Hum se Musa bin Ismail ne bayan kiya, kaha hum se Mutamir ne bayan kiya, un se un ke walid Sulaiman ne bayan kiya, kaha hum se Abu Usman Nahdi ne bayan kiya aur un se Abdur Rahman bin Abi Bakr Radi Allahu Anhu ne bayan kiya ke Suffah wale muhtaj aur ghareeb log thay aur Nabi Kareem Sallallahu Alaihi Wa Sallam ne ek martaba farmaya tha ke jis ke ghar mein do aadmiyon ka khana ho to woh ek teesre ko bhi apne sath leta jaye aur jis ke ghar char aadmiyon ka khana ho woh panchwan aadmi apne sath leta jaye ya chatthe ko bhi ya Aap ne isi tarah kuch farmaya (rawi ko panch aur che mein shak hai) khair to Abu Bakr Radi Allahu Anhu teen Ashab-e-Suffah ko apne sath laye aur Nabi Kareem Sallallahu Alaihi Wa Sallam apne sath das ashab ko le gaye aur ghar mein, mein tha aur mere maan baap thay. Abu Usman ne kaha mujh ko yaad nahi Abdur Rahman ne yeh bhi kaha, aur meri aurat aur khadim jo mere aur Abu Bakr Radi Allahu Anhu dono ke gharon mein kaam karta tha. Lekin khud Abu Bakr Radi Allahu Anhu ne Nabi Kareem Sallallahu Alaihi Wa Sallam ke sath khana khaya aur Isha ki namaz tak wahan thehre rahe (mehmanon ko pehle hi bhej chuke thay) is liye unhein itna thehrna para ke Nabi Kareem Sallallahu Alaihi Wa Sallam ne khana kha liya. Phir Allah Ta'ala ko jitna manzoor tha itna hissa raat ka jab guzar gaya to Aap ghar wapas aaye. Un ki biwi ne un se kaha, kya baat hui. Aap ko apne mehman yaad nahi rahe? Unhon ne poocha: Kya mehmanon ko ab tak khana nahi khilaya? Biwi ne kaha ke mehmanon ne Aap ke aane tak khane se inkar kiya. Un ke samne khana pesh kiya gaya tha lekin woh nahi mane. Abdur Rahman kehte hain ke mein to jaldi se chup gaya (kyunke Abu Bakr Radi Allahu Anhu ghussa ho gaye thay). Aap ne danta, Ae paji! aur bahut bura bhala kaha, phir (mehmanon se) kaha chalo ab khao aur khud qasam kha li ke mein to kabhi na khaunga. Abdur Rahman Radi Allahu Anhu ne bayan kiya ke Allah ki qasam, phir hum jo luqma bhi (is khane mein se) uthate to jaise neeche se khana aur zyada ho jata tha (itni is mein barkat hui) sab logon ne shikm sair ho kar khaya aur khana pehle se bhi zyada bach raha. Abu Bakr Radi Allahu Anhu ne jo dekha to khana joun ka toun tha ya pehle se bhi zyada. Is par unhon ne apni biwi se kaha, Ae Bani Firas ki behen (dekho to yeh kya maamla hua) unhon ne kaha, kuch bhi nahi, meri aankhon ki thandak ki qasam, khana to pehle se teen guna zyada maloom hota hai, phir woh khana Abu Bakr Radi Allahu Anhu ne bhi khaya aur farmaya ke yeh mera qasam khana to Shaitan ka aghwa tha. Ek luqma kha kar ise Aap Nabi Kareem Sallallahu Alaihi Wa Sallam ki khidmat mein le gaye wahan woh subah tak rakha raha. Ittefaq se ek kafir qoum jis ka hum Musalmanon se muahida tha aur muahida ki muddat khatam ho chuki thi. Un se lerne ke liye fauj jama ki gayi. Phir hum barah tukriyan ho gaye aur har aadmi ke sath kitne aadmi thay yeh Allah hi janta hai magar itna zaroor maloom hai ke Aap ne un naqeebon ko lashkar walon ke sath bheja. Hasil yeh ke fauj walon ne is mein se khaya. Ya Abdur Rahman ne kuch aisa hi kaha.

