Mujh se Abdullah Bin Muhammad Musnadi ne bayan kiya, kaha hum se Hisham Bin Yusuf ne bayan kiya, kaha hum ko Ma'mar ne khabar di, unhein Zuhri ne, kaha mujh se Urwah Bin Zubair ne bayan kiya, unhein Ubaidullah Bin Adi ne khabar di ke mein Usman ki khidmat mein hazir hua (doosri sanad) aur Bishr Bin Shuaib ne bayan kiya ke mujh se mere walid ne bayan kiya, un se Zuhri ne kaha, mujh se Urwah Bin Zubair ne bayan kiya aur unhein Ubaidullah Bin Adi Bin Khiyar ne khabar di ke mein Usman Radi Allahu Anhu ki khidmat mein hazir hua to unhon ne hamd o shahadat parhne ke baad farmaya: Amma baad! Koi shakk o shubha nahi ke Allah Ta'ala ne Muhammad Sallallahu Alaihi Wasallam ko haqq ke sath mab'oos kiya, mein bhi in logon mein tha jinhon ne Allah aur is ke rasool ki dawat par (ibtida hi mein) labbaik kaha aur mein in tamam cheezon par iman laya jinhein le kar Nabi Kareem Sallallahu Alaihi Wasallam mab'oos hue thay. Phir mein ne do hijrat ki aur Nabi Kareem Sallallahu Alaihi Wasallam ki damadi ka sharaf mujhe hasil hua aur aap Sallallahu Alaihi Wasallam se mein ne bai'at ki Allah ki qasam ke mein ne aap ki na kabhi nafarmani ki aur na kabhi aap se dhoka bazi ki, yahan tak ke aap ka intiqal ho gaya. Shuaib ke sath is riwayat ki mutabi'at Ishaq Kalbi ne bhi ki hai, un se Zuhri ne is hadees ko isi tarah bayan kiya
.

Hum se Yahya Bin Sulaiman ne bayan kiya, kaha mujh se Abdullah Bin Wahab ne bayan kiya, un se Imam Malik ne bayan kiya (doosri sanad) aur mujhe Yunus ne khabar di, un se Ibn Shihab ne bayan kiya, kaha mujh ko Ubaidullah Bin Abdullah ne khabar di aur unhein Ibn Abbas Radi Allahu Anhuma ne khabar di ke Abdur Rahman Bin Auf Radi Allahu Anhu Mina mein apne khaime ki taraf wapas aa rahe thay. Ye Umar Radi Allahu Anhu ke aakhri hajj ka waqia hai to in ki mujh se mulaqat ho gayi. Unhon ne kaha ke (Umar Radi Allahu Anhu hajiyon ko khitab karne wale thay is liye) mein ne arz kiya ke ay Ameer-ul-Momineen! Mausam-e-hajj mein mamooli sojh boojh rakhne wale sab tarah ke log jama hote hain aur shor o ghul bahut hota hai is liye mera khayal hai ke aap apna irada mauqoof kar dein aur Madinah pahunch kar (khitab farmayein) kyunke wo hijrat aur sunnat ka ghar hai aur wahan samajhdar muaziz aur sahib-e-aql log rehte hain.“ Is par Umar Radi Allahu Anhu ne kaha ke tum theek kehte ho, Madinah pahunchte hi sab se pehli fursat mein logon ko khitab karne ke liye zaroor khara hoon ga
.

