Hum se Abu al-Walid ne bayan kiya, kaha hum se Salm bin Zurair ne bayan kiya, unhon ne Abu Raja se suna ke hum se Imran bin Husain Radi Allahu Anhuma ne bayan kiya ke woh Nabi Kareem Sallallahu Alaihi Wa Sallam ke sath ek safar mein thay, raat bhar sab log chalte rahe jab subah ka waqt qareeb hua to parao kiya (chunke hum thake hue thay) is liye sab log itni gehri neend so gaye ke suraj poori tarah nikal aaya. Sab se pehle Abu Bakr Siddiq Radi Allahu Anhu jage. Lekin Aap Sallallahu Alaihi Wa Sallam ko, jab Aap sote hote to jagate nahi thay ta-aan-ke Aap khud hi jagte, phir Umar Radi Allahu Anhu bhi jag gaye. Aakhir Abu Bakr Radi Allahu Anhu Aap ke sar mubarak ke qareeb baith gaye aur buland awaz se Allahu Akbar kehne lage. Is se Aap Sallallahu Alaihi Wa Sallam bhi jag gaye aur wahan se kooch ka hukm de diya. (Phir kuch fasle par tashreef laye) aur yahan Aap Sallallahu Alaihi Wa Sallam utre aur Aap ne humein subah ki namaz parhayi. Ek shakhs hum se door kone mein baitha raha. Us ne hamare sath namaz nahi parhi. Aap Sallallahu Alaihi Wa Sallam jab namaz se farigh hue to Aap Sallallahu Alaihi Wa Sallam ne us se farmaya: Ae falan! Hamare sath namaz parhne se tujhe kis cheez ne roka? Us ne arz kiya ke mujhe ghusl ki hajat ho gayi hai. Aap Sallallahu Alaihi Wa Sallam ne use hukm diya ke pak mitti se tayammum kar lo (phir us ne bhi tayammum ke baad) namaz parhi. Imran Radi Allahu Anhu kehte hain ke phir Aap Sallallahu Alaihi Wa Sallam ne mujhe chand sawaron ke sath aage bhej diya. (Taki pani talash karein kyunke) humein sakht pyaas lagi hui thi, ab hum isi halat mein chal rahe thay ke humein ek aurat mili jo do mushkon ke darmiyan (sawari par) apne paon latkaye hue ja rahi thi. Hum ne us se kaha ke pani kahan milta hai? Us ne jawab diya ke yahan pani nahi hai. Hum ne us se poocha ke tumhare ghar se pani kitne fasle par hai? Us ne jawab diya ke ek din ek raat ka fasla hai, hum ne us se kaha ke accha tum Rasoolullah Sallallahu Alaihi Wa Sallam ki khidmat mein chalo, woh boli Rasoolullah ke kya mani hain? Imran Radi Allahu Anhu kehte hain, aakhir hum use Nabi Kareem Sallallahu Alaihi Wa Sallam ki khidmat mein laye, us ne Aap se bhi wahi kaha jo hum se keh chuki thi. Haan itna aur kaha ke woh yateem bacchon ki maan hai (is liye wajib-ur-rahm hai) Aap Sallallahu Alaihi Wa Sallam ke hukm se us ke dono mushkeezon ko utara gaya aur Aap ne un ke dahanon par dast mubarak phera. Hum chalis pyase aadmiyon ne is mein se khoob seerab ho kar piya aur apne tamam mushkeeze aur baltiayan bhi bhar lein sirf hum ne onton ko pani nahi pilaya, is ke bawajood us ki mushkein pani se itni bhari hui thin ke maloom hota tha abhi beh parein gi. Is ke baad Aap Sallallahu Alaihi Wa Sallam ne farmaya ke jo kuch tumhare pas hai (khane ki cheezon mein se) mere pas lao. Chunanche us aurat ke liye roti ke tukre aur khajoorein la kar jama kar dein gayin. Phir jab woh apne qabeele mein aayi to apne aadmiyon se us ne kaha ke aaj mein sab se bade jadugar se mil kar aayi hun ya phir jaisa ke (is ke manne wale) log kehte hain, woh waqai Nabi hai. Aakhir Allah Ta'ala ne us ke qabeele ko isi aurat ki wajah se hidayat di, woh khud bhi Islam layi aur tamam qabeele walon ne bhi Islam qubool kar liya.

