(Ibn Abbas Radi Allahu Anhuma ne kaha ke) mujhe Abu Hurairah Radi Allahu Anhu ne khabar di ke Rasoolullah Sallallahu Alaihi Wa Sallam ne farmaya tha "Mein soya hua tha ke mein ne (khwab mein) sone ke do kangan apne hathon mein dekhe. Mujhe is khwab se bahut fikr hua, phir khwab mein hi wahi ke zariye mujhe batlaya gaya ke mein un par phoonk maroon. Chunanche jab mein ne phoonk maari to woh dono ud gaye. Mein ne is se yeh tabeer li ke mere baad jhoote nabi honge." Pas in mein se ek to Aswad Ansi hai aur doosra Yamamah ka Musailimah Kazzab tha.

Mujh se Muhammad bin Ala ne bayan kiya, kaha hum se Hammad bin Usama ne bayan kiya, un se Buraid bin Abdullah bin Abi Burdah ne, un se un ke dada Abu Burdah ne aur un se Abu Musa Ash'ari Radi Allahu Anhu ne, mein samajhta hun (yeh Imam Bukhari Rahimahullah ka qaul hai ke) Muhammad bin Ala ne yun kaha ke Nabi Kareem Sallallahu Alaihi Wa Sallam ne farmaya "Mein ne khwab mein dekha tha ke mein Makkah se ek aisi zameen ki taraf hijrat kar raha hun jahan khajoor ke baghat hain. Is par mera zehen idhar gaya ke yeh maqam Yamamah ya Hajar hoga. Lekin woh Yathrib Madinah Munawwarah hai aur isi khwab mein mein ne dekha ke mein ne talwar hilayi to woh beech mein se toot gayi. Yeh is museebat ki taraf ishara tha jo Uhud ki ladayi mein Musalmanon ko uthani padi thi. Phir mein ne doosri martaba ise hilaya to woh pehle se bhi acchi surat mein ho gayi. Yeh is waqia ki taraf ishara tha ke Allah Ta'ala ne Makkah ki fatah di aur Musalman sab ikatthe ho gaye. Mein ne isi khwab mein gayein dekhein aur Allah Ta'ala ka jo kaam hai woh behtar hai. In gayon se in Musalmanon ki taraf ishara tha jo Uhud ki ladayi mein shaheed kiye gaye aur khair-o-bhalayi woh thi jo humein Allah Ta'ala ne khair-o-sacchayi ka badla Badr ki ladayi ke baad ata farmaya tha."

Hum se Abu Nu'aim ne bayan kiya, kaha hum se Zakariya ne bayan kiya, un se Firas ne, un se Aamir ne, un se Masruq ne aur un se Aisha Radi Allahu Anha ne bayan kiya ke Fatimah Radi Allahu Anha aayin, in ki chaal mein Nabi Kareem Sallallahu Alaihi Wa Sallam ki chaal se badi mushabehat thi. Aap Sallallahu Alaihi Wa Sallam ne farmaya: Beti ao marhaba! Is ke baad Aap Sallallahu Alaihi Wa Sallam ne unhein apni dayin taraf ya bayin taraf bithaya, phir un ke kaan mein Aap ne chupke se koi baat kahi to woh rone lagein, mein ne un se kaha ke Aap roti kyun ho? Phir dobara Aap Sallallahu Alaihi Wa Sallam ne un ke kaan mein kuch kaha to woh hans dein. Mein ne un se kaha aaj gham ke furan baad hi khushi ki jo kaifiyat mein ne Aap ke chehre par dekhi woh pehle kabhi nahi dekhi thi. Phir mein ne un se poocha ke Aap Sallallahu Alaihi Wa Sallam ne kya farmaya tha? Unhon ne kaha jab tak Rasoolullah Sallallahu Alaihi Wa Sallam zinda hain mein Aap ke raaz ko kisi par nahi khol sakti. Chunanche mein ne Aap Sallallahu Alaihi Wa Sallam ki wafat ke baad poocha.

To unhon ne bataya ke Aap Sallallahu Alaihi Wa Sallam ne mere kaan mein kaha tha ke Jibrail Alaihis Salam har saal Quran Majeed ka ek dour kiya karte thay, lekin is saal unhon ne do martaba dour kiya hai, mujhe yaqeen hai ke ab meri maut qareeb hai aur mere gharane mein sab se pehle mujh se aa milne wali tum hogi. Mein (Aap ki is khabar par) rone lagi to Aap Sallallahu Alaihi Wa Sallam ne farmaya ke tum is par raazi nahi ke jannat ki aurton ki sardar banogi ya (Aap ne farmaya ke) mominah aurton ki, to is par mein hansi thi.

