Hum se Muhammad bin Bashar ne bayan kiya, kaha hum se Yahya bin Sa'id Qattan aur Ibn Mahdi dono ne bayan kiya, kaha ke hum se Shu'bah ne isi tarah bayan kiya (is ziyati ke sath) ke jab Aap kisi baat ko bura samajhte to Aap ke chehre par us ka asar zahir ho jata.

Mujh Ali bin Ja'd ne bayan kiya, unhon ne kaha ke hum ko Shu'bah ne khabar di, unhein A'mash ne, unhein Abu Hazim ne aur un se Abu Hurairah Radi Allahu Anhu ne bayan kiya ke Nabi Kareem Sallallahu Alaihi Wa Sallam ne kabhi kisi khane mein aib nahi nikala, agar Aap ko marghoob hota to khate varna chhor dete.

Hum se Qutaibah bin Sa'id ne bayan kiya, kaha hum se Bakr bin Mudar ne bayan kiya, un se Ja'far bin Rabiah ne, un se A'raj ne, un se Abdullah bin Malik bin Buhainah Asadi Radi Allahu Anhu ne bayan kiya ke Nabi Kareem Sallallahu Alaihi Wa Sallam jab sajda karte to dono hath pait se alag rakhte yahan tak ke Aap Sallallahu Alaihi Wa Sallam ki baghlein hum log dekh lete, Ibn Bukair ne Bakr se riwayat ki us mein yun hai, yahan tak ke Aap ki baghlon ki safedi dikhayi deti thi.

Hum se Abdula'la bin Hammad ne bayan kiya, unhon ne kaha hum se Yazid bin Zurai ne bayan kiya, unhon ne kaha hum se Sa'id ne bayan kiya, unhon ne Qatadah se, unhon ne Anas bin Malik Radi Allahu Anhu se ke Rasoolullah Sallallahu Alaihi Wa Sallam dua istisqa ke siwa aur kisi dua mein (zyada uncha) hath nahi uthate thay. Is dua mein Aap Sallallahu Alaihi Wa Sallam itna uncha hath uthate ke baghl mubarak ki safedi dikhayi deti thi.

Hum se Hasan bin Sabbah Bazzar ne bayan kiya, kaha hum se Muhammad bin Sabiq ne bayan kiya, kaha hum se Malik bin Maghul ne bayan kiya, kaha ke mein ne Awn bin Abi Juhaifah se suna, woh apne walid (Abu Juhaifah Radi Allahu Anhu) se naqal karte thay ke mein safar ke irada se Nabi Kareem Sallallahu Alaihi Wa Sallam ki khidmat mein hazir hua to Aap Sallallahu Alaihi Wa Sallam Abtah mein (Muhassab mein) khaime ke andar tashreef rakhte thay. Kari dopahar ka waqt tha. Itne mein Bilal Radi Allahu Anhu ne bahar nikal kar namaz ke liye azan di aur andar aa gaye aur Bilal Radi Allahu Anhu ne Aap Sallallahu Alaihi Wa Sallam ke wudhu ka bacha hua pani nikala to log use lene ke liye toot pare. Phir Bilal Radi Allahu Anhu ne ek naiza nikala aur Aap Sallallahu Alaihi Wa Sallam bahar tashreef laye, goya Aap ki pindliyon ki chamak ab bhi meri nazron ke samne hai. Bilal Radi Allahu Anhu ne (satra ke liye) naiza gaar diya. Aap Sallallahu Alaihi Wa Sallam ne zuhr aur asr ki do do rak'at qasr namaz parhayi, gadhe aur aurtein Aap ke samne se guzar rahi thin.

Mujh se Hasan bin Sabbah Bazzar ne bayan kiya, kaha hum se Sufyan ne bayan kiya, un se Zuhri ne, un se Urwah ne aur un se Aisha Radi Allahu Anha ne bayan kiya ke Nabi Kareem Sallallahu Alaihi Wa Sallam is qadar thehar thehar kar batein karte ke agar koi shakhs (Aap Sallallahu Alaihi Wa Sallam ke alfaz) gin lena chahta to gin sakta tha.

