano! Guzri ummaton ki umron ke muqabla mein tumhari umr aaisi hai jaise Asr se sooraj doobne tak ka waqt hota hai aur tumhari aur Yahud o Nasara ki misal aaisi hai ke kisi shakhs ne kuch mazdoor kaam par lagaye aur in se kaha ke ek qiraat mazdoori par mera kaam subah se dopahar tak kaun kare ga? Yeh kaam Yahudiyon ne kiya. Phir us ne kaha ke ab mera kaam aadhe din se Asr tak (ek hi qiraat mazdoori par) kaun kare ga? Yeh kaam Nasara ne kiya. Phir tum ne Asr se Maghrib tak do do qiraat mazdoori par kaam kiya. Yahud o Nasara Qayamat ke din kahein ge hum ne kaam zyada kiya lekin mazdoori kam paayi? Allah Ta'ala farmaye ga kiya tumhara kuch haq maara gaya? Woh kahein ge ke nahi. Phir Allah Ta'ala farmaye ga ke phir yeh mera fazl hai, main jise chahoon aur jitna chahoon ata karoon.

Hum se Muhammad bin Yusuf Faryabi ne byaan kiya, kaha hum se Malik bin Maghool ne, kaha hum se Talha bin Musarrif ne byaan kiya, ke main ne Abdullah bin Abi Aufa razi Allahu anhu se sawal kiya: kiya Nabi Karim ne koi wasiyat farmayi thi? Unhon ne kaha ke nahi. Main ne arz kiya: phir logon par wasiyat kaise farz ki gayi ke Musalmanon ko to wasiyat ka hukm hai aur khud Nabi Karim salla Allahu alaihi wasallam ne koi wasiyat nahi farmayi. Unhon ne kaha ke Nabi Karim salla Allahu alaihi wasallam ne Kitab Allah ko mazbooti se thaame rehne ki wasiyat farmayi .

Aur Allah Ta'ala ka farman «awalam yakfihim anna anzalna alaykal kitaaba yutla alayhim» ”kiya in ke liye kafi nahi hai woh Kitab Allah jo hum ne tum par nazil ki jo in par parhi jati hai.“