‏‏‏‏ Aur Mujahid ne kaha «jimalatun» jahaz ki moti rasiyaan. «irka'oo» namaz parho. «la yarka-oona» namaz nahi parhte. Kisi ne Ibn Abbas razi Allahu anhuma se poocha yeh Quran Majeed mein ikhtilaf kya hai ek jagah to farmaya ke kafir baat na karein ge. Doosri jagah yun hai ke kafir qasam kha kar kahein ge ke hum (duniya mein) mushrik na thay. Teesri jagah yun hai ke hum un ke munhon par mahr laga dein ge. Unhon ne kaha Qayamat ke din kafiron ke mukhtalif halat hon ge. Kabhi woh baat karein ge, kabhi un ke munh par mahr kar di jaye gi.

Hum se Mahmood ne byaan kiya, kaha hum se Ubaydullah ne byaan kiya, un se Israeel ne, un se Mansoor ne, un se Ibrahim ne, un se Alqamah ne aur un se Abdullah bin Masood razi Allahu anhu ne byaan kiya ke hum Rasool Allah salla Allahu alaihi wasallam ke saath thay aur Aap par Surah wal-Mursalat nazil hui thi aur hum is ko Aap ke munh se seekh rahe thay ke itne mein ek saanp nikal aaya. Hum log is ke maarne ko barhay lekin woh bach nikla aur apne surakh mein ghus gaya. Is par Rasool Allah salla Allahu alaihi wasallam ne farmaya ke woh tumhare shar se bach gaya aur tum is ke shar se bach gaye.

Hum se Abdah bin Abdullah Khuzai ne byaan kiya, kaha hum ko Yahya bin Adam ne khabar di, unhein Israeel ne, unhein Mansoor ne yahi hadees aur Israeel ne is hadees ko Aamash se, unhon ne Ibrahim se, unhon ne Alqamah se, unhon ne Abdullah bin Masood razi Allahu anhu se bhi riwayat kiya hai aur Yahya bin Adam ke saath is hadees ko Aswad bin Aamir ne Israeel se riwayat ki aur Hafs bin Ghiyas aur Abu Muawiyah aur Sulayman bin Qaram ne Aamash se, unhon ne Ibrahim se, unhon ne Aswad se riwayat kiya aur Yahya bin Hammad (Shaykh Bukhari) ne kaha hum ko Abu Awanah ne khabar di, unhon ne Mugheerah bin Miqsam se, unhon ne Ibrahim se, unhon ne Alqamah se, unhon ne Abdullah bin Masood se aur Muhammad bin Ishaq ne is hadees ko Abdur Rahman bin Aswad se riwayat kiya, unhon ne apne walid Aswad se, unhon ne Abdullah bin Masood se byaan kiya.

Hum se Qutaybah bin Saeed ne byaan kiya, kaha hum se Jareer ne byaan kiya, un se Aamash ne, un se Ibrahim ne, un se Aswad ne byaan kiya aur un se Abdullah bin Masood razi Allahu anhu ne byaan kiya ke hum Rasool Allah salla Allahu alaihi wasallam ke saath ek ghaar mein thay ke Aap par Surah wal-Mursalat nazil hui. Hum ne usay Aap ke munh se yaad kar liya. Is wahi se Aap ke dahan e mubarak ki tazgi abhi khatam nahi hui thi ke itne mein ek saanp nikal para. Rasool Allah salla Allahu alaihi wasallam ne farmaya usay zinda na chhoro. Byaan kiya ke hum is ki taraf barhay lekin woh nikal gaya. Is par Nabi Karim salla Allahu alaihi wasallam ne farmaya ke tum is ke shar se bach gaye aur woh tumhare shar se bach gaya.

Hum se Muhammad bin Kaseer ne byaan kiya, kaha hum ko Sufyan ne khabar di, kaha hum se Abdur Rahman bin Aabis ne byaan kiya kaha main ne Ibn Abbas razi Allahu anhuma se aayat «innaha tarmee bi-shararin kal-qasri» yani ”woh angare barsaye gi jaise bare mahal“ ke mutalliq poocha aur unhon ne kaha ke hum teen teen hath ki lakriyan utha kar rakhte thay. Aaisa hum jaron ke liye karte thay (taake woh jalane ke kaam aayein) aur un ka naam «qasrun» rakhte thay.

