Hum se Ahmad Bin Usman ne bayan kiya, kaha ke un se Shuraih Bin Maslamah ne bayan kiya, un se Ibrahim Bin Yusuf ne, un se un ke walid Yusuf Bin Ishaq ne, un se Abu Ishaq Sabi'i ne bayan kiya ke mein ne Bara Bin Azib Radi Allahu Anhuma se hadees suni wo bayan karte thay ke Abu Bakr Radi Allahu Anhu ne Azib Radi Allahu Anhu se ek palan khareeda aur mein un ke sath utha kar pahunchane laya tha. Unhon ne bayan kiya ke Abu Bakr Radi Allahu Anhu se Azib Radi Allahu Anhu ne Rasul Allah Sallallahu Alaihi Wasallam ke safar-e-hijrat ka haal poocha to unhon ne bayan kiya ke chunkay hamari nigrani ho rahi thi (yani kuffar hamari taak mein thay) is liye hum (ghar se) raat ke waqt bahar aaye aur poori raat aur din bhar bahut tezi ke sath chalte rahe, jab dopahar hui to humein ek chatan dikhayi di. Hum is ke qareeb pahunche to is ki aar mein thora sa saya bhi mojood tha. Abu Bakr Radi Allahu Anhu ne bayan kiya ke mein ne Nabi Kareem Sallallahu Alaihi Wasallam ke liye ek chamra bicha diya jo mere sath tha. Aap is par lait gaye, aur mein qurb o jawar ki gard jharne laga. Ittifaq se ek charwaha nazar para jo apni bakriyon ke thore se rewar ke sath isi chatan ki taraf aa raha tha is ka maqsad is chatan se wahi tha jis ke liye hum yahan aaye thay (yani saya hasil karna) mein ne is se poocha larke tu kis ka ghulam hai? Us ne bataya ke falan ka hoon. Mein ne is se poocha kya tum apni bakriyon se kuch doodh nikal sakte ho us ne kaha ke haan phir wo apne rewar se ek bakri laya to mein ne is se kaha ke pehle is ka thann jhar lo. Unhon ne bayan kiya ke phir is ne kuch doodh doha. Mere sath pani ka ek chagal tha. Is ke munh par kapra bandha hua tha. Ye pani mein ne Nabi Kareem Sallallahu Alaihi Wasallam ke liye sath le rakkha tha. Wo pani mein ne is doodh par itna dala ke wo neeche tak thanda ho gaya to mein ise Nabi Kareem Sallallahu Alaihi Wasallam ki khidmat mein le kar hazir hua aur arz kiya doodh nosh farmaiye ya Rasul Allah! Aap Sallallahu Alaihi Wasallam ne ise nosh farmaya jis se mujhe bahut khushi hasil hui. Is ke baad hum ne phir kooch shuru kiya aur dhoondne wale log hamari talash mein thay
.

Bara ne bayan kiya ke jab mein Abu Bakr Radi Allahu Anhu ke sath un ke ghar mein dakhil hua tha to aap ki sahibzadi Aisha Radi Allahu Anha leti hui theen unhein bukhar aa raha tha mein ne un ke walid ko dekha ke unhon ne un ke rukhsar par bosa diya aur daryaft kiya beti! Tabiyat kaisi hai?
.

Hum se Sulaiman Bin Abdur Rahman ne bayan kiya, kaha hum se Muhammad Bin Humair ne bayan kiya, kaha hum se Ibrahim Bin Abi Ablah ne bayan kiya, un se Uqbah Bin Wasaj ne bayan kiya aur un se Nabi Kareem Sallallahu Alaihi Wasallam ke khadim Anas Bin Malik Radi Allahu Anhu ne bayan kiya ke jab Nabi Kareem Sallallahu Alaihi Wasallam (Madinah Munawwarah) tashreef laye to Abu Bakr Radi Allahu Anhu ke siwa aur koi aap ke ashab mein aisa nahi tha jis ke baal safaid ho rahe hon, is liye aap ne mehandi aur wasmah ka khizab istemal kiya tha
.

