Hum se Ali bin Abdullah Madini ne bayan kiya, kaha hum se Sufyan bin Uyainah ne bayan kiya, kaha ke Ismail ne bayan kiya ke mujh ko Qais ne khabar di, unhon ne kaha ke hum Abu Hurairah Radi Allahu Anhu ki khidmat mein hazir hue to unhon ne kaha ke mein Rasoolullah Sallallahu Alaihi Wa Sallam ki suhbat mein teen saal raha hun, apni poori umar mein mujhe hadeeth yaad karne ka itna shouq kabhi nahi hua jitna in teen saalon mein tha. Mein ne Nabi Kareem Sallallahu Alaihi Wa Sallam ko farmate suna, Aap ne apne hath se yun ishara kar ke farmaya ke Qiyamat ke qareeb tum log (Musalman) ek aisi qoum se jang karoge jin ke joote baalon ke honge (murad yahi Irani hain) Sufyan ne ek martaba "wa huwa haza al-bariz" ke bajaye alfaz "wa hum ahl al-bazir" naqal kiye (yani Irani, ya Kurdi, ya Deelam wale log murad hain).

Hum se Sulaiman bin Harb ne bayan kiya, kaha hum se Jarir bin Hazim ne bayan kiya, kaha mein ne Hasan se suna, unhon ne bayan kiya ke hum se Amr bin Taghlib Radi Allahu Anhu ne bayan kiya ke mein ne Rasoolullah Sallallahu Alaihi Wa Sallam se suna, Aap Sallallahu Alaihi Wa Sallam ne farmaya "Qiyamat ke qareeb tum ek aisi qoum se jang karoge jo baalon ka joota pehenti hogi aur ek aisi qoum se jang karoge jin ke munh teh-ba-teh dhaalon ki tarah honge."

Hum se Hakam bin Nafi ne bayan kiya, kaha hum ko Shuaib ne khabar di, un se Zuhri ne bayan kiya, kaha ke mujhe Salim bin Abdullah ne khabar di ke Abdullah bin Umar Radi Allahu Anhuma ne bayan kiya ke mein ne Rasoolullah Sallallahu Alaihi Wa Sallam ko yeh farmate suna tha ke tum Yahudiyon se ek jang karoge aur is mein un par ghalib aa jaoge. Is waqt yeh kaifiyat hogi ke (agar koi Yahudi jaan bachane ke liye kisi pahar mein bhi chup jayega to) patthar bolega ke Ae Musalman! Yeh Yahudi meri aar mein chupa hua hai, ise qatal kar de.

Hum se Qutaibah bin Sa'id ne bayan kiya, kaha hum se Sufyan ne bayan kiya, un se Amr ne, un se Jabir bin Abdullah Radi Allahu Anhuma ne aur un se Abu Sa'id Khudri Radi Allahu Anhu ne ke Nabi Kareem Sallallahu Alaihi Wa Sallam ne farmaya "Logon par ek aisa zamana aayega ke jihad ke liye fauj jama hogi, poocha jayega ke fauj mein koi aise buzurg bhi hain unhon ne Rasoolullah Sallallahu Alaihi Wa Sallam ki suhbat uthayi ho? Un se kaha jayega ke haan hain to un ke zariye fatah ki dua mangi jayegi. Phir ek jihad hoga aur poocha jayega: Kya fauj mein koi aise shakhs hain unhon ne Rasoolullah Sallallahu Alaihi Wa Sallam ke kisi sahabi ki suhbat uthayi ho? Un se kaha jayega ke haan hain to un ke zariye fatah ki dua mangi jayegi. Phir un ki dua ki barkat se fatah hogi."

