Hum se Ali Bin Abdullah Madini ne bayan kiya, unhon ne kaha hum se Sufyan Bin Uyainah ne bayan kiya, un se Abu Az-Zinad ne, un se Aaraj ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Tumhein ta-ajjub nahi hota ke Allah Ta'ala mujh se Quraish ki gaaliyon aur laanat malamat ko kis tarah door karta hai. Mujhe wo «muzammam» keh kar bura kehte, is par laanat karte hain. Halanke mein to Muhammad hoon
."

Hum se Muhammad Bin Sinan ne bayan kiya, kaha hum se Saleem ne bayan kiya, kaha hum se Saeed Bin Mina ne bayan kiya aur un se Jabir Bin Abdullah (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Meri aur doosre anbiya ki misal aaisi hai jaisi kisi shakhs ne koi ghar banaya, ise khoob aarasta pairasta kar ke mukammal kar diya. Sirf ek eint ki jagah khali chor di. Log is ghar mein dakhil hote aur ta-ajjub karte aur kehte kash ye ek eint ki jagah khali na rehti to kaisa accha mukammal ghar hota
."

Hum se Qutaibah Bin Saeed ne bayan kiya, kaha hum se Ismail Bin Jafar ne bayan kiya, un se Abdullah Bin Dinar ne, un se Abu Salih ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Meri aur mujh se pehle ke tamam anbiya ki misal aaisi hai jaise ek shakhs ne ek ghar banaya aur is mein har tarah ki zinat paida ki lekin ek kone mein ek eint ki jagah chout gayi. Ab tamam log aate hain aur makan ko charon taraf se ghoum kar dekhte hain aur ta-ajjub mein par jate hain lekin ye bhi kehte jate hain ke yahan par ek eint kyun na rakkhi gayi? To mein hi wo eint hoon aur mein Khatam-un-Nabiyyin hoon
."

Hum se Abdullah Bin Yusuf ne bayan kiya, unhon ne kaha hum se Laith ne bayan kiya, un se Aqeel ne bayan kiya, un se Ibn Shihab ne, un se Urwah Bin Zubair ne bayan kiya aur un se Aisha (Radi Allahu Anha) ne ke Nabi Kareem (Sallallahu Alaihi Wasallam) ne traisath saal ki umr mein wafat payi aur Ibn Shihab ne kaha ke mujh se Saeed Bin Musayyib ne isi tarah bayan kiya
.

Hum se Hafs Bin Umar ne bayan kiya, kaha hum se Shuba ne bayan kiya, un se Humaid ne aur un se Anas (Radi Allahu Anhu) ne bayan kiya ke Nabi Kareem (Sallallahu Alaihi Wasallam) bazar mein thay ke ek sahab ki aawaz aayi. Ya Aba Al-Qasim! Aap un ki taraf tawajjo hue (maloom hua ke unhon ne kisi aur ko pukara hai) is par Aap (Sallallahu Alaihi Wasallam) ne farmaya "Mere naam par naam rakkho lekin meri kuniyat mat rakkho
."

Hum se Muhammad Bin Kaseer ne bayan kiya, kaha hum ko Shuba ne khabar di, unhein Mansoor ne, unhein Salim Bin Abi Al-Jad ne aur unhein Jabir (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Mere naam par naam rakkha karo lekin meri kuniyat na rakkha karo
."

Hum se Ali Bin Abdullah ne bayan kiya, unhon ne kaha hum se Sufyan ne bayan kiya, un se Ayub ne, un se Ibn Sireen ne bayan kiya aur unhon ne Abu Hurairah (Radi Allahu Anhu) se suna, aap ne bayan kiya ke Abu Al-Qasim (Sallallahu Alaihi Wasallam) ne farmaya "Mere naam par naam rakkho lekin meri kuniyat na rakkha karo
."

Mujh se Ishaq Bin Rahwayh ne bayan kiya, kaha hum ko Fazal Bin Musa ne khabar di, unhein Juaid Bin Abdur Rahman ne ke mein ne Saib Bin Yazid (Radi Allahu Anhu) ko churanway saal ki umr mein dekha ke khaasay quwi-o-tawana thay. Unhon ne kaha ke mujhe yaqeen hai ke mere kaanon aur aankhon se jo mein nafa hasil kar raha hoon wo sirf Rasul Allah (Sallallahu Alaihi Wasallam) ki dua ki barkat hai. Meri khala mujhe ek martaba Aap (Sallallahu Alaihi Wasallam) ki khidmat mein le gayeen. Aur arz kiya: Ya Rasul Allah! Ye mera bhanja bimar hai, aap is ke liye dua farma dein. Unhon ne bayan kiya ke phir Aap (Sallallahu Alaihi Wasallam) ne mere liye dua farmayi
.

Hum se Muhammad Bin Ubaidullah ne bayan kiya, kaha hum se Hatim Bin Ismail ne bayan kiya, un se Juaid Bin Abdur Rahman ne bayan kiya aur unhon ne Saib Bin Yazid (Radi Allahu Anhu) se suna ke meri khala mujhe Rasul Allah (Sallallahu Alaihi Wasallam) ki khidmat mein le kar hazir huien aur unhon ne arz kiya: Ya Rasul Allah! Mera bhanja bimar ho gaya hai. Is par Aap (Sallallahu Alaihi Wasallam) ne mere sar par dast-e-mubarak phera aur mere liye barkat ki dua farmayi. Is ke baad Aap (Sallallahu Alaihi Wasallam) ne wazu kiya to mein ne Aap (Sallallahu Alaihi Wasallam) ke wazu ka pani piya, phir aap ki peeth ki taraf ja ke khara ho gaya aur mein ne Muhar-e-Nubuwwat ko aap ke dono mondhon ke darmiyan dekha. Muhammad Bin Ubaidullah ne kaha ke «hajlatun» , «hajjul farsi» se mushtaq hai jo ghore ki is safaidi ko kehte hain jo is ki dono aankhon ke beech mein hoti hai. Ibrahim Bin Hamzah ne kaha: «mithla zir-ril hajlatai» yani ray-e-muhmala pehle phir zay-e-mujama. Imam Bukhari (Rahimahullah) ne kaha ke sahih ye hai ke ray-e-muhmala pehle hai
.

Hum se Abu Asim ne bayan kiya, un se Umar Bin Saeed Bin Abi Husain ne bayan kiya, un se Ibn Abi Mulaikah ne aur un se Uqbah Bin Haris ne ke Abu Bakr (Radi Allahu Anhu) asar ki namaz se farigh ho kar masjid se bahar nikle to dekha ke Hasan (Radi Allahu Anhu) bacchon ke sath khel rahe hain. Aap ne un ko apne kandhe par bitha liya aur farmaya: Mere baap tum par qurban hon tum mein Nabi Kareem (Sallallahu Alaihi Wasallam) ki shabahat hai. Ali ki nahi. Ye sun kar Ali (Radi Allahu Anhu) hans rahe thay (khush ho rahe thay)
.