Hum se Musa Bin Ismail ne bayan kiya, kaha hum se Ibrahim Bin Saad ne bayan kiya, unhein Ibn Shihab ne khabar di, unhein Kharijah Bin Zaid Bin Sabit ne ke (un ki walidah) Umm-ul-Ala Radi Allahu Anha (ek Ansari khatoon jinhon ne Nabi Kareem Sallallahu Alaihi Wasallam se bai'at ki thi) ne unhein khabar di ke jab Ansar ne Muhajireen ki mezbani ke liye qur'a dala to Usman Bin Maz'oon in ke gharane ke hisse mein aaye thay. Umm-ul-Ala Radi Allahu Anha ne bayan kiya ke phir Usman Radi Allahu Anhu hamare yahan bimar par gaye. Mein ne in ki poori tarah teemardari ki wo na bach sake. Hum ne unhein un ke kapron mein lapeet diya tha. Itne mein Nabi Kareem Sallallahu Alaihi Wasallam bhi tashreef laye to mein ne kaha: Abu Saib! (Usman Radi Allahu Anhu ki kuniyat) tum par Allah ki rahmatein hon, meri tumhare mutaliq gawahi hai ke Allah Ta'ala ne tumhein apne ikram se nawaza hai. Ye sun kar Nabi Kareem Sallallahu Alaihi Wasallam ne farmaya tumhein ye kaise maloom hua ke Allah Ta'ala ne unhein apne ikram se nawaza hai? Mein ne arz kiya mujhe to is silsile mein kuch khabar nahi hai. Mere maan baap aap par fida hon ya Rasul Allah! Lekin aur kise nawaze ga? Nabi Kareem Sallallahu Alaihi Wasallam ne farmaya ke is mein to waqayi koi shakk o shubha nahi ke ek yaqeeni amr (maut) in ko aa chuka hai. Allah ki qasam ke mein bhi in ke liye Allah Ta'ala se khair khwahi ki umeed rakhta hoon lekin mein halankay Allah ka rasool hoon khud apne mutaliq nahi jaan sakta ke mere sath kya mamla ho ga. Umm-ul-Ala Radi Allahu Anha ne arz kiya phir Allah ki qasam ke is ke baad mein ab kisi ke bare mein is ki paaki nahi karoon gi. Unhon ne bayan kiya ke is waqia par mujhe bara ranj hua. Phir mein so gayi to mein ne khwab mein dekha ke Usman Bin Maz'oon ke liye ek behta hua chashma hai. Mein aap ki khidmat mein hazir hui aur aap se apna khwab bayan kiya to aap ne farmaya ke ye in ka amal tha
.

Hum se Ubaidullah Bin Saeed ne bayan kiya, kaha hum se Abu Usama ne bayan kiya, un se Hisham ne, un se un ke walid aur un se Aisha Radi Allahu Anha ne bayan kiya ke Buas ki larai ko (Ansar ke qabail Aus o Khazraj ke darmiyan) Allah Ta'ala ne Rasul Allah Sallallahu Alaihi Wasallam ke Madinah mein aane se pehle hi barpa kara diya tha chunanche jab aap Madinah tashreef laye to Ansar mein phoot pari hui thi aur un ke sardar qatl ho chuke thay. Is mein Allah ki ye hikmat maloom hoti hai ke Ansar Islam qabool kar lein
.

Mujh se Muhammad Bin Musanna ne bayan kiya, kaha hum se Ghundar ne bayan kiya, un se Shuba ne bayan kiya, un se Hisham ne, un se un ke walid ne aur un se Aisha Radi Allahu Anha ne ke Abu Bakr Siddiq Radi Allahu Anhu in ke yahan aaye to Nabi Kareem Sallallahu Alaihi Wasallam bhi wahin tashreef rakhte thay Eid-ul-Fitr ya Eid-ul-Adha ka din tha, do larkiyan Yaum-e-Buas ke bare mein wo ashaar parh rahi theen jo Ansar ke shu'ara ne apne fakhar mein kahe thay. Abu Bakr Radi Allahu Anhu ne kaha ye shaitani gaane baaje! (Nabi Kareem Sallallahu Alaihi Wasallam ke ghar mein) do martaba unhon ne ye jumla dohraya, lekin aap Sallallahu Alaihi Wasallam ne farmaya ”Abu Bakr! Unhein chor do. Har qaum ki eid hoti hai aur hamari eid aaj ka ye din hai.“
.