Hum se Yahya bin Qaza'ah ne bayan kiya, kaha hum se Ibrahim bin Sa'd ne bayan kiya, un se un ke walid ne, un se Urwah ne aur un se Aisha Radi Allahu Anha ne bayan kiya ke Nabi Kareem Sallallahu Alaihi Wa Sallam ne apne zamana-e-maraz mein apni sahib-zadi Fatimah Radi Allahu Anha ko bulaya aur chupke se koi baat un se farmayi to woh rone lagein. Phir Aap Sallallahu Alaihi Wa Sallam ne unhein bulaya aur chupke se phir koi baat farmayi to woh hansein. Aisha Radi Allahu Anha ne bayan kiya ke phir mein ne Fatimah Radi Allahu Anha se is ke mutalliq poocha.

To unhon ne bataya ke pehli martaba jab Aap Sallallahu Alaihi Wa Sallam ne mujh se aahista se guftagu ki thi to is mein Aap Sallallahu Alaihi Wa Sallam ne farmaya tha ke Aap ki is maraz mein wafat ho jayegi jis mein waqai Aap ki wafat hui. Mein is par ro padi. Phir dobara Aap Sallallahu Alaihi Wa Sallam ne aahista se mujh se jo baat kahi is mein Aap ne farmaya ke Aap Sallallahu Alaihi Wa Sallam ke ahl-e-bait mein, mein sab se pehle Aap Sallallahu Alaihi Wa Sallam se ja milungi. Mein is par hansi thi.

Hum se Muhammad bin Ar'arah ne bayan kiya, kaha hum se Shu'bah ne bayan kiya, un se Abi Bishr ne, un se Sa'id bin Jubair ne, un se Abdullah bin Abbas Radi Allahu Anhuma ne bayan kiya ke Umar bin Khattab Ibn Abbas Radi Allahu Anhuma ko apne pas bithate thay. Is par Abdur Rahman bin Awf Radi Allahu Anhu ne Umar Radi Allahu Anhu se shikayat ki ke in jaise to hamare larke bhi hain. Lekin Umar Radi Allahu Anhu ne jawab diya ke yeh mehaz in ke ilm ki wajah se hai. Phir Umar Radi Allahu Anhu ne Abdullah bin Abbas Radi Allahu Anhuma se aayat "idha ja'a nasrullahi wal-fath" ke mutalliq poocha to unhon ne jawab diya ke yeh Rasoolullah Sallallahu Alaihi Wa Sallam ki wafat thi jis ki khabar Allah Ta'ala ne Aap ko di Umar Radi Allahu Anhu ne farmaya jo tum ne samjha hai mein bhi rahi samajhta hun.

Hum se Abu Nu'aim ne bayan kiya, kaha hum se Abdur Rahman bin Sulaiman bin Hanzalah bin Ghaseel ne bayan kiya, un se Ikrimah ne bayan kiya aur un se Abdullah bin Abbas Radi Allahu Anhuma ne bayan kiya ke Maraz al-Wafat mein Rasoolullah Sallallahu Alaihi Wa Sallam bahar tashreef laye, Aap ek chikne kapre se sar mubarak par patti bandhe hue thay, Aap Sallallahu Alaihi Wa Sallam Masjid-e-Nabwi mein mimbar par tashreef farma hue phir jaise honi chahiye Allah Ta'ala ki hamd-o-sana ki, phir farmaya: Amm-a-ba'd: (Aane wale dour mein) doosre logon ki tadad bahut barh jayegi lekin Ansar kam hote jayenge aur ek zamana aayega ke doosron ke muqable mein in ki tadad itni kam ho jayegi jaise khane mein namak hota hai. Pas agar tum mein se koi shakhs kahin ka hakim bane aur apni hukumat ki wajah se woh kisi ko nuqsan aur nafa bhi pahuncha sakta ho to ise chahiye ke Ansar ke naikon (ki nekyon) ko qubool kare aur jo bure hon un se darguzar kar diya kare. Yeh Nabi Kareem Sallallahu Alaihi Wa Sallam ki aakhri majlis-e-waaz thi.

Mujh se Abdullah bin Muhammad Musnadi ne bayan kiya, unhon ne kaha hum se Yahya bin Adam ne bayan kiya, unhon ne kaha hum se Husain Jaf-ee ne bayan kiya, un se Abu Musa ne, un se Imam Hasan Basri ne aur un se Abu Bakrah Radi Allahu Anhu ne ke Nabi Kareem Sallallahu Alaihi Wa Sallam Hasan Radi Allahu Anhu ko ek din sath le kar bahar tashreef laye aur mimbar par in ko le kar charh gaye phir farmaya "Mera yeh beta sayyad hai aur umeed hai ke Allah Ta'ala is ke zariye Musalmanon ki do jama'aton mein milap kara dega."

Hum se Sulaiman bin Harb ne bayan kiya, kaha hum se Hammad bin Zaid ne bayan kiya, un se Ayub ne, un se Humaid bin Hilal ne aur un se Anas bin Malik Radi Allahu Anhu ne ke Nabi Kareem Sallallahu Alaihi Wa Sallam ne Ja'far bin Abi Talib aur Zaid bin Harithah Radi Allahu Anhuma ki shahadat ki khabar pehle hi Sahaba ko suna di thi, is waqt Aap ki aankhon se aansu jari thay.