Hum se Musaddad ne bayan kiya, kaha hum se Hammad ne bayan kiya, un se Abdul Aziz ne aur un se Anas Radi Allahu Anhu ne is hadeeth ko Yunus se bhi riwayat kiya hai. Un se Thabit ne aur un se Anas Radi Allahu Anhu ne bayan kiya ke Rasoolullah Sallallahu Alaihi Wa Sallam ke zamane mein ek saal qahet para. Aap Sallallahu Alaihi Wa Sallam Jumua ki namaz ke liye khutba de rahe thay ke ek shakhs ne khare ho kar kaha: Ya Rasul Allah! Ghore bhook se halak ho gaye aur bakriyan bhi halak ho gayin. Aap Allah Ta'ala se dua kijiye ke woh hum par pani barsaye. Nabi Kareem Sallallahu Alaihi Wa Sallam ne apne hath uthaye aur dua ki. Anas Radi Allahu Anhu ne bayan kiya ke is waqt aasman sheeshe ki tarah (bilkul saaf) tha. Itne mein hawa chali. Us ne abr (badal) ko uthaya phir abr ke bahut se tukre jama ho gaye aur aasman ne goya apne dahane khol diye. Hum jab masjid se nikle to ghar pahunchte pahunchte pani mein doob chuke thay. Barish yun hi doosre Jumua tak barabar hoti rahi. Doosre Jumua ko wahi sahib ya koi doosre phir khare hue aur arz kiya: Ae Allah ke Rasool! Makanat gir gaye. Dua farmaye ke Allah Ta'ala barish ko rok de. Nabi Kareem Sallallahu Alaihi Wa Sallam muskuraye aur farmaya: Ae Allah! Ab hamare charon taraf barish barsa (jahan is ki zaroorat ho) hum par na barsa. Anas Radi Allahu Anhu kehte hain ke mein ne jo nazar uthayi to dekha ke isi waqt abr phat kar Madinah ke ard gird sar peech ki tarah ho gaya tha.

Hum se Muhammad bin Muthanna ne bayan kiya, kaha hum se Abu Ghassan Yahya bin Kaseer ne bayan kiya, unhon ne kaha hum se Abu Hafs ne jin ka naam Umar bin Ala hai aur jo Amr bin Ala ke bhai hain, bayan kiya, kaha ke mein ne Nafi se suna aur unhon ne Abdullah bin Umar Radi Allahu Anhuma se ke Nabi Kareem Sallallahu Alaihi Wa Sallam ek lakri ka sahara le kar khutba diya karte thay. Phir jab mimbar ban gaya to Aap Sallallahu Alaihi Wa Sallam khutba ke liye is par tashreef le gaye. Is par us lakri ne bareek awaz se rona shuru kar diya. Aakhir Aap Sallallahu Alaihi Wa Sallam us ke qareeb tashreef laye aur apna hath is par phera aur Abdul Hameed ne kaha ke humein Usman bin Umar ne khabar di, unhein Muaz bin Ala ne khabar di aur unhein Nafi ne isi hadeeth ki aur is ki riwayat Abu Asim ne ki, un se Abu Rawad ne, un se Nafi ne aur un se Ibn Umar Radi Allahu Anhuma ne aur Ibn Umar Radi Allahu Anhuma ne Nabi Kareem Sallallahu Alaihi Wa Sallam se.

Hum se Abu Nu'aim ne bayan kiya, kaha hum se Abdul Wahid bin Aiman ne bayan kiya, kaha ke mein ne apne walid se suna aur unhon ne Jabir bin Abdullah se ke Nabi Kareem Sallallahu Alaihi Wa Sallam Jumua ke din khutba ke liye ek darakht (ke tane) ke pas khare hote ya (bayan kiya ke) khajoor ke darakht ke pas. Phir ek Ansari aurat ne ya kisi sahabi ne kaha: Ya Rasul Allah! Kyun na hum Aap ke liye ek mimbar tayyar kar dein? Aap Sallallahu Alaihi Wa Sallam ne farmaya: Agar tumhara ji chahe to kar do. Chunanche unhon ne Aap ke liye mimbar tayyar kar diya. Jab Jumua ka din hua to Aap is mimbar par tashreef le gaye. Is par us khajoor ke tane se bacche ki tarah rone ki awaz aane lagi. Nabi Kareem Sallallahu Alaihi Wa Sallam mimbar se utre aur ise apne gale se laga liya. Jis tarah bacchon ko chup karne ke liye loriyan dete hain. Nabi Kareem Sallallahu Alaihi Wa Sallam ne bhi isi tarah ise chup karaya. Phir Aap Sallallahu Alaihi Wa Sallam ne farmaya ke yeh tana is liye ro raha tha ke woh Allah ke is zikr ko suna karta tha jo is ke qareeb hota tha.

Hum se Ismail ne bayan kiya, kaha ke mujh se mere bhai ne bayan kiya, un se Sulaiman bin Bilal ne, un se Yahya bin Sa'id ne bayan kiya, unhein Hafs bin Ubaidullah bin Anas bin Malik ne khabar di aur unhon ne Jabir bin Abdullah Radi Allahu Anhuma se suna, unhon ne bayan kiya ke Masjid-e-Nabwi ki chat khajoor ke tanon par banayi gayi thi. Nabi Kareem Sallallahu Alaihi Wa Sallam jab khutba ke liye tashreef late to Aap un mein se ek tane ke pas khare ho jate lekin jab Aap Sallallahu Alaihi Wa Sallam ke liye mimbar bana diya gaya to Aap Sallallahu Alaihi Wa Sallam is par tashreef laye. Phir hum ne us tane se is tarah ki rone ki awaz suni jaisi ba-waqt-e-wiladat ontni ki awaz hoti hai. Aakhir jab Nabi Kareem Sallallahu Alaihi Wa Sallam ne us ke qareeb aa kar is par hath rakha to woh chup hua.

