Hum se Abu Maamar ne bayan kiya, kaha hum se Abdul Waris ne bayan kiya, un se Husain Bin Waqid ne, un se Abdullah Bin Buraidah ne bayan kiya, kaha mujh se Yahya Bin Yamar ne bayan kiya, un se Abu Al-Aswad Deeli ne bayan kiya aur un se Abu Zar (Radi Allahu Anhu) ne ke unhon ne Nabi Kareem (Sallallahu Alaihi Wasallam) se suna, Aap (Sallallahu Alaihi Wasallam) farma rahe thay "Jis shakhs ne bhi jaan boojh kar apne baap ke siwa kisi aur ko apna baap banaya to is ne kufr kiya aur jis shakhs ne bhi apna nasab kisi aisi qoum se milaya jis se is ka koi (nasabi) talluq nahi hai to wo apna thikana jahannam mein bana le
."

Hum se Ali Bin Ayash ne bayan kiya, kaha hum se Jarir ne bayan kiya, kaha ke mujh se Abdul Wahid Bin Abdullah Nasri ne bayan kiya, kaha ke mein ne Wasilah Bin Asqa (Radi Allahu Anhu) se suna, wo bayan karte thay ke Rasul Allah (Sallallahu Alaihi Wasallam) ne farmaya "Sab se bara bohtan aur sakht jhoot ye hai ke aadmi apne baap ke siwa kisi aur ko apna baap kahe ya jo cheez is ne khwab mein nahi dekhi. Is ke dekhne ka dawa kare. Ya Rasul Allah (Sallallahu Alaihi Wasallam) ki taraf aaisi hadees mansoob kare jo aap ne na farmayi ho
."

Hum se Musaddad ne bayan kiya, kaha hum se Hammad ne bayan kiya, un se Abu Jamrah ne bayan kiya, kaha ke mein ne Abdullah Bin Abbas (Radi Allahu Anhuma) se suna wo kehte thay ke qabila Abdul Qais ka wafd Rasul Allah (Sallallahu Alaihi Wasallam) ki khidmat mein aaya aur is ne arz kiya: Ya Rasul Allah! Hamara talluq qabila Rabee-ah se hai aur hamare aur aap ke darmiyan (raste mein) kuffar-e-Muzar ka qabila parta hai, is liye hum aap ki khidmat-e-aqdas mein sirf hurmat ke mahinon mein hi hazir ho sakte hain. Munasib hota agar aap humein aise ahkam batla dete jin par hum khud bhi mazbooti se qaim rehte aur jo log hamare peeche reh gaye hain unhein bhi bata dete. Nabi Kareem (Sallallahu Alaihi Wasallam) ne farmaya ke mein tumhein chaar cheezon ka hukam deta hoon aur chaar cheezon se rokta hoon, awwal Allah par iman lane ka, yani is ki gawahi dena ke Allah Ta'ala ke siwa aur koi mabood nahi aur namaz qaim karne ka aur zakat ada karne ka aur is baat ka ke jo kuch bhi tumhein maal-e-ghanimat mile is mein se panchwan hissa Allah ko (yani Imam-e-waqt ke Bait-ul-Maal ko) ada karo aur mein tumhein dubba, hantam, naqeer aur muzaffat (ke istemal) se mana karta hoon
.

Hum se Abu Al-Yaman ne bayan kiya, kaha hum ko Shuaib ne khabar di, unhein Zuhri ne, un se Salim Bin Abdullah ne aur un se Abdullah Bin Umar (Radi Allahu Anhuma) ne bayan kiya ke mein ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) minbar par farma rahe thay "Aagah ho jao is taraf se fasad phoute ga." Aap (Sallallahu Alaihi Wasallam) ne mashriq ki taraf ishara kar ke ye jumla farmaya, jidhar se Shaitan ka seeng tulu hota hai
.

Hum se Abu Nuaim ne bayan kiya, kaha hum se Sufyan ne bayan kiya, un se Saad Bin Ibrahim ne, un se Abdur Rahman Bin Hurmuz ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Quraish, Ansar, Juhainah, Muzainah, Aslam, Ghifar aur Ashja mere khair-khwah hain, aur Allah aur is ke Rasul ke siwa aur koi un ka humayati nahi
."

