Hum se Amr bin Abbas ne bayan kiya, kaha hum se Abdur Rahman bin Mahdi ne bayan kiya, kaha hum se Sufyan Sawri ne bayan kiya, un se Muhammad bin Munkadir ne aur un se Jabir bin Abdullah Radi Allahu Anhuma ne bayan kiya ke (un ki shadi ke mauqay par) Nabi Kareem Sallallahu Alaihi Wa Sallam ne daryaft farmaya kya tumhare pas qaleen hain? Mein ne arz kiya, hamare pas qaleen kahan? (hum ghareeb log hain) Is par Nabi Kareem Sallallahu Alaihi Wa Sallam ne farmaya "Yaad rakho ek waqt aayega ke tumhare pas umdah umdah qaleen honge." Ab jab mein is se (apni biwi se) kehta hun ke apne qaleen hata le to woh kehti hai ke kya Nabi Kareem Sallallahu Alaihi Wa Sallam ne tum se nahi farmaya tha ke ek waqt aayega jab tumhare pas qaleen honge. Chunanche mein unhein wahin rehne deta hun (aur chup ho jata hun).

Hum se Ahmad bin Ishaq ne bayan kiya, kaha hum se Ubaidullah bin Musa ne bayan kiya, kaha hum se Israil ne bayan kiya, un se Abu Ishaq ne, un se Amr bin Maimoon ne aur un se Abdullah bin Mas'ud Radi Allahu Anhu ne bayan kiya ke Sa'd bin Mu'adh Radi Allahu Anhu umrah ki niyat se (Makkah) aaye aur Abu Safwan Umaiyah bin Khalaf ke yahan utre. Umaiyah bhi Shaam jate hue (tijarat waghaira ke liye) jab Madinah se guzarta to Sa'd bin Mu'adh Radi Allahu Anhu ke yahan qayam kiya karta tha. Umaiyah ne Sa'd Radi Allahu Anhu se kaha: Abhi thehro, jab dopahar ka waqt ho jaye aur log ghafil ho jayein (tab tawaf karna kyunke Makkah ke mushrik Musalmanon ke dushman thay) Sa'd Radi Allahu Anhu kehte hain, chunanche mein ne ja kar tawaf shuru kar diya. Sa'd Radi Allahu Anhu abhi tawaf kar hi rahe thay ke Abu Jahl aa gaya aur kehne laga, yeh Ka'bah ka tawaf kon kar raha hai? Sa'd Radi Allahu Anhu bole ke mein Sa'd hun. Abu Jahl bola: Tum Ka'bah ka tawaf khoob aman se kar rahe ho halankay Muhammad Sallallahu Alaihi Wa Sallam aur is ke sathiyon ko panah de rakhi hai. Sa'd Radi Allahu Anhu ne kaha: Haan theek hai. Is tarah dono mein baat barh gayi. Phir Umaiyah ne Sa'd Radi Allahu Anhu se kaha: Abu al-Hakam (Abu Jahl) ke samne unchi awaz se na bolo. Woh is waadi (Makkah) ka sardar hai. Is par Sa'd Radi Allahu Anhu ne kaha: Allah ki qasam agar tum ne mujhe Baitullah ke tawaf se roka to mein bhi tumhari Shaam ki tijarat khak mein mila dunga (kyunke Shaam jane ka sirf ek hi rasta hai jo Madinah se jata hai) bayan kiya ke Umaiyah barabar Sa'd Radi Allahu Anhu se yahi kehta raha ke apni awaz buland na karo aur unhein (muqabla se) rokta raha. Aakhir Sa'd Radi Allahu Anhu ko is par ghussa aa gaya aur unhon ne Umaiyah se kaha. Chal pare hatt mein ne Muhammad Sallallahu Alaihi Wa Sallam se tere mutalliq suna hai. Aap ne farmaya tha ke tujh ko Abu Jahl hi qatal karayega. Umaiyah ne poocha: Mujhe? Sa'd Radi Allahu Anhu kaha: Haan tujh ko. Tab to Umaiyah kehne laga. Allah ki qasam Muhammad (Sallallahu Alaihi Wa Sallam) jab koi baat kehte hain to woh ghalat nahi hoti phir woh apni biwi ke pas aaya aur us ne us se kaha tumhein maloom nahi, mere Yathribi bhai ne mujhe kya baat batayi hai? Us ne poocha: Unhon ne kya kaha? Umaiyah ne bataya ke Muhammad (Sallallahu Alaihi Wa Sallam) keh chuke hain ke Abu Jahl mujh ko qatal karayega. Woh kehne lagi. Allah ki qasam Muhammad Sallallahu Alaihi Wa Sallam ghalat baat zaban se nahi nikalte. Phir aisa hua ke ahl-e-Makkah Badr ki ladayi ke liye rawana hone lage aur Umaiyah ko bhi bulane wala aaya to Umaiyah se us ki biwi ne kaha, tumhein yaad nahi raha tumhara Yathribi bhai tumhein kya khabar de gaya tha. Bayan kiya ke is yaaddahani par Umaiyah ne chaha ke is jang mein shirkat na kare. Lekin Abu Jahl ne kaha: Tum waadi Makkah ke raees ho. Is liye kam az kam ek ya do din ke liye hi tumhein chalna parega. Is tarah woh un ke sath jang mein shirkat ke liye nikla aur Allah Ta'ala ne is ko qatal kara diya.