Mujh se Muhammad bin Hakam ne bayan kiya, kaha hum ko Nadr ne khabar di, kaha hum ko Israil ne khabar di, kaha hum ko Sa'd Tai ne khabar di, unhein Mahall bin Khalifah ne khabar di, un se Adi bin Hatim Radi Allahu Anhu ne bayan kiya ke mein Nabi Kareem Sallallahu Alaihi Wa Sallam ki khidmat mein hazir tha ke ek sahib aaye aur Aap Sallallahu Alaihi Wa Sallam se faqr-o-faqah ki shikayat ki, phir doosre sahib aaye aur raston ki bad-amni ki shikayat ki, is par Nabi Kareem Sallallahu Alaihi Wa Sallam ne farmaya: Adi! Tum ne Maqam-e-Heerah dekha hai? (jo Kufa ke pas ek basti hai) Mein ne arz kiya ke mein ne dekha to nahi, albatta is ka naam mein ne suna hai. Aap Sallallahu Alaihi Wa Sallam ne farmaya: Agar tumhari zindagi kuch aur lambi hui to tum dekhoge ke houdaj mein ek aurat akeli Heerah se safar karegi aur (Makkah pahunch kar) Ka'bah ka tawaf karegi aur Allah ke siwa ise kisi ka bhi khouf na hoga. Mein ne (hairat se) apne dil mein kaha, phir qabeela Tayy ke in dakoon ka kya hoga jinhon ne shehron ko tabah kar diya hai aur fasad ki aag sulga rakhi hai. Nabi Kareem Sallallahu Alaihi Wa Sallam ne farmaya: Agar tum kuch aur dinon tak zinda rahe to Kisra ke khazane (tum par) khole jayenge. Mein (hairat mein) bol para Kisra bin Hurmuz (Iran ka badshah) Kisra? Aap Sallallahu Alaihi Wa Sallam ne farmaya: Haan Kisra bin Hurmuz! Aur agar tum kuch dinon tak aur zinda rahe to yeh bhi dekhoge ke ek shakhs apne hath mein sona chandi bhar kar niklega, ise kisi aise aadmi ki talash hogi (jo is ki zakat) qubool kar le lekin ise koi aisa aadmi nahi milega jo ise qubool kar le. Allah Ta'ala se mulaqat ka jo din muqarrar hai is waqt tum mein se har koi Allah se is haal mein mulaqat karega ke darmiyan mein koi tarjuman na hoga (balkay Parwardigar us se bila-wasita batein karega) Allah Ta'ala us se daryaft karega. Kya mein ne tumhare pas Rasool nahi bheje thay jinhon ne tum tak mera paigham pahuncha diya ho? Woh arz karega beshak Tu ne bheja tha. Allah Ta'ala daryaft farmayega kya mein ne mal aur aulad tumhein nahi di thi? Kya mein ne un ke zariye tumhein fazeelat nahi di thi? Woh jawab dega beshak Tu ne diya tha. Phir woh apni dahni taraf dekhega to siwa Jahannum ke ise aur kuch nazar na aayega phir woh bain taraf dekhega to idhar bhi Jahannum ke siwa aur kuch nazar nahi aayega. Adi Radi Allahu Anhu ne bayan kiya ke mein ne Rasoolullah Sallallahu Alaihi Wa Sallam se suna, Aap farma rahe thay ke Jahannum se daro, agarchay khajoor ke ek tukre ke zariye ho. Agar kisi ko khajoor ka ek tukra bhi muyassar na aa sake to (kisi se) ek accha kalma hi keh de. Adi Radi Allahu Anhu ne bayan kiya ke mein ne houdaj mein baithi hui ek akeli aurat ko to khud dekh liya ke Heerah se safar ke liye nikli aur (Makkah pahunch kar) us ne Ka'bah ka tawaf kiya aur ise Allah ke siwa aur kisi se (dakoo waghaira) ka (raste mein) khouf nahi tha aur mujahideen ki is jama'at mein to mein khud shareek tha jis ne Kisra bin Hurmuz ke khazane fatah kiye. Aur agar tum log kuch dinon aur zinda rahe to woh bhi dekh loge jo Nabi Kareem Sallallahu Alaihi Wa Sallam ne farmaya ke ek shakhs apne hath mein (zakat ka sona chandi) bhar kar niklega (lekin ise lene wala koi nahi milega) Mujh se Abdullah bin Muhammad ne bayan kiya, kaha hum se Abu Asim ne bayan kiya, kaha hum ko Sa'dan bin Bishr ne khabar di, un se Abu Mujahid ne bayan kiya, un se Mahall bin Khalifah ne bayan kiya, aur unhon ne Adi Radi Allahu Anhu se suna ke mein Nabi Kareem Sallallahu Alaihi Wa Sallam ki khidmat mein hazir tha, phir yahi hadeeth naqal ki jo upar mazkoor hui.