Hum se Muhammad Bin Ghurair Zuhri ne bayan kiya, unhon ne kaha hum se Yaqub Bin Ibrahim ne bayan kiya, un se un ke walid ne, un se Salih ne, un se Nafay ne aur unhein Abdullah Bin Umar (Radi Allahu Anhuma) ne khabar di ke Rasul Allah (Sallallahu Alaihi Wasallam) ne minbar par farmaya "Qabila Ghifar ki Allah Ta'ala ne maghfirat farma di aur qabila Aslam ko Allah Ta'ala ne salamat rakkha aur qabila Assiyah ne Allah Ta'ala ki aur is ke Rasul ki na-farmani ki
."

Hum se Muhammad Bin Salam ne bayan kiya, kaha hum ko Abdul Wahab Saqafi ne khabar di, unhein Ayub ne, unhein Muhammad ne, unhein Abu Hurairah (Radi Allahu Anhu) ne aur un se Nabi Kareem (Sallallahu Alaihi Wasallam) ne bayan kiya ke "Qabila Aslam ko Allah Ta'ala ne salamat rakkha aur qabila Ghifar ki Allah Ta'ala ne maghfirat farma di
."

Hum se Qabisah ne bayan kiya, kaha hum se Sufyan ne bayan kiya, (doosri sanad) Imam Bukhari (Rahimahullah) ne kaha aur mujh se Muhammad Bin Bashar ne bayan kiya, kaha hum se Abdur Rahman Bin Mahdi ne bayan kiya, un se Sufyan ne, un se Abdul Malik Bin Umair ne, un se Abdur Rahman Bin Abi Bakrah ne aur un se un ke walid Abu Bakrah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Batao kya Juhainah, Muzainah, Aslam aur Ghifar ke qabile Bani Tamim, Bani Asad, Bani Abdullah Bin Ghatafan aur Bani Aamir Bin Sa'sa'ah ke muqable mein behtar hain?" Ek shakhs (Aqra Bin Habis) ne kaha ke wo to tabah-o-barbad hue. Nabi Kareem (Sallallahu Alaihi Wasallam) ne farmaya ke haan ye charon qabile Banu Tamim, Banu Asad, Banu Abdullah Bin Ghatafan aur Banu Aamir Bin Sa'sa'ah ke qabilon se behtar hain
.

Mujh se Muhammad Bin Bashar ne bayan kiya, kaha hum se Ghundar ne bayan kiya, un se Shuba ne bayan kiya, un se Muhammad Bin Abi Yaqub ne bayan kiya, unhon ne Abdur Rahman Bin Abi Bakrah se suna, unhon ne apne walid se ke Aqra Bin Habis (Radi Allahu Anhu) ne Nabi Kareem (Sallallahu Alaihi Wasallam) se arz kiya ke aap se in logon ne baiyat ki hai ke jo hajiyon ka saman churaya karte thay yani Aslam aur Ghifar aur Muzainah ke log, Muhammad Bin Abi Yaqub ne kaha ke mein samajhta hoon Abdur Rahman ne Juhainah ka bhi zikr kiya, Shuba ne kaha ke ye shak Muhammad Bin Abi Yaqub ko hua. Nabi Kareem (Sallallahu Alaihi Wasallam) ne farmaya "Batlao Aslam, Ghifar, Muzainah, aur mein samajhta hoon ke Juhainah ko bhi kaha ye charon qabile Bani Tamim, Bani Aamir aur Asad aur Ghatafan se behtar nahi hain? Kya ye (muakh-khar-ul-zikr) kharab aur barbad nahi hue?" Aqra ne kaha: Haan, Aap (Sallallahu Alaihi Wasallam) ne farmaya "Qasam hai is zaat ki jis ke hath mein meri jaan hai! Ye un se behtar hain
."

Hum se Suleman Bin Harb ne bayan kiya, kaha hum se Hammad ne bayan kiya, un se Ayub ne, un se Muhammad ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya ke qabila Aslam, Ghifar, Muzainah aur Juhainah ke kuch log ya unhon ne bayan kiya ke Muzainah ke kuch log ya (bayan kiya ke) Juhainah ke kuch log Allah Ta'ala ke nazdeek ya bayan kiya ke qiyamat ke din qabila Asad, Tamim, Hawazin aur Ghatafan se behtar hon ge
.