Hum se Yahya bin Bukayr ne byaan kiya, unhon ne kaha hum se Layth bin Saad ne byaan kiya, un se Aqeel ne, un se Ibn Shihab ne (doosri sanad) aur mujh se Abdullah bin Muhammad ne byaan kiya, unhon ne kaha hum se Abdur Razzaq ne byaan kiya, unhon ne kaha hum ko Mamar ne khabar di, unhein Zuhri ne khabar di, kaha mujh ko Abu Salamah bin Abdur Rahman ne khabar di aur un se Jabir bin Abdullah razi Allahu anhuma ne byaan kiya ke main ne Nabi Karim salla Allahu alaihi wasallam se suna, Nabi Karim salla Allahu alaihi wasallam darmiyan mein wahi ka silsila ruk jaane ka haal byaan farma rahe thay. Aap salla Allahu alaihi wasallam ne farmaya ke main ro raha tha ke main ne aasman ki taraf se aawaz suni. Main ne apna sar oopar uthaya to wahi farishta nazar aaya jo mere paas Ghaar e Hira mein aaya tha. Woh aasman o zameen ke darmiyan kursi par baitha hua tha. Main is ke darr se ghabra gaya phir main ghar wapas aaya aur Khadija se kaha ke mujhe kapra orha do, mujhe kapra orha do. Unhon ne mujhe kapra orha diya phir Allah Ta'ala ne aayat «ya ayyuhal muddasshiru» se «warruj-zha fahjur» tak nazil ki. Yeh surat namaz farz kiye jaane se pehle nazil hui thi «ar-ruj-zha» se murad but hai.

‏‏‏‏ Kaha gaya hai ke «ar-ruj-zha» aur «ar-rij-sha» azab ke maani mein hain.

Hum se Abdullah bin Yusuf ne byaan kiya, unhon ne kaha hum se Layth bin Saad ne byaan kiya, un se Aqeel ne byaan kiya, un se Ibn Shihab ne byaan kiya ke main ne Abu Salamah se suna, unhon ne byaan kiya ke main ne Jabir bin Abdullah razi Allahu anhuma se suna, unhon ne Nabi Karim salla Allahu alaihi wasallam se suna, Nabi Karim salla Allahu alaihi wasallam darmiyan mein wahi ke silsile ke ruk jaane se mutalliq byaan farma rahe thay ke main chal raha tha ke main ne aasman ki taraf se aawaz suni. Apni nigah aasman ki taraf utha kar dekha to wahi farishta nazar aaya jo mere paas Ghaar e Hira mein aaya tha. Woh kursi par aasman aur zameen ke darmiyan mein baitha hua tha. Main ne usay dekh kar itna dara ke zameen par gir para. Phir main apni biwi ke paas aaya aur un se kaha ke mujhe kapra orha do, mujhe kapra orha do! mujhe kapra orha do. Phir Allah Ta'ala ne yeh aayat nazil ki «ya ayyuhal muddasshiru» se «warruj-zha fahjur» tak Abu Salamah ne byaan kiya ke «ar-ruj-zha» but ke maani mein hai. Phir wahi garm ho gayi aur silsila nahi toota.

‏‏‏‏ .

‏‏‏‏ Ibn Abbas razi Allahu anhuma ne kaha ke «suda» yani be-qaid, aazad jo chahe woh kare. «li-yafjura amaamahu» yani insan hamesha gunah karta rehta aur yahi kehta rehta hai ke jaldi tauba kar loon ga, jaldi achhe amal karoon ga. «la wazara» ay «la hisna» yani panah ke liye koi qila nahi mile ga.

Hum se Humaydi ne byaan kiya, kaha hum se Sufyan bin Uyaynah ne byaan kiya, kaha hum se Musa bin Abi Aisha ne byaan kiya aur Musa siqa thay, unhon ne Saeed bin Jubayr se aur un se Ibn Abbas razi Allahu anhuma ne byaan kiya ke jab Nabi Karim salla Allahu alaihi wasallam par wahi nazil hoti to Aap salla Allahu alaihi wasallam is par apni zaban hilaya karte thay. Sufyan ne kaha ke is hilaane se Aap ka maqsad wahi ko yaad karna hota tha. Is par Allah Ta'ala ne yeh aayat nazil ki «la tuhar-rik bihi lisanaka lita'jala bihi» ”Aap jaldi jaldi lene ke liye is par zaban na hilaya karein, is ka jama kar dena aur is ka parhwa dena, yeh har do kaam to hamare zimma hain.“