Aur Duhaim ne bayan kiya, un se Walid ne bayan kiya, kaha hum se Awzai ne bayan kiya, kaha mujh se Abu Ubaid ne bayan kiya, un se Uqbah Bin Wasaj ne unhon ne kaha ke mujh se Anas Bin Malik Radi Allahu Anhu ne bayan kiya ke jab Nabi Kareem Sallallahu Alaihi Wasallam Madinah tashreef laye to aap Sallallahu Alaihi Wasallam ke ashab mein sab se zyada umr Abu Bakr Radi Allahu Anhu ki thi is liye unhon ne mehandi aur wasmah ka khizab istemal kiya. Is se aap ke balon ka rang khoob surkhi mayal ba siyah ho gaya
.

Hum se Asbagh Bin Faraj ne bayan kiya, kaha hum se Abdullah Bin Wahab ne bayan kiya, un se Yunus ne, un se Ibn Shihab ne, un se Urwah Bin Zubair ne, un se Aisha Radi Allahu Anha ne ke Abu Bakr Radi Allahu Anhu ne qabila Banu Kalb ki ek aurat Umm Bakr nami se shadi kar li thi. Phir jab unhon ne hijrat ki to ise talaq de aaye. Is aurat se phir is ke chacha zaad bhai (Abu Bakr Shaddad Bin Aswad) ne shadi kar li thi, ye shakhs shayar tha aur isi ne ye mashhoor marsiye kuffar-e-Quraish ke bare mein kaha tha ”maqam-e-Badr ke kunwon ko mein kya kahoon ke unhon ne humein darakht-e-sheezi ke bare bare piyalon se mahroom kar diya jo kabhi oont ke kohan ke gosht se behtar hua karte thay, mein Badr ke kunwon ko kya kahoon! Unhon ne humein gaane wali laundiyon aur acche sharabiyon se mahroom kar diya Umm Bakr to mujhe salamti ki dua deti rahi lekin meri qaum ki barbadi ke baad mere liye salamti kahan hai ye rasool humein dobara zindagi ki khabrein bayan karta hai. Kahin ulloo ban jaane ke baad phir zindagi kis tarah mumkin hai
.

Hum se Musa Bin Ismail ne bayan kiya, kaha hum se Hammam ne bayan kiya, un se Sabit ne, un se Anas Radi Allahu Anhu ne aur un se Abu Bakr Radi Allahu Anhu ne bayan kiya ke mein Nabi Kareem Sallallahu Alaihi Wasallam ke sath ghar mein tha. Mein ne jo sar uthaya to qaum ke chand logon ke qadam (bahar) nazar aaye mein ne kaha, ay Allah ke nabi! Agar in mein se kisi ne bhi neeche jhuk kar dekh liya to wo humein zaroor dekh le ga. Nabi Kareem Sallallahu Alaihi Wasallam ne farmaya ”Abu Bakr! Khamosh raho hum aise do hain jin ka teesra Allah hai.“
.

Hum se Ali Bin Abdullah ne bayan kiya, kaha hum se Walid Bin Muslim Dimashqi ne bayan kiya, kaha hum se Imam Awzai ne bayan kiya, (doosri sanad) aur Muhammad Bin Yusuf ne bayan kiya ke hum se Imam Awzai ne bayan kiya, kaha mujh se Zuhri ne bayan kiya, kaha ke mujh se Ata Bin Yezid Laisi ne bayan kiya, kaha ke mujh se Abu Saeed Khudri Radi Allahu Anhu ne bayan kiya kaha ke ek aarabi Nabi Kareem Sallallahu Alaihi Wasallam ki khidmat mein hazir hua aur aap Sallallahu Alaihi Wasallam se hijrat ka haal poochne laga. Aap Sallallahu Alaihi Wasallam ne farmaya ”tujh par afsos! Hijrat to bahut mushkil hai. Tumhare paas kuch oont bhi hain?“ Us ne kaha ji haan hain. Farmaya ”tum is ki zakat ada karte ho?“ Us ne arz kiya ji haan ada karta hoon. Aap Sallallahu Alaihi Wasallam ne farmaya ”oontniyon ka doodh doosre (muhtajon) ko bhi dohne ke liye de diya karte ho?“ Us ne arz kiya ke aisa bhi karta hoon. Aap Sallallahu Alaihi Wasallam ne farmaya ”unhein ghaat par le ja kar (muhtajon ke liye) dohte ho?“ Us ne arz kiya aisa bhi karta hoon. Is par aap Sallallahu Alaihi Wasallam ne farmaya ”phir tum saat samundar paar amal karo, Allah Ta'ala tumhare kisi amal ka bhi sawab kam nahi kare ga.“
.