Hum se Musaddad ne bayan kiya, kaha hum se Abdul Waris ne bayan kiya (doosri sanad) aur hum se Ishaq Bin Mansoor ne bayan kiya, kaha hum ko Abdus Samad ne khabar di, kaha ke mein ne apne walid Abdul Waris se suna, unhon ne bayan kiya ke hum se Abu-al-Tayyah Yezid Bin Humaid Zu'ba'i ne bayan kiya, kaha ke mujh se Anas Bin Malik Radi Allahu Anhu ne bayan kiya, unhon ne kaha ke jab Nabi Kareem Sallallahu Alaihi Wasallam Madinah tashreef laye to Madinah ke buland janib Quba ke ek muhalla mein aap ne (sab se pehle) qiyam kiya jise Bani Amr Bin Auf ka muhalla kaha jata tha. Rawi ne bayan kiya ke Nabi Kareem Sallallahu Alaihi Wasallam ne wahan chaudah raat qiyam kiya phir aap ne qabila Bani-al-Najjar ke logon ko bula bheja. Unhon ne bayan kiya ke Ansar Bani-al-Najjar aap ki khidmat mein talwarein latkaye hue hazir hue. Rawi ne bayan kiya goya is waqt bhi wo manzar meri nazron ke samne hai ke Nabi Kareem Sallallahu Alaihi Wasallam apni sawari par sawar hain. Abu Bakr Siddiq Radi Allahu Anhu isi sawari par aap ke peeche sawar hain aur Bani-al-Najjar ke Ansar aap ke charon taraf halqa banaye hue musallah paidal chale ja rahe hain. Aakhir aap Abu Ayyub Ansari ke ghar ke qareeb utar gaye. Rawi ne bayan kiya ke abhi tak jahan bhi namaz ka waqt ho jata wahin aap namaz parh lete thay. Bakriyon ke rewar jahan raat ko bandhe jaate wahan bhi namaz parh li jati thi. Bayan kiya ke phir aap Sallallahu Alaihi Wasallam ne masjid ki tameer ka hukm farmaya. Aap ne is ke liye qabila Bani-al-Najjar ke logon ko bula bheja. Wo hazir hue to aap Sallallahu Alaihi Wasallam ne farmaya ”ay Banu-al-Najjar! Apne is bagh ki qeemat tay kar lo.“ Unhon ne arz kiya nahi Allah ki qasam hum is ki qeemat Allah ke siwa aur kisi se nahi le sakte. Rawi ne bayan kiya ke is bagh mein wo cheezein theen jo mein tum se bayan karoon ga. Is mein mushrikeen ki qabreintein theen, kuch is mein khandar tha aur khajooron ke darakht bhi thay. Nabi Kareem Sallallahu Alaihi Wasallam ke hukm se mushrikeen ki qabreintein ukharr di gayein, jahan khandar tha ise barabar kiya gaya aur khajooron ke darakht kaat diye gaye. Rawi ne bayan kiya ke khajoor ke tanne masjid ki taraf ek qatar mein bator diwar rakh diye gaye aur darwaza mein (chaukhat ki jagah) patthar rakh diye. Anas Radi Allahu Anhu ne bayan kiya ke Sahaba jab patthar la rahe thay to sher parhte jaate thay Nabi Kareem Sallallahu Alaihi Wasallam bhi un ke sath khud patthar laate aur sher parhte. Sahaba ye sher parhte ke ay Allah! Akhirat hi ki khair, khair hai, pas tu Ansar aur Muhajireen ki madad farma
.

Mujh se Ibrahim Bin Hamza ne bayan kiya, kaha hum se Hatim Bin Ismail ne bayan kiya, un se Abdur Rahman Bin Humaid Zuhri ne bayan kiya, unhon ne Khalifa Umar Bin Abdul Aziz se suna, wo Nimr Kindi ke bhanje Saib Bin Yezid se daryaft kar rahe thay ke tum ne Makkah mein (Muhajir ke) theherne ke masla mein kya suna hai? Unhon ne bayan kiya ke mein ne Ala Bin Hazrami Radi Allahu Anhu se suna wo bayan karte thay ke Rasul Allah Sallallahu Alaihi Wasallam ne farmaya ”Muhajir ko (hajj mein) tawaf-e-wida ke baad teen din theherne ki ijazat hai.“
.