Hum se Muhammad bin Bashar ne bayan kiya, kaha hum se Ibn Abi Adi ne bayan kiya, un se Shu'bah ne, (doosri sanad) kaha mujh se Bishr bin Khalid ne bayan kiya, kaha hum se Muhammad bin Ja'far ne, un se Shu'bah ne, un se Sulaiman ne, unhon ne Abu Wail se suna, woh Hudhaifah Radi Allahu Anhu se bayan karte thay ke Umar bin Khattab Radi Allahu Anhu ne poocha: Fitnah ke bare mein Rasoolullah Sallallahu Alaihi Wa Sallam ki hadeeth kis ko yaad hai? Hudhaifah Radi Allahu Anhu bole ke mujhe zyada yaad hai jis tarah Rasoolullah Sallallahu Alaihi Wa Sallam ne farmaya tha. Umar Radi Allahu Anhu ne kaha phir bayan karo (Ma'sha'Allah) tum to bahut jari ho. Unhon ne bayan kiya ke Rasoolullah Sallallahu Alaihi Wa Sallam ne farmaya: Insan ki ek aazmaish (fitnah) to us ke ghar, mal aur paros mein hota hai jis ka kaffara, namaz, roza, sadqa aur amr-bil-ma'roof aur nahi-anil-munkar jaisi nekiyan ban jati hain. Umar Radi Allahu Anhu ne kaha ke mein is ke mutalliq nahi poochta, balkay meri murad us fitnah se hai jo samandar ki tarah (thāthein maarta) hoga. Unhon ne kaha is fitnah ka Aap par koi asar nahi parega. Aap ke aur is fitnah ke darmiyan band darwaza hai. Umar Radi Allahu Anhu ne poocha woh darwaza khola jayega ya toda jayega. Unhon ne kaha ke nahi balkay tod diya jayega. Umar Radi Allahu Anhu ne is par farmaya ke phir to band na ho sakega. Hum ne Hudhaifah Radi Allahu Anhu se poocha, kya Umar Radi Allahu Anhu is darwaze ke mutalliq jante thay? Unhon ne farmaya ke isi tarah jante thay jaise din ke baad raat ke aane ko har shakhs janta hai. Mein ne aisi hadeeth bayan ki jo ghalat nahi thi. Humein Hudhaifah Radi Allahu Anhu se (darwaza ke mutalliq) poochte hue dar maloom hua. Is liye hum ne Masruq se kaha to unhon ne poocha ke woh darwaza kon hain? To unhon ne bataya ke woh khud Umar Radi Allahu Anhu hi hain.

Hum se Abu al-Yaman ne bayan kiya, kaha hum ko Shuaib ne khabar di, kaha hum se Abu al-Zinad ne bayan kiya un se A'raj ne aur un se Abu Hurairah Radi Allahu Anhu ne bayan kiya ke Nabi Kareem Sallallahu Alaihi Wa Sallam ne farmaya "Qiyamat is waqt tak nahi qaim hogi jab tak tum ek aisi qoum ke sath jang na kar lo jin ke joote baal ke hon aur jab tak tum Turkon se jang na kar lo, jin ki aankhein chhoti hongi, chehre surkh honge, naak chhoti aur chapti hogi, chehre aise honge jaise teh-ba-teh dhaal hoti hai."

Aur tum hukumat ke liye sab se zyada behtar shakhs ise paoge jo hukumat karne ko bura jane (yani is mansab ko khud ke liye napasand kare) yahan tak ke woh is mein phans jaye. Logon ki misal kaan ki si hai jo jahiliyat mein shareef thay, woh Islam lane ke baad bhi shareef hain.

Aur tum par ek aisa dour bhi aane wala hai ke tum mein se koi apne sare ghar-bar aur mal-o-daulat se barh kar mujh ko dekh lena zyada pasand karega.

Mujh se Yahya ne bayan kiya, kaha hum se Abdur Razzaq ne bayan kiya, un se Ma'mar ne aur un se Hammam ne aur un se Abu Hurairah Radi Allahu Anhu ne bayan kiya ke Nabi Kareem Sallallahu Alaihi Wa Sallam ne farmaya "Qiyamat is waqt tak qaim na hogi jab tak ke tum Iraniyon ke shehar Khuz aur Karman walon se jang na kar loge. Chehre un ke surkh honge. Naak chapti hogi. Aankhein chhoti hongi aur chehre aise honge jaise teh-ba-teh dhaal hoti hai aur un ke joote baalon wale honge. Yahya ke alawa is hadeeth ko auron ne bhi Abdur Razzaq se riwayat kiya hai.