Mujh se Muhammad bin Bashar ne bayan kiya, kaha hum se Ibn Abi Adi ne bayan kiya, un se Sa'id bin Abi Arubah ne, un se Qatadah ne aur un se Anas bin Malik Radi Allahu Anhu ne bayan kiya ke Rasoolullah Sallallahu Alaihi Wa Sallam ki khidmat mein ek bartan hazir kiya gaya (pani ka) Nabi Kareem Sallallahu Alaihi Wa Sallam is waqt (Madinah ke nazdeek) Maqam-e-Zaura mein tashreef rakhte thay, Aap Sallallahu Alaihi Wa Sallam ne is bartan mein hath rakha to is mein se pani Aap Sallallahu Alaihi Wa Sallam ki ungliyon ke darmiyan se phootne laga aur isi pani se poori jama'at ne wudhu kiya. Qatadah ne kaha ke mein ne Anas Radi Allahu Anhu se poocha: Aap log kitni tadad mein thay? Unhon ne farmaya ke teen so rahe honge ya teen so ke qareeb rahe honge.

Hum se Abdullah bin Maslamah ne bayan kiya, unhon ne kaha ke hum se Imam Malik ne bayan kiya, un se Ishaq bin Abdullah bin Abi Talhah ne bayan kiya aur un se Anas bin Malik Radi Allahu Anhu ne bayan kiya ke mein ne Rasoolullah Sallallahu Alaihi Wa Sallam ko dekha. Asr ki namaz ka waqt ho gaya tha, aur log wudhu ka pani talash kar rahe thay lekin pani ka kahin pata nahi tha, phir Rasoolullah Sallallahu Alaihi Wa Sallam ki khidmat mein (ek bartan ke andar) wudhu ka pani laya gaya. Aap Sallallahu Alaihi Wa Sallam ne apna hath is bartan mein rakha aur logon se farmaya ke isi pani se wudhu karein. Mein ne dekha ke pani Aap Sallallahu Alaihi Wa Sallam ki ungliyon ke neeche se ubal raha tha chunanche logon ne wudhu kiya yahan tak ke har shakhs ne wudhu kar liya.

Hum se Abdur Rahman bin Mubarak ne bayan kiya, unhon ne kaha hum se Hazm bin Mehran ne bayan kiya, unhon ne kaha ke mein ne Imam Hasan Basri se suna, unhon ne kaha ke hum se Anas bin Malik Radi Allahu Anhu ne bayan kiya ke Nabi Kareem Sallallahu Alaihi Wa Sallam kisi safar mein thay aur Aap ke sath kuch Sahaba Kiram bhi thay, chalte chalte namaz ka waqt ho gaya to wudhu ke liye kahin pani nahi mila. Aakhir jama'at mein se ek sahib uthe aur ek bade se piyale mein thoda sa pani le kar hazir-e-khidmat hue. Nabi Kareem Sallallahu Alaihi Wa Sallam ne use liya aur us ke pani se wudhu kiya. Phir Aap Sallallahu Alaihi Wa Sallam ne apna hath piyale par rakha aur farmaya ke ao wudhu karo, poori jama'at ne wudhu kiya aur tamam aadab-o-sunan ke sath poori tarah kar liya. Hum tadad mein sattar ya assi ke lag bhag thay.

Hum se Abdullah bin Munir ne bayan kiya, unhon ne Yazid bin Haroon se suna, kaha ke mujh ko Humaid ne khabar di aur un se Anas bin Malik Radi Allahu Anhu ne bayan kiya ke namaz ka waqt ho chuka tha, Masjid-e-Nabwi se jin ke ghar qareeb thay unhon ne to wudhu kar liya lekin bahut se log baqi reh gaye. Is ke baad Nabi Kareem Sallallahu Alaihi Wa Sallam ki khidmat mein patthar ki bani hui ek lagan layi gayi. Is mein pani tha, Aap Sallallahu Alaihi Wa Sallam ne apna hath is par rakha lekin us ka munh itna tang tha ke Aap Sallallahu Alaihi Wa Sallam us ke andar apna hath phaila kar nahi rakh sakte thay, chunanche Aap ne ungliyan mila lein aur lagan ke andar hath ko daal diya phir (isi pani se) jitne log baqi reh gaye thay sab ne wudhu kiya. Mein ne poocha ke Aap hazrat ki tadad kya thi? Anas Radi Allahu Anhu ne bataya ke assi aadmi thay.