Hum se Amr bin Ali ne byaan kiya, kaha hum se Yahya ne byaan kiya, unhon ne kaha hamain Sufyan ne khabar di, un se Abdur Rahman bin Aabis ne byaan kiya aur unhon ne Ibn Abbas razi Allahu anhuma se suna, aayat «tarmee bi-shararin kal-qasri» ke mutalliq. Aap ne farmaya ke hum teen hath ya is se bhi lambi lakriyan utha kar jaron ke liye rakh lete thay. Aaisi lakriyon ko hum «qasrun» kehte thay, «ka-annahu jimalatun suf-run» se murad kashti ki rasiyaan hain jo jorr kar rakkhi jayein, woh aadmi ki kamar barabar moti ho jayein.

Hum se Umar bin Hafs ne byaan kiya, ke mujh se mere walid ne byaan kiya, kaha hum se Aamash ne byaan kiya, kaha mujh se Ibrahim ne byaan kiya, un se Aswad ne aur un se Abdullah bin Masood razi Allahu anhu ne byaan kiya ke hum Nabi Karim salla Allahu alaihi wasallam ke saath ek ghaar mein thay ke Nabi Karim salla Allahu alaihi wasallam par Surah wal-Mursalat nazil hui, phir Nabi Karim salla Allahu alaihi wasallam ne is ki tilawat ki aur main ne usay Aap hi ke munh se yaad kar liya. Wahi se Aap ki munh ki tazgi is waqt bhi baqi thi ke itne mein ghaar ki taraf ek saanp lapka. Nabi Karim salla Allahu alaihi wasallam ne farmaya ke usay maar daalo. Hum is ki taraf barhay lekin woh bhaag gaya. Nabi Karim salla Allahu alaihi wasallam ne is par farmaya ke woh bhi tumhare shar se is tarah bach nikla jaisa ke tum is ke shar se bach gaye. Umar bin Hafs ne kaha mujhe yeh hadees yaad hai, main ne apne walid se suni thi, unhon ne itna aur barhaya tha ke woh ghaar Mina mein

Mujahid ne kaha «la yarjoona hisaban» ka maani yeh hai ke woh aamal ke (hisab kitab) se nahi darte . «la yamlikoona minhu khitaban» yani darr ke maarey is se baat na kar sakein ge magar jab un ko baat karne ki ijazat mile gi . «sawaban» yani jis ne duniya mein sachi baat kahi thi is par amal kiya tha . Ibn Abbas razi Allahu anhuma ne kaha «wahhajan» roshan , chamakta hua . Auron ne kaha «ghas-saqan» , «ghasaqat» , «u-yaynahu» se nikla hai yani is ki aankh tareek ho gayi , isi se hai . «yaghsaqu li-jirahi» yani zakham beh raha hai «ghas-saqun» aur «ghaseequn» donon ka ek hi maani hai yani dozakhiyon ka khoon peep . «ataa'an hisaban» poora badla Arab log kehte hain «aatani ma ahsabani» yani mujh ko itna diya jo kafi ho gaya .

Hum se Muhammad ne byaan kiya , kaha hum ko Abu Muawiyah ne khabar di , unhein Aamash ne , unhein Abu Salih ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke do soor phoonke jaane ke darmiyan chalis fasla ho ga . Abu Hurairah razi Allahu anhu ke shagirdon ne poocha kya chalis din murad hain ? Unhon ne kaha ke mujhe maloom nahi phir shagirdon ne poocha kya chalis mahine murad hain ? Unhon ne kaha ke mujhe maloom nahi . Shagirdon ne poocha kya chalis saal murad hain ? Kaha ke mujhe maloom nahi . Kaha ke phir Allah Ta'ala aasman se pani barsaye ga . Jis ki wajah se tamam murde jee uthein ge jaise sabziyan pani se ugg aati hain . Is waqt insan ka har hissa gull chuka ho ga . Siwa reedh ki haddi ke aur is se Qayamat ke din tamam makhlooq dobara banayi jaye gi .

Mujahid ne kaha «al-aayat-ul-kubra» se murad Musa alaihissalam ki asa aur un ka hath hai . «izhaaman nakhira-tan» aur «naakhira-tan» donon tarah se parha hai jaise «taamiun» aur «tamiun» aur «baakhilun» aur «bakheelun» aur baazon ne kaha «nakhira-tun» aur «naakhira-tun» mein farq hai . «nakhira-tun» kehte hain gali hui haddi ko aur «naakhira-tun» khokhli haddi jis ke andar hawa jaye to aawaz nikle aur Ibn Abbas razi Allahu anhuma ne kaha «haafira-tun» hamari woh halat jo duniya ki (zindagi) mein hai . Auron ne kaha «ay-yaana mursaaha» yani is ki intiha kahan hai yeh lafz «mursa-s-safeenati» se nikla hai . Yani jahan kashti aakhir mein ja kar theharti hai .