Hum se Muhammad Bin Muqatil ne bayan kiya kaha hum ko Abdullah Bin Mubarak ne khabar di kaha hum ko Salih Bin Hayyi ne khabar di ke Khurasan ke ek shakhs ne Shabi se poocha to unhon ne bayan kiya ke mujhe Abu Burdah ne khabar di aur un se Abu Musa Ashari (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne bayan farmaya "Agar koi shakhs apni loundi ko acchi tarah adab sikhlaye aur poore taur par ise deen ki taleem de phir ise aazad kar ke is se nikah kar le to ise dugna sawab milta hai aur wo shakhs jo pehle Isa (Alaihis Salam) par iman rakhta tha phir mujh par iman laya to ise bhi dugna sawab milta hai aur wo ghulam jo apne Rabb ka bhi darr rakhta hai aur apne aaqa ki bhi itaat karta hai to ise bhi dugna sawab milta hai."

Hum se Muhammad Bin Yusuf ne bayan kiya unhon ne kaha hum se Sufyan ne unhon ne kaha ke hum se Mugheerah Bin Numaan ne unhein Saeed Bin Jubair ne aur un se Abdullah Bin Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne farmaya "(Qiyamat ke din) tum log nange paon nange badan aur baghair khatna ke uthaye jao ge. Phir Aap (Sallallahu Alaihi Wasallam) ne is aayat ki tilawat ki "Jis tarah hum ne unhein pehli martaba paida kiya tha isi tarah hum dobara loutayein ge ye hamari jaanib se waada hai aur beshak hum ise karne wale hain." Phir sab se pehle Ibrahim (Alaihis Salam) ko kapra pehnaya jaye ga. Phir mere as-hab ko dahni (jannat ki) taraf le jaya jaye ga. Lekin kuch ko bain (jahannam ki) taraf le jaya jaye ga. Mein kahoon ga ke ye to mere as-hab hain lekin mujhe bataya jaye ga ke jab aap un se juda hue to isi waqt unhon ne irtidad ikhtiyar kar liya tha. Mein is waqt wohi kahoon ga jo Abde-Saleh Isa Ibn Maryam (Alaihimas Salam) ne kaha tha ke jab tak mein un mein maujood tha un ki nigraani karta raha lekin jab tu ne mujhe utha liya to tu hi un ka nigahban hai aur tu har cheez par nigahban hai. Aayat «al-azizul hakeemu» tak. Muhammad Bin Yusuf ne bayan kiya ke Abu Abdullah se riwayat hai aur un se Qabisah ne bayan kiya ke ye wo murtadeen hain jinhon ne Abu Bakr (Radi Allahu Anhu) ke ahd-e-khilafat mein kufr ikhtiyar kiya tha aur jin se Abu Bakr (Radi Allahu Anhu) ne jung ki thi

Hum se Ishaq Bin Rahwayh ne bayan kiya kaha hum ko Yaqub Bin Ibrahim ne khabar di kaha mujh se mere walid ne bayan kiya un se Salih Bin Kaisan ne un se Ibn Shihab ne un se Saeed Bin Musayyib ne aur unhon ne Abu Hurairah (Radi Allahu Anhu) se suna unhon ne kaha ke Rasul Allah (Sallallahu Alaihi Wasallam) ne farmaya "Is zaat ki qasam jis ke hath mein meri jaan hai wo zamana qareeb hai ke Isa Ibn Maryam (Alaihimas Salam) tumhare darmiyan ek aadil hakim ki haisiyat se nazil hon ge. Wo saleeb ko tor dein ge sooar ko maar dalein ge aur jizya mouqoof kar dein ge. Is waqt maal ki itni kasrat ho jaye gi ke koi ise lene wala nahi mile ga. Is waqt ka ek sajda «duniya wa ma feeha» se barh kar hoga. Phir Abu Hurairah (Radi Allahu Anhu) ne kaha ke agar tumhara ji chahe to ye aayat parh lo «wa in min ahlil kitabi illa layu-minanna bihi qabla moutihi wa yaumal qiyamati yakunu alaihim shaheedan» "Aur koi Ahl-e-Kitab aisa nahi hoga jo Isa ki mout se pehle is par iman na laye aur qiyamat ke din wo un par gawah hon ge."

Hum se Ibn Bukair ne bayan kiya kaha hum se Laith ne bayan kiya un se Yunus ne un se Ibn Shihab ne un se Abu Qatada Ansari (Radi Allahu Anhu) ke ghulam Nafay ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Tumhara is waqt kya haal hoga jab Isa Ibn Maryam tum mein utrein ge (tum namaz parh rahe ho ge) aur tumhara Imam tum hi mein se hoga." Is riwayat ki mutabiat Aqeel aur Auzai ne ki

Hum se Musa Bin Ismail ne bayan kiya unhon ne kaha hum se Abu Awana ne bayan kiya kaha hum se Abdul Malik ne bayan kiya un se Rabee Bin Hirash ne bayan kiya ke Uqbah Bin Amr (Radi Allahu Anhu) ne Huzaifah (Radi Allahu Anhu) se kaha kya aap wo hadees hum se nahi bayan karein ge jo aap ne Rasul Allah (Sallallahu Alaihi Wasallam) se suni thi? Unhon ne kaha ke mein ne Aap (Sallallahu Alaihi Wasallam) ko ye farmate suna tha ke jab Dajjal nikle ga to is ke sath aag aur pani dono hon ge lekin logon ko jo aag dikhayi de gi wo thanda pani hoga aur logon ko jo thanda pani dikhayi de ga to wo jalane wali aag hogi. Is liye tum mein se jo koi is ke zamane mein ho to ise is mein girna chahiye jo aag hogi kyunke wohi nihayat shireen aur thanda pani hoga