Hum se Musa bin Ismail ne bayan kiya, kaha hum se Abdul Aziz bin Muslim ne bayan kiya, un se Husain ne bayan kiya, un se Salim bin Abi al-Ja'd ne aur un se Jabir Radi Allahu Anhu ne bayan kiya ke Sulh-e-Hudaibiyah ke din logon ko pyaas lagi hui thi Nabi Kareem Sallallahu Alaihi Wa Sallam ke samne ek chhaagal rakha hua tha Aap Sallallahu Alaihi Wa Sallam ne farmaya kya baat hai? Logon ne kaha ke jo pani Aap ke samne hai, is pani ke siwa na to hamare pas wudhu ke liye koi doosra pani hai aur na peene ke liye. Aap Sallallahu Alaihi Wa Sallam ne apna hath chhaagal mein rakh diya aur pani Aap Sallallahu Alaihi Wa Sallam ki ungliyon ke darmiyan mein se chashme ki tarah phootne laga aur hum sab logon ne is pani ko piya bhi aur is se wudhu bhi kiya. Mein ne poocha Aap log kitni tadad mein thay? Kaha ke agar hum ek lakh bhi hote to woh pani kafi hota. Waise hamari tadad is waqt pandrah so thi.

Hum se Malik bin Ismail ne bayan kiya, kaha hum se Israil ne bayan kiya, un se Abu Ishaq ne, un se Bara bin Azib Radi Allahu Anhu ne bayan kiya ke Sulh-e-Hudaibiyah ke din hum chaudah so ki tadad mein thay. Hudaibiyah ek kunwein ka naam hai hum ne is se itna pani khincha ke is mein ek qatra bhi baqi na raha (jab Rasoolullah Sallallahu Alaihi Wa Sallam ko is ki khabar hui to Aap tashreef laye) aur kunwein ke kinare baith kar pani ki dua ki aur is pani se kulli ki aur kulli ka pani kunwein mein daal diya. Abhi thodi der bhi nahi hui thi ke kunwan phir pani se bhar gaya. Hum bhi is se khoob sair hue aur hamare ont bhi seerab ho gaye ya pani pee kar laute.

Hum se Abdullah bin Yusuf ne bayan kiya, kaha hum ko Malik ne khabar di, unhein Ishaq bin Abdullah bin Abi Talhah ne aur unhon ne Anas bin Malik Radi Allahu Anhu se suna, unhon ne kaha ke Abu Talhah Radi Allahu Anhu ne (meri walda) Umm-e-Sulaim Radi Allahu Anhuma se kaha ke mein ne Rasoolullah Sallallahu Alaihi Wa Sallam ki awaz suni to Aap ki awaz mein bahut du'f maloom hua. Mera khayal hai ke Aap bahut bhooke hain. Kya tumhare pas kuch khana hai? Unhon ne kaha ji haan, chunanche unhon ne jau ki chand rotiyan nikalein, phir apni odhni nikali aur us mein rotiyon ko lapait kar mere hath mein chupa diya aur us odhni ka doosra hissa mere badan par bandh diya. Is ke baad Rasoolullah Sallallahu Alaihi Wa Sallam ki khidmat mein mujhe bheja. Mein jo gaya to Aap masjid mein tashreef rakhte thay. Aap ke sath bahut se Sahaba bhi baithe hue thay. Mein Aap ke pas khara ho gaya to Aap ne farmaya kya Abu Talhah ne tumhein bheja hai? Mein ne arz kiya ji haan. Aap ne daryaft farmaya, kuch khana de kar? Mein ne arz kiya ji haan, jo Sahaba Aap ke sath is waqt maujood thay, un sab se Aap ne farmaya ke chalo utho, Aap tashreef lane lage aur mein Aap ke aage aage lapak raha tha aur Abu Talhah Radi Allahu Anhu ke ghar pahunch kar mein ne unhein khabar di. Abu Talhah Radi Allahu Anhu bole, Umm-e-Sulaim! Nabi Kareem Sallallahu Alaihi Wa Sallam to bahut se logon ko sath laye hain hamare pas itna khana kahan hai ke sab ko khilaya ja sake? Umm-e-Sulaim Radi Allahu Anha ne kaha: Allah aur us ke Rasool zyada jante hain (hum fikr kyun karein?) Khair Abu Talhah aage barh kar Nabi Kareem Sallallahu Alaihi Wa Sallam se mile. Ab Rasoolullah Sallallahu Alaihi Wa Sallam ke sath woh bhi chal rahe thay. Umm-e-Sulaim ne wahi roti la kar Aap ke samne rakh di, phir Nabi Kareem Sallallahu Alaihi Wa Sallam ke hukm se rotiyon ka chora kar diya gaya, Umm-e-Sulaim Radi Allahu Anha ne kuppi nichor kar us par kuch ghee daal diya, aur is tarah salan ho gaya, Aap ne is ke baad us par dua ki jo kuch bhi Allah Ta'ala ne chaha. Phir farmaya das aadmiyon ko bula lo, unhon ne aisa hi kiya, un sab ne roti pait bhar kar khayi aur jab yeh log bahar gaye to Aap ne farmaya ke phir das aadmiyon ko bula lo. Chunanche das aadmiyon ko bulaya gaya, unhon ne bhi pait bhar kar khaya, jab yeh log bahar gaye to Nabi Kareem Sallallahu Alaihi Wa Sallam ne farmaya ke phir das hi aadmiyon ko andar bula lo. Unhon ne aisa hi kiya aur unhon ne bhi pait bhar kar khaya. Jab woh bahar gaye to Aap ne farmaya ke phir das aadmiyon ko dawat de do. Is tarah sab logon ne pait bhar kar khana khaya. In logon ki tadad sattar ya assi thi.