Hum se Abu-ul-Walid ne bayan kiya, kaha hum se Shuba ne bayan kiya, kaha ke humein Abu Ishaq ne khabar di, unhon ne Bara Bin Azib Radi Allahu Anhuma se suna, unhon ne yun bayan kiya ke sab se pehle (hijrat kar ke) hamare yahan Mus'ab Bin Umair Radi Allahu Anhu aur Ibn Umm Maktoom Radi Allahu Anhu aaye phir Ammar Bin Yasir Radi Allahu Anhuma aur Bilal Radi Allahu Anhu aaye
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya, un se Abu Ishaq ne bayan kiya aur unhon ne Bara Bin Azib Radi Allahu Anhuma se suna, unhon ne bayan kiya ke sab se pehle hamare yahan Mus'ab Bin Umair Radi Allahu Anhu aur Ibn Umm Maktoom Radi Allahu Anhu (nabina) aaye ye dono (Madinah ke) musalmanon ko Quran parhna sikhate thay. Is ke baad Bilal, Saad aur Ammar Bin Yasir Radi Allahu Anhum aaye. Phir Umar Bin Khattab Radi Allahu Anhu Nabi Kareem Sallallahu Alaihi Wasallam ke bees Sahaba ko sath le kar aaye aur Nabi Kareem Sallallahu Alaihi Wasallam (Abu Bakr Radi Allahu Anhu aur Aamir Bin Fuhairah ko sath le kar) tashreef laye. Madinah ke logon ko jitni khushi aur musarrat aap Sallallahu Alaihi Wasallam ki tashreef aawari se hui mein ne kabhi unhein kisi baat par is qadar khush nahi dekha. Laundiyan bhi (khushi mein) kehne lagein ke Rasul Allah Sallallahu Alaihi Wasallam aa gaye aap Sallallahu Alaihi Wasallam jab tashreef laye to is se pehle mein mufassal ki doosri kai suraton ke sath «Sabbihisma Rabbikal Ala» bhi seekh chuka tha
.

Hum se Abdullah Bin Yusuf ne bayan kiya, unhon ne kaha hum ko Malik ne khabar di, unhein Hisham Bin Urwah ne, unhein un ke walid Urwah Bin Zubair ne aur un se Aisha Radi Allahu Anha ne bayan kiya ke jab Rasul Allah Sallallahu Alaihi Wasallam Madinah tashreef laye to Abu Bakr aur Bilal Radi Allahu Anhuma ko bukhar charha aaya, mein un ki khidmat mein hazir hui aur arz kiya: Walid sahib! Aap ki tabiyat kaisi hai? Unhon ne bayan kiya ke Abu Bakr Radi Allahu Anhu ko jab bukhar charha to ye sher parhne lage. ”Har shakhs apne ghar walon ke sath subah karta hai aur maut to joti ke tasme se bhi zyada qareeb hai.“ Aur Bilal Radi Allahu Anhu ke bukhar mein jab kuch takhfeef hoti to zor zor se rote aur ye sher parhte ”kash mujhe ye maloom ho jata ke kabhi mein ek raat bhi wadi-e-Makkah mein guzar sakoon ga jab ke mere ard-gird (khushbudar ghaas) izkhir aur jaleel hon gi, aur kya ek din bhi mujhe aisa mil sake ga jab mein maqam-e-Majannah ke pani par jaoon ga aur kya Shamah aur Tufail ki pahariyon ko ek nazar dekh sakoon ga.“ Aisha Radi Allahu Anha ne bayan kiya ke phir mein aap Sallallahu Alaihi Wasallam ki khidmat mein hazir hui aur aap ko ittila di to aap Sallallahu Alaihi Wasallam ne dua ki «Allahumma habbib ilaynal Madinata kahubbina Makkata au ashadda, wa sahhih-ha wa barik lana fi sa'i-ha wa muddi-ha, wanqul humma-ha faj'al-ha bil Juhfati» ”Ay Allah! Madinah ki mohabbat hamare dil mein itni paida kar de jitni Makkah ki thi balkay is se bhi zyada, yahan ki aab o hawa ko sehat bakhsh bana. Hamare liye yahan ke sa' aur mudd (anaaj napne ke paimane) mein barkat inayat farma aur yahan ke bukhar ko maqam-e-Juhfah mein bhej de
.