Hum se Abdullah Bin Maslamah Qanabi ne bayan kiya, kaha hum se Abdul Aziz Bin Abu Hazim ne bayan kiya, un se in ke walid Salama Bin Dinar ne, un se Sahl Bin Saad Saidi Radi Allahu Anhu ne bayan kiya ke tareekh ka shumar Nabi Kareem Sallallahu Alaihi Wasallam ki nubuwat ke saal se hua aur na aap ki wafat ke saal se balkay is ka shumar Madinah ki hijrat ke saal se hua
.

Hum se Musaddad ne bayan kiya, kaha hum se Yezid Bin Zurai ne bayan kiya, kaha hum se Ma'mar ne bayan kiya, un se Zuhri ne, un se Urwah ne aur un se Aisha Radi Allahu Anha ne bayan kiya ke (pehle) namaz sirf do rakat farz hui thi phir Nabi Kareem Sallallahu Alaihi Wasallam ne hijrat ki to wo farz rakaat char rakaat ho gayein. Albatta safar ki halat mein namaz apni halat mein baqi rakkhi gayi. Is riwayat ki mutabi'at Abdur Razzaq ne Ma'mar se ki hai
.

Hum se Yahya Bin Qaza'ah ne bayan kiya, kaha hum se Ibrahim Bin Saad ne bayan kiya, un se Zuhri ne, un se Aamir Bin Saad Bin Malik aur un se in ke walid Saad Bin Abi Waqqas Radi Allahu Anhu ne bayan kiya ke Nabi Kareem Sallallahu Alaihi Wasallam Hajjat-ul-Wida 10 Hijri ke mauqa par meri mizaj pursi ke liye tashreef laye. Is marz mein mere bachne ki koi umeed nahi rahi thi. Mein ne arz kiya: Ya Rasul Allah! Marz ki shiddat aap khud mulahiza farma rahe hain, mere paas mal bahut hai aur sirf meri ek larki waris hai to kya mein apne do tihayi mal ka sadqa kar doon? Nabi Kareem Sallallahu Alaihi Wasallam ne farmaya ke nahi. Mein ne arz kiya phir aadhe ka kar doon? Farmaya ke Saad! Bas ek tihayi ka kar do, ye bhi bahut hai. To agar apni aulad ko maldar chor kar jaye to ye is se behtar hai ke unhein muhtaj chore aur wo logon ke samne hath phailate phirein. Ahmad Bin Yunus ne bayan kiya, un se Ibrahim Bin Saad ne ke tum apni aulad ko chor kar jo kuch bhi kharch karo ge aur is se Allah Ta'ala ki raza mandi maqsood ho gi to Allah Ta'ala tumhein is ka sawab de ga, Allah tumhein is luqma par bhi sawab de ga jo tum apni biwi ke munh mein dalo ge. Mein ne poocha: Ya Rasul Allah! Kya mein apne sathiyon se peeche Makkah mein reh jaoon ga. Nabi Kareem Sallallahu Alaihi Wasallam ne farmaya ke tum peeche nahi raho ge aur tum jo bhi amal karo ge aur is se maqsood Allah Ta'ala ki raza mandi ho gi to tumhara martaba is ki wajah se buland hota rahe ga aur shayad tum abhi bahut dinon tak zinda raho ge tum se bahut se logon (musalmanon) ko nafa pahunche ga aur bahuton ko (ghair-musalmanon) nuqsan ho ga. Ay Allah! Mere Sahaba ki hijrat poori kar de aur unhein ulte paon wapas na kar (ke wo hijrat ko chor kar apne gharon ko wapas aa jayein) albatta Saad Bin Khawlah nuqsan mein par gaye aur Ahmad Bin Yunus aur Musa Bin Ismail ne is hadees ko Ibrahim Bin Saad se riwayat kiya is mein (apni aulad zurriyat ko choro, ke bajaye) tum apne warison ko choro ye alfaz marwi hain
.