Mujh se Muhammad bin Muthanna ne bayan kiya, kaha hum se Abu Ahmad Zubairi ne bayan kiya, kaha hum se Israil ne bayan kiya, un se Mansoor ne, un se Ibrahim ne un se Alqamah ne aur un se Abdullah bin Mas'ud Radi Allahu Anhu ne bayan kiya ke moajizat ko hum to ba-is-e-barkat samajhte thay aur tum log un se darte ho. Ek martaba hum Rasoolullah Sallallahu Alaihi Wa Sallam ke sath ek safar mein thay aur pani taqreeban khatam ho gaya. Nabi Kareem Sallallahu Alaihi Wa Sallam ne farmaya ke jo kuch bhi pani bach gaya ho use talash karo. Chunanche log ek bartan mein thoda sa pani laye. Aap Sallallahu Alaihi Wa Sallam ne apna hath bartan mein daal diya aur farmaya: Barkat wala pani lo aur barkat to Allah Ta'ala hi ki taraf se hoti hai, mein ne dekha ke Rasoolullah Sallallahu Alaihi Wa Sallam ki ungliyon ke darmiyan mein se pani faware ki tarah phoot raha tha aur hum to Nabi Kareem Sallallahu Alaihi Wa Sallam ke zamane mein khate waqt khane ki tasbeeh sunte thay.

Hum se Abu Nu'aim ne bayan kiya, kaha hum se Zakariya ne bayan kiya kaha ke mujh se Aamir ne, kaha ke mujh se Jabir Radi Allahu Anhu ne bayan kiya ke un ke walid (Abdullah bin Amr bin Haram, Jang-e-Uhud mein) shaheed ho gaye thay. Aur woh maqrooz thay. Mein Rasoolullah Sallallahu Alaihi Wa Sallam ki khidmat mein hazir hua aur mein ne arz kiya ke mere walid apne upar qarz chhor gaye. Idhar mere pas siwa is paidawar ke jo khajooron se hogi aur kuch nahi hai aur is ki paidawar se to barson mein qarz ada nahi ho sakta. Is liye Aap mere sath tashreef le chaliye taki qarz khwah Aap ko dekh kar zyada munh na pharein. Aap Sallallahu Alaihi Wa Sallam tashreef laye (lekin woh nahi mane) to Aap Sallallahu Alaihi Wa Sallam khajoor ke jo dher lage hue thay pehle un mein se ek ke charon taraf chale aur dua ki. Isi tarah doosre dher ke bhi. Phir Aap is par baith gaye aur farmaya ke khajoorein nikal kar unhein do. Chunanche sara qarz ada ho gaya aur jitni khajoorein qarz mein di thin itni hi bach gayin.