Hum se Humaidi ne bayan kiya, kaha hum se Sufyan Bin Uyainah ne bayan kiya, un se Amr Bin Dinar ne bayan kiya, un se Ikrimah ne aur un se Abdullah Bin Abbas Radi Allahu Anhuma ne Allah ke irshad «Wa ma ja'alna-rru'ya-llati araynaka illa fitnatal linnasi» aur jo khwab hum ne aap ko dikhaya is se maqsad sirf logon ka imtihan tha) farmaya ke is mein ru'ya se aankh se dekhna hi murad hai. Jo Rasul Allah Sallallahu Alaihi Wasallam ko is Meraj ki raat mein dikhaya gaya tha jis mein aap ko Bait-ul-Maqdis tak le jaya gaya tha aur Quran Majeed mein «Ash-shajaratal mal'oonah» ka zikr aaya hai wo thoohar ka darakht hai
.

Hum se Yahya Bin Bukair ne bayan kiya, unhon ne kaha hum se Lais ne bayan kiya, un se Aqeel ne bayan kiya, un se Ibn Shihab ne (doosri sanad), Imam Bukhari ne kaha aur hum se Ahmad Bin Salih ne bayan kiya, kaha hum se Anbasah Bin Khalid ne bayan kiya, hum se Yunus Bin Yezid ne bayan kiya, un se Ibn Shihab ne bayan kiya ke mujhe Abdur Rahman Bin Abdullah Bin Ka'b Bin Malik ne khabar di aur unhein Abdullah Bin Ka'b ne jab wo nabina ho gaye to wo chalte phirte waqt un ko pakar kar le chalte thay, unhon ne bayan kiya ke mein ne Ka'b Bin Malik Radi Allahu Anhu se suna ke wo ghazwa-e-Tabook mein shareek na hone ka taweel waqia bayan karte thay Ibn Bukair ne apni riwayat mein bayan kiya ke Ka'b ne kaha ke mein Nabi Kareem Sallallahu Alaihi Wasallam ke paas Uqbah ki raat mein hazir tha jab hum ne Islam par qaim rehne ka pukhta ahad kiya tha, mere nazdeek (Lailat-ul-Uqbah ki bai'at) Badr ki larai mein haziri se bhi zyada pasandida hai agarchay logon mein Badr ka charcha is se zyada hai
.

Hum se Ali Bin Abdullah Madini ne bayan kiya, kaha hum se Sufyan Bin Uyainah ne bayan kiya, kaha ke Amr Bin Dinar kaha karte thay ke mein ne Jabir Bin Abdullah Radi Allahu Anhuma se suna unhon ne bayan kiya ke mere do mamoon mujhe bhi Bai'at-e-Uqbah mein sath le gaye thay. Abu Abdullah Imam Bukhari ne kaha ke Ibn Uyainah ne bayan kiya un mein se ek Bara Bin Maroor Radi Allahu Anhu thay
.

Mujh se Ibrahim Bin Musa ne bayan kiya, kaha hum ko Hisham Bin Yusuf ne khabar di, unhein Ibn Juraij ne khabar di, un se Ata ne bayan kiya ke Jabir Radi Allahu Anhu ne kaha mein mere walid aur mere do mamoon teeno Bai'at-e-Uqbah karne walon mein shareek thay
.

Mujh se Ishaq Bin Mansoor ne bayan kiya, unhon ne kaha hum ko Yaqub Bin Ibrahim ne khabar di, unhon ne kaha hum se hamare bhatije Ibn Shihab ne bayan kiya, un se un ke chacha ne bayan kiya aur unhon ne kaha ke humein Abu Idrees Aaizullah Bin Abdullah ne khabar di ke Ubadah Bin Samit Radi Allahu Anhu in Sahaba mein se thay jinhon ne Rasul Allah Sallallahu Alaihi Wasallam ke sath Badr ki larai mein shirkat ki thi aur Uqbah ki raat Nabi Kareem Sallallahu Alaihi Wasallam se ahad kiya tha. Unhon ne bayan kiya ke Rasul Allah Sallallahu Alaihi Wasallam ne farmaya is waqt aap ke paas Sahaba ki ek jamaat thi, ke aao mujh se is baat ka ahad karo ke Allah ke sath kisi ko shareek na thahrao ge, chori na karo ge, zina na karo ge, apni aulad ko qatl na karo ge, apni taraf se ghar kar kisi par tuhmat na lagao ge aur acchi baton mein meri nafarmani na karo ge, pas jo shakhs apne is ahad par qaim rahe ga is ka ajr Allah ke zimme hai aur jis shakhs ne is mein kami ki aur Allah Ta'ala ne ise chupa rehne diya to is ka mamla Allah ke ikhtiyar mein hai, chahe to is par saza de aur chahe maaf kar de. Ubadah Radi Allahu Anhu ne bayan kiya chunanche mein ne Nabi Kareem Sallallahu Alaihi Wasallam se in umoor par bai'at ki
.