Huzaifah (Radi Allahu Anhu) ne farmaya ke mein ne Nabi Kareem (Sallallahu Alaihi Wasallam) ko ye farmate suna tha ke pehle zamane mein ek shakhs ke pas Malik-ul-Mout un ki rooh qabz karne aaye to un se poocha gaya koi apni naiki tumhein yaad hai? Unhon ne kaha ke mujhe to yaad nahi parti. Un se dobara kaha gaya ke yaad karo! Unhon ne kaha ke mujhe koi apni naiki yaad nahi siwa is ke ke mein duniya mein logon ke sath khareed-o-farokht kiya karta tha aur lain dain kiya karta tha jo log khush-haal hote unhein to mein (apna qarz wasool karte waqt) muhlat diya karta tha aur tang hath walon ko maaf kar diya karta tha. Allah Ta'ala ne unhein isi par jannat mein dakhil kiya

Aur Huzaifah (Radi Allahu Anhu) ne bayan kiya ke mein ne Rasul Allah (Sallallahu Alaihi Wasallam) ko ye farmate suna ke ek shakhs ki mout ka jab waqt aa gaya aur wo apni zindagi se bilkul mayoos ho gaya to is ne apne ghar walon ko wasiyat ki ke jab meri mout ho jaye to mere liye bahut sari lakriyan jama karna aur un mein aag laga dena. Jab aag mere gosht ko jala chuke aur aakhri haddi ko bhi jala de to in jali hui haddiyon ko pees dalna aur kisi tund hawa wale din ka intezar karna aur (aise kisi din) meri raakh ko darya mein baha dena. Is ke ghar walon ne aisa hi kiya. Lekin Allah Ta'ala ne is ki raakh ko jama kiya aur is se poocha aisa tu ne kyun karwaya tha? Is ne jawab diya ke tere hi khauf se ae Allah! Allah Ta'ala ne isi wajah se is ki maghfirat farma di. Uqbah Bin Amr (Radi Allahu Anhu) ne kaha ke mein ne Aap ko ye farmate suna tha ke ye shakhs kafan chor tha

Mujh se Bishr Bin Muhammad ne bayan kiya unhon ne kaha hum ko Abdullah ne khabar di unhon ne kaha mujh ko Maamar aur Yunus ne khabar di un se Zuhri ne bayan kiya unhein Ubaidullah Bin Abdullah ne khabar di ke Aisha (Radi Allahu Anha) aur Ibn Abbas (Radi Allahu Anhuma) ne bayan kiya jab Rasul Allah (Sallallahu Alaihi Wasallam) par naza ki halat tari hui to Aap (Sallallahu Alaihi Wasallam) apni chadar chehra mubarak par baar baar daal lete phir jab shiddat barhti to ise hata dete thay. Aap (Sallallahu Alaihi Wasallam) ne isi halat mein farmaya tha Allah ki laanat ho Yahood-o-Nasara par ke unhon ne apne anbiya ki qabron ko sajda gah bana liya. Aap (Sallallahu Alaihi Wasallam) is ummat ko un ke kiye se darana chahte thay

Mujh se Bishr Bin Muhammad ne bayan kiya unhon ne kaha hum ko Abdullah ne khabar di unhon ne kaha mujh ko Maamar aur Yunus ne khabar di un se Zuhri ne bayan kiya unhein Ubaidullah Bin Abdullah ne khabar di ke Aisha (Radi Allahu Anha) aur Ibn Abbas (Radi Allahu Anhuma) ne bayan kiya jab Rasul Allah (Sallallahu Alaihi Wasallam) par naza ki halat tari hui to Aap (Sallallahu Alaihi Wasallam) apni chadar chehra mubarak par baar baar daal lete phir jab shiddat barhti to ise hata dete thay. Aap (Sallallahu Alaihi Wasallam) ne isi halat mein farmaya tha Allah ki laanat ho Yahood-o-Nasara par ke unhon ne apne anbiya ki qabron ko sajda gah bana liya. Aap (Sallallahu Alaihi Wasallam) is ummat ko un ke kiye se darana chahte thay

Mujh se Muhammad Bin Bashar ne bayan kiya ke hum se Muhammad Bin Jafar ne bayan kiya kaha hum se Shuba ne bayan kiya un se Furat Qazzar ne bayan kiya unhon ne Abu Hazim se suna unhon ne bayan kiya ke mein Abu Hurairah (Radi Allahu Anhu) ki majlis mein panch saal tak baitha hoon. Mein ne unhein Rasul Allah (Sallallahu Alaihi Wasallam) ki ye hadees bayan karte suna ke Aap (Sallallahu Alaihi Wasallam) ne farmaya "Bani Israel ke anbiya un ki siyasi rahnumayi bhi kiya karte thay jab bhi un ka koi Nabi halak ho jata to doosre un ki jagah aa maujood hote lekin yaad rakkho mere baad koi Nabi nahi aaye ga. Han mere naib hon ge aur bahut hon ge. Sahaba ne arz kiya ke un ke mutaliq aap ka humein kya hukam hai. Aap (Sallallahu Alaihi Wasallam) ne farmaya ke sab se pehle jis se baiyat kar lo bas isi ki wafadari par qaim raho aur un ka jo haq hai is ki adayigi mein kotahi na karo kyunke Allah Ta'ala un se qiyamat ke din un ki ra-aya ke baare mein sawal kare ga."