Hum se Abdullah bin Musa ne byaan kiya, kaha hum se Israeel ne, un se Musa bin Abi Aisha ne ke unhon ne Saeed bin Jubayr se Allah Ta'ala ke irshad «la tuhar-rik bihi lisanaka» al-aayat yani ”Aap Quran ko lene ke liye zaban na hilaya karein“ ke mutalliq poocha to unhon ne byaan kiya ke Ibn Abbas razi Allahu anhuma ne kaha jab Nabi Karim salla Allahu alaihi wasallam par wahi nazil hui to Aap salla Allahu alaihi wasallam apne hont hilaya karte thay is liye Aap se kaha gaya «la tuhar-rik bihi lisanaka» al-kh yani wahi par apni zaban na hilaya karein, is ka tumhare dilli mein jama dena aur is ka parha dena hamara kaam hai. Jab hum is ko parh chukein yani Jibraeel tujh ko suna chukein to jaisa Jibraeel ne parh kar sunaya tu bhi is tarah parh. Phir yeh bhi hamara hi kaam hai ke hum teri zaban se is ko parhwa dein ge.

‏‏‏‏ Yani ”phir jab hum usay parhne lagein to Aap is ke tabe ho jaya karein.“ Ibn Abbas razi Allahu anhuma ne kaha «qara'naahu» ke maani yeh hain ”hum ne usay byaan kiya“ aur «fattabi'u» ka maani yeh ke ”tum is par amal karo.“

Hum se Qutaybah bin Saeed ne byaan kiya, kaha hum se Jareer ne byaan kiya, un se Musa bin Abi Aisha ne, un se Saeed bin Jubayr ne, un se Ibn Abbas razi Allahu anhuma ne Allah Ta'ala ke irshad «la tuhar-rik bihi lisanaka lita'jala bihi» al-aayat yani ”Aap is ko jaldi jaldi lene ke liye is par zaban na hilaya karein“ ke mutalliq batlaya ke jab Jibraeel Aap par wahi nazil karte to Rasool Allah salla Allahu alaihi wasallam apni zaban aur hont hilaya karte thay aur Aap par yeh bahut sakht guzarta, yeh Aap ke chehre se bhi zahir hota thu. Is liye Allah Ta'ala ne woh aayat nazil ki jo Surah «la uqsimu bi-yawmil qiyamati» mein hai yani «la tuhar-rik bihi lisanaka» al-aayat yani ”Aap is ko jaldi jaldi lene ke liye is par zaban na hilaya karein. Yeh to hamare zimma hai is ka jama kar dena aur is ka parhwana, phir jab hum usay parhne lagein to Aap is ke peeche yaad karte jaya karein. Yani jab hum wahi nazil karein to Aap ghaur se sunein. Phir is ka byaan kara dena bhi hamare zimma hai.“ Yani yeh bhi hamare zimma hai ke hum usay Aap ki zabani logon ke samne byaan kara dein. Byaan kiya ke chunanche is ke baad jab Jibraeel alaihissalam wahi le kar aate to Nabi Karim salla Allahu alaihi wasallam khamosh ho jate aur jab chale jate to parhte jaisa ke Allah Ta'ala ne Aap se waada kiya tha. Aayat «aula laka fa-aula» mein «tahdeedun» yani darana dhamkana murad hai.

‏‏‏‏ Lafz «hal ata» ka maani aa chuka. «hal» ka lafz kabhi to inkar ke liye aata hai, kabhi tahqeeq ke liye ( «qad» ke maani mein) yahan «qad» hi ke maani mein hai. Yani ek zamana insan par aisa aa chuka hai ke woh zikr karne ke qabil cheez na tha, yeh woh zamana hai jab mitti se is ka putla banaya gaya thu. Is waqt tak jab rooh is mein phoonki gayi. «amshaajun» mili hui cheezin yani mard aur aurat donon ki mani aur khoon aur phat-ki aur jab koi cheez doosri cheez se mila di jaye to kehte hain «masheejun» jaise «khaleetun» yani «mamshoojun» aur «makhlootun» baazon ne yun parha hai «salasila wa aghlaalan» (baazon ne «salasila wa aghlaalan» baghair tanween ke parha hai) unhon ne «salasila» ki tanween jaiz nahi rakkhi. «mustateerun» is ki burayi phaili hui. «qam-tareerun» sakht. Arab log kehte hain «yawmun qam-tareerun wa yawmun qumaatiru» yani sakht museebat ka din. «aboosun» aur «qam-tareerun» aur «qumaatiru» aur «qaseebun» in charon ka maani woh din jis pe sakht museebat aaye aur Mamar bin Ubaydah ne kaha «shaddadna asrahum» maani yeh hai ke hum ne un ki khalqat khoob mazboot ki hai. Arab log jis ko tu mazboot baandhe jaise palan, haudaj waghaira usay «ma'soorun» kehte hain. (Rasool Allah salla Allahu alaihi wasallam Jumu'ah ki namaz e Fajr mein) aksar pehli rakat mein Surah al-if-laam-meem Sajda aur doosri rakat mein Surah «hal ata alal insaani» ki tilawat farmaya karte thay.