Hum se Abbas bin Waleed Narsi ne bayan kiya, kaha hum se Mutamir bin Sulaiman ne bayan kiya kaha ke mein ne apne walid se suna, un se Abu Usman ne bayan kiya ke mujhe yeh baat maloom karayi gayi ke Jibrail Alaihis Salam ek martaba Nabi Kareem Sallallahu Alaihi Wa Sallam ke pas aaye aur Aap se batein karte rahe. Is waqt Aap Sallallahu Alaihi Wa Sallam ke pas Umm-ul-Momineen Umm-e-Salamah Radi Allahu Anha baithi hui thin. Jab Jibrail Alaihis Salam chale gaye to Aap Sallallahu Alaihi Wa Sallam ne Umm-e-Salamah se farmaya: Maloom hai yeh kon sahib thay? Ya aise hi alfaz irshad farmaye. Abu Usman ne bayan kiya ke Umm-e-Salamah ne jawab diya ke yeh Dihyah Kalbi Radi Allahu Anhu thay. Umm-e-Salamah ne bayan kiya Allah ki qasam mein samjhe baithi thi ke woh Dihyah Kalbi Radi Allahu Anhu hain. Aakhir jab mein ne Aap Sallallahu Alaihi Wa Sallam ka khutba suna jis mein Aap Jibrail Alaihis Salam (ki aamad) ki khabar de rahe thay to mein samjhi ke woh Jibrail Alaihis Salam hi thay. Ya aise hi alfaz kahe. Bayan kiya ke mein ne Abu Usman se poocha ke Aap ne yeh hadeeth kis se suni? To unhon ne bataya ke Usama bin Zaid Radi Allahu Anhuma se suni hai.

Mujh se Abdur Rahman bin Abi Shaibah ne bayan kiya, kaha hum se Abdur Rahman bin Mugheerah ne bayan kiya, un se un ke walid ne, un se Musa bin Uqbah ne, un se Salim bin Abdullah ne aur un se Abdullah bin Umar Radi Allahu Anhuma ne ke Rasoolullah Sallallahu Alaihi Wa Sallam ne farmaya "Mein ne (khwab mein) dekha ke log ek maidan mein jama ho rahe hain. In mein se Abu Bakr Radi Allahu Anhu uthe aur ek kunwein se unhon ne ek ya do dol pani bhar kar nikala, pani nikalne mein in mein kuch kamzori maloom hoti thi aur Allah un ko bakhshe. Phir woh dol Umar Radi Allahu Anhu ne sambhala. In ke hath mein jate hi woh ek bada dol ho gaya mein ne logon mein in jaisa shah-zor pehalwan aur bahadur insan in ki tarah kaam karne wala nahi dekha (unhon ne itne dol khinche) ke log apne onton ko bhi pila pila kar in ke thikanon mein le gaye. Aur Hammam ne bayan kiya ke mein ne Abu Hurairah Radi Allahu Anhu se suna woh Nabi Kareem Sallallahu Alaihi Wa Sallam ke wasite se bayan kar rahe thay ke Abu Bakr Radi Allahu Anhu ne do dol khinche.