Hum se Qutaibah Bin Saeed ne bayan kiya, kaha hum se Lais Bin Saeed ne, un se Yezid Bin Abi Habib ne, un se Abu-ul-Khair Marsad Bin Abdullah ne, un se Abdur Rahman Sanabihi ne aur un se Ubadah Bin Samit Radi Allahu Anhu ne bayan kiya ke mein in naqeebon mein se tha jinhon ne (Uqbah ki raat mein) Rasul Allah Sallallahu Alaihi Wasallam se bai'at ki thi. Aap ne bayan kiya ke hum ne Nabi Kareem Sallallahu Alaihi Wasallam se is ka ahad kiya tha ke hum Allah ke sath kisi ko shareek nahi thahrayein ge, chori nahi karein ge, zina nahi karein ge, kisi aise shakhs ko qatl nahi karein ge jis ka qatl Allah Ta'ala ne haram qarar diya hai, loot maar nahi karein ge aur na Allah ki nafarmani karein ge jannat ke badle mein, agar hum apne ahad mein poore utre. Lekin agar hum ne is mein kuch khilaf kiya to is ka faisla Allah par hai
.

Mujh se Farwah Bin Abi-ul-Maghra ne bayan kiya, kaha hum se Ali Bin Mushir ne bayan kiya, un se Hisham Bin Urwah ne, un se un ke walid ne aur un se Aisha Radi Allahu Anha ne bayan kiya ke Nabi Kareem Sallallahu Alaihi Wasallam se mera nikah jab hua to meri umr chay saal ki thi, phir hum Madinah (hijrat kar ke) aaye aur Bani Haris Bin Khazraj ke yahan qiyam kiya. Yahan aa kar mujhe bukhar charha aur is ki wajah se mere baal girne lage. Phir mondhon tak khoob baal ho gaye phir ek din meri walidah Umm Rooman Radi Allahu Anha aayin. Is waqt mein apni chand saheliyon ke sath jhoola jhool rahi thi unhon ne mujhe pukara to mein hazir ho gayi. Mujhe kuch maloom nahi tha ke mere sath un ka kya irada hai. Aakhir unhon ne mera hath pakar kar ghar ke darwaza ke paas khara kar diya aur mera saans phoola ja raha tha. Thori der mein jab mujhe kuch sukoon hua to unhon ne thora sa pani le kar mere munh aur sar par phera. Phir ghar ke andar mujhe le gayein. Wahan Ansar ki chand aurtein mojood theen, jinhon ne mujhe dekh kar dua di ke khair o barkat aur accha naseeb le kar aayi ho. Meri maan ne mujhe inhein ke hawala kar diya aur unhon ne meri aaraish ki. Is ke baad din charhe achanak Rasul Allah Sallallahu Alaihi Wasallam mere paas tashreef laye aur unhon ne mujhe aap ke supard kar diya meri umr is waqt nau saal thi
.

Hum se Mualla ne bayan kiya, kaha hum se Wuhaib Bin Khalid ne bayan kiya, un se Hisham Bin Urwah ne aur un se Aisha Radi Allahu Anha ne ke Nabi Kareem Sallallahu Alaihi Wasallam ne farmaya ”tum mujhe do martaba khwab mein dikhayi gayi ho. Mein ne dekha ke tum ek reshmi kapre mein lipti hui ho aur kaha ja raha hai ke ye aap ki biwi hain in ka chehra kholeiye. Mein ne chehra khol kar dekha to tum theen. Mein ne socha ke agar ye khwab Allah Ta'ala ki janib se hai to wo khud is ko poora farmaye ga.“
.

Mujh se Ubaid Bin Ismail ne bayan kiya, unhon ne kaha hum se Abu Usama ne bayan kiya, un se Hisham ne, un se un ke walid (Urwah Bin Zubair) ne bayan kiya ke Khadijah Radi Allahu Anha ki wafat Nabi Kareem Sallallahu Alaihi Wasallam ki Madinah ko hijrat se teen saal pehle ho gayi thi. Nabi Kareem Sallallahu Alaihi Wasallam ne aap ki wafat ke taqreeban do saal baad Aisha Radi Allahu Anha se nikah kiya is waqt un ki umr chay saal ki thi jab ruksati hui to wo nau saal ki theen
.

Abdullah Bin Zaid aur Abu Hurairah Radi Allahu Anhuma ne Nabi Kareem Sallallahu Alaihi Wasallam se naqal kiya ke agar hijrat ki fazilat na hoti to mein Ansar ka ek aadmi ban kar rehna pasand karta aur Abu Musa Radi Allahu Anhu ne Nabi Kareem Sallallahu Alaihi Wasallam se riwayat ki ke mein ne khwab dekha ke mein Makkah se ek aaisi zameen ki taraf hijrat kar ke ja raha hoon ke jahan khajoor ke baghat bakasrat hain. Mera zehen is se Yamamah ya Hajar ki taraf gaya lekin ye sar zameen sheher ”Yasrib“ ki thi
.