Mujh se Sa'id bin Sharahbeel ne bayan kiya, kaha hum se Laith ne bayan kiya, un se Yazid bin Habib ne, un se Abu al-Khair ne, un se Uqbah bin Aamir Radi Allahu Anhu ne ke Nabi Kareem Sallallahu Alaihi Wa Sallam ek din Madinah se bahar nikle aur Shuhada-e-Uhud par namaz parhi jaise mayyat par parhte hain. Is ke baad Aap Sallallahu Alaihi Wa Sallam mimbar par tashreef laye aur Aap Sallallahu Alaihi Wa Sallam ne farmaya "Mein (Houz-e-Kausar par) tum se pehle pahunchunga aur Qiyamat ke din tumhare liye meer saman banunga. Mein tum par gawahi dunga aur Allah ki qasam mein apne Houz-e-Kausar ko is waqt bhi dekh raha hun, mujhe roye zameen ke khazanon ki kunjiyan di gayi hain aur qasam Allah ki mujhe tumhare bare mein yeh khouf nahi ke tum shirk karne lagoge. Mein to is se darta hun ke kahin dunya dari mein par kar ek doosre se rashk-o-hasad na karne lago."

Hum se Abu Nu'aim ne bayan kiya, un se Sufyan bin Uyainah ne bayan kiya, un se Zuhri ne, un se Urwah bin Zubair ne aur un se Usama bin Zaid Radi Allahu Anhuma ne bayan kiya ke Nabi Kareem Sallallahu Alaihi Wa Sallam ek martaba Madinah ke ek buland teela par charhe aur farmaya "Jo kuch mein dekh raha hun kya tumhein bhi nazar aa raha hai? Mein fitnon ko dekh raha hun ke tumhare gharon mein woh is tarah gir rahe hain jaise barish ki boondein gira kartin hain."

Hum se Abu al-Yaman ne bayan kiya, kaha hum se Shuaib ne khabar di, unhein Zuhri ne, kaha ke mujh se Urwah bin Zubair ne bayan kiya, un se Zainab bint Abi Salamah ne bayan kiya, un se Umm-e-Habibah bint Abi Sufyan Radi Allahu Anha ne bayan kiya ke hum ko Zainab bint Abi Jahsh Radi Allahu Anha ne khabar di ke ek din Nabi Kareem Sallallahu Alaihi Wa Sallam un ke ghar tashreef laye to Aap Sallallahu Alaihi Wa Sallam bahut pareshan nazar aa rahe thay aur yeh farma rahe thay ke Allah Ta'ala ke siwa aur koi mabood nahi, Arab ke liye tabahi is shar se aayegi jis ke waqia hone ka zamana qareeb aa gaya hai. Aaj Yajooj Majooj ki diwar mein itna shigaaf paida ho gaya hai aur Aap Sallallahu Alaihi Wa Sallam ne ungliyon se halqa bana kar is ki wazahat ki. Umm-ul-Momineen Zainab Radi Allahu Anha ne bayan kiya ke mein ne arz kiya: Ya Rasul Allah! Hum mein naik log honge phir bhi hum halak kar diye jayenge? Aap Sallallahu Alaihi Wa Sallam ne farmaya ke haan jab khabasatein barh jayengi (to aisa hoga).

Aur Zuhri se riwayat hai, un se Hind bint al-Harith ne bayan kiya ke Umm-e-Salamah Radi Allahu Anha ne bayan kiya ke Nabi Kareem Sallallahu Alaihi Wa Sallam bedar hue to farmaya "Subhan Allah! Kaise kaise khazane utre hain (jo Musalmanon ko milenge) aur kya kya fitne-o-fasad utre hain."

Hum se Abu Nu'aim ne bayan kiya, kaha hum se Abdul Aziz bin Abi Salamah bin Majishoon ne bayan kiya, un se Abdur Rahman bin Abi Sasa'h ne, un se un ke walid ne kaha, un se Abu Sa'id Khudri Radi Allahu Anhu ne bayan kiya ke mein dekh raha hun ke tumhein bakriyon se bahut mohabbat hai aur tum unhein palte ho to tum un ki nigahdasht acchi kiya karo aur un ki naak ki safayi ka bhi khayal rakha karo. Kyunke mein ne Nabi Kareem Sallallahu Alaihi Wa Sallam se suna, Aap Sallallahu Alaihi Wa Sallam ne farmaya ke logon par aisa zamana aayega ke Musalman ka sab se umdah mal us ki bakriyan hongi jinhein le kar woh pahar ki chotiyon par charh jayega ya (Aap ne "sa'af al-jibaal" ke lafz farmaye) woh barish girne ki jagah mein chala jayega. Is tarah woh apne deen ko fitnon se bachane ke liye bhagta phirega.