Hum se Abdullah bin Yusuf ne bayan kiya, kaha hum ko Imam Malik bin Anas ne khabar di, unhein Nafi ne aur unhein Abdullah bin Umar Radi Allahu Anhuma ne ke Yahud, Rasoolullah Sallallahu Alaihi Wa Sallam ki khidmat mein hazir hue aur Aap ko bataya ke un ke yahan ek mard aur ek aurat ne zina kiya hai. Aap Sallallahu Alaihi Wa Sallam ne un se farmaya ke rajm ke bare mein Tourat mein kya hukm hai? Woh bole yeh ke hum unhein ruswa karein aur unhein kore lagaye jayein. Is par Abdullah bin Salam Radi Allahu Anhu ne kaha ke tum log jhoote ho. Tourat mein rajm ka hukm maujood hai. Tourat lao. Phir Yahudi Tourat laye aur ise khola. Lekin rajm se mutalliq jo aayat thi ise ek Yahudi ne apne hath se chupa liya aur is se pehle aur is ke baad ki ibarat parhne laga. Abdullah bin Salam Radi Allahu Anhu ne kaha ke zara apna hath to uthao jab us ne hath uthaya to wahan aayat-e-rajm maujood thi. Ab woh sab kehne lage ke Ae Muhammad! Abdullah bin Salam ne sach kaha. Beshak Tourat mein rajm ki aayat maujood hai. Chunanche Aap Sallallahu Alaihi Wa Sallam ke hukm se in dono ko rajm kiya gaya. Abdullah bin Umar Radi Allahu Anhuma ne bayan kiya ke mein ne rajm ke waqt dekha. Yahudi mard is aurat par jhuka parta tha. Is ko pattharon ki maar se bachata tha.

Hum se Sadaqah bin Fadl ne bayan kiya, unhon ne kaha hum ko Sufyan bin Uyainah ne khabar di, unhein Ibn Abi Najih ne, unhein Mujahid ne, unhein Abu Moammar ne aur un se Abdullah bin Mas'ud Radi Allahu Anhu ne bayan kiya ke Nabi Kareem Sallallahu Alaihi Wa Sallam ke zamane mein chand ke phat kar do tukre ho gaye thay aur Aap Sallallahu Alaihi Wa Sallam ne farmaya tha ke logo is par gawah rehna.

Mujh se Abdullah bin Muhammad Musnadi ne bayan kiya, kaha hum se Yunus bin Yazid ne bayan kiya, kaha hum se Shaiban ne bayan kiya, un se Qatadah ne aur un se Anas bin Malik Radi Allahu Anhu ne (doosri sanad) Imam Bukhari Rahimahullah ne kaha aur mujh se Khalifah bin Khayyat ne bayan kiya, kaha hum se Yazid bin Zurai ne bayan kiya, un se Sa'id ne bayan kiya, un se Qatadah ne aur un se Anas bin Malik Radi Allahu Anhu ne bayan kiya ke Makkah walon ne Rasoolullah Sallallahu Alaihi Wa Sallam se kaha tha ke unhein koi moajiza dikhayein to Aap Sallallahu Alaihi Wa Sallam ne Shaq-ul-Qamar ka moajiza yani chand ka phat jana un ko dikhaya.

Mujh se Khalaf bin Khalid Qurashi ne bayan kiya, kaha hum se Bakr bin Mudar ne bayan kiya, un se Ja'far bin Rabiah ne bayan kiya, un se Iraak bin Malik ne, un se Ubaidullah bin Abdullah bin Mas'ud ne aur un se Abdullah bin Abbas Radi Allahu Anhuma ne ke Nabi Kareem Sallallahu Alaihi Wa Sallam ke zamane mein chand ke do tukre ho gaye thay.

Mujh se Muhammad bin Muthanna ne bayan kiya, kaha hum se Ma'adh ne bayan kiya, kaha ke mujh se mere walid ne bayan kiya, un se Qatadah ne aur un se Anas Radi Allahu Anhu ne bayan kiya ke Nabi Kareem Sallallahu Alaihi Wa Sallam se do sahabi (Usaid bin Hudair aur Abbad bin Bishr Radi Allahu Anhuma) utar kar (apne ghar) wapas hue. Raat andheri thi lekin do chiragh ki tarah ki koi cheez in ke aage roshni karti jati thin. Phir jab yeh dono (raste mein, apne apne ghar ki taraf jane ke liye) juda hue to woh cheez dono ke sath alag alag ho gayi aur is tarah woh apne ghar walon ke pas pahunch gaye.

Mujh se Abdullah bin Abu al-Aswad ne bayan kiya, kaha hum se Yahya ne bayan kiya, kaha un se Ismail ne bayan kiya, kaha hum se Qais ne bayan kiya ke mein ne Mugheerah bin Shu'bah Radi Allahu Anhu se suna ke Nabi Kareem Sallallahu Alaihi Wa Sallam ne farmaya "Meri ummat ke kuch log hamesha ghalib rahein gay, yahan tak ke Qiyamat ya maut aayegi is waqt bhi woh ghalib hi honge."