Aur Laith ne bayan kiya ke mujh se Yunus ne bayan kiya, un se Ibn Shihab ne bayan kiya ke mujhe Urwah bin Zubair ne khabar di aur un se Aisha Radi Allahu Anha ne bayan kiya ke (Abu Hurairah Radi Allahu Anhu) par tumhein ta'ajub nahi hua. Woh aaye aur mere hujrah ke ek kone mein baith kar Rasoolullah Sallallahu Alaihi Wa Sallam ki ahadeeth mujhe sunane ke liye bayan karne lage. Mein is waqt namaz parh rahi thi. Phir woh meri namaz khatam hone se pehle hi uth kar chale gaye. Agar woh mujhe mil jate to mein un ki khabar leti ke Rasoolullah Sallallahu Alaihi Wa Sallam tumhari tarah yun jaldi jaldi batein nahi kiya karte thay. Nabi Kareem Sallallahu Alaihi Wa Sallam ki aankhein zahir mein soti thin lekin dil ghafil nahi hota tha.

Is ki riwayat Sa'id bin Mina ne Jabir Radi Allahu Anhu se ki hai aur unhon ne Nabi Kareem Sallallahu Alaihi Wa Sallam se.

Hum se Abdullah bin Maslamah ne bayan kiya, un se Imam Malik ne, un se Sa'id Maqburi ne, un se Abu Salamah bin Abdur Rahman ne unhon ne Aisha Radi Allahu Anha se poocha ke Ramzan shareef mein Rasoolullah Sallallahu Alaihi Wa Sallam ki namaz (tahajjud ya tarawih) ki kya kaifiyat hoti thi? Unhon ne bayan kiya ke Aap Sallallahu Alaihi Wa Sallam Ramzan-ul-Mubarak ya doosre kisi bhi mahine mein gyarah rak'at se zyada nahi parhte thay (un hi ko tahajjud kaho ya tarawih) pehle Aap Sallallahu Alaihi Wa Sallam char rak'at parhte, woh rak'atein kitni lambi hoti thin. Kitni us mein khoobi hoti thin is ke bare mein na poocho. Phir Aap Sallallahu Alaihi Wa Sallam char rak'atein parhte. Yeh charon bhi kitni lambi hotin aur un mein kitni khoobi hoti. Is ke mutalliq na poocho. Phir Aap Sallallahu Alaihi Wa Sallam teen rak'at witr parhte, mein ne arz kiya: Ya Rasul Allah! Aap witr parhne se pehle kyun so jate hain? Aap Sallallahu Alaihi Wa Sallam ne farmaya "Meri aankhein soti hain lekin mera dil bedar rehta hai."

Hum se Ismail bin Abi Uwais ne bayan kiya, kaha ke mujh se mere bhai (Abdul Hameed) ne bayan kiya, un se Sulaiman bin Bilal ne, un se Shareek bin Abdullah bin Abi Namr ne, unhon ne Anas bin Malik Radi Allahu Anhu se suna woh Masjid al-Haram se Nabi Kareem Sallallahu Alaihi Wa Sallam ki Meraj ka waqia bayan kar rahe thay ke (Meraj se pehle) teen farishte aaye. Yeh Aap Sallallahu Alaihi Wa Sallam par wahi nazil hone se bhi pehle ka waqia hai. Is waqt Aap Sallallahu Alaihi Wa Sallam Masjid al-Haram mein (do aadmiyon Hamza aur Ja'far bin Abi Talib ke darmiyan) so rahe thay. Ek farishte ne poocha: Woh kon hain? (jin ko le jane ka hukm hai) Doosre ne kaha ke woh darmiyan wale hain. Wahi sab se behtar hain. Teesre ne kaha ke phir jo sab se behtar hain unhein sath le chalo. Is raat sirf itna hi waqia ho kar reh gaya. Phir Aap ne unhein nahi dekha. Lekin farishte ek aur raat mein aaye. Aap dil ki nigah se dekhte thay aur Aap ki aankhein soti thin par dil nahi sota tha, aur tamam ambiya ki yahi kaifiyat hoti hai ke jab un ki aankhein soti hain to dil is waqt bhi bedar hota hai. Gharaz ke phir Jibrail Alaihis Salam ne Aap ko apne sath liya aur aasman par charha le gaye.