Hum se Qutaibah Bin Saeed ne bayan kiya, kaha hum se Laith ne bayan kiya, un se Ibn Shihab ne un se Urwah ne aur un se Aisha (Radi Allahu Anha) ne ke Makhzumiyah khatoon (Fatima Bint-e-Aswad) jis ne (Ghazwa-e-Fatah ke mauqa par) chori kar li thi, is ke maamla ne Quraish ko fikr mein daal diya. Unhon ne aapas mein mashwara kiya ke is maamla par Rasul Allah (Sallallahu Alaihi Wasallam) se guftagu kaun kare! Aakhir ye tay paya ke Usamah Bin Zaid (Radi Allahu Anhuma) Aap (Sallallahu Alaihi Wasallam) ko bahut aziz hain. In ke siwa aur koi is ki himmat nahi kar sakta. Chunancha Usamah (Radi Allahu Anhu) ne Aap (Sallallahu Alaihi Wasallam) se is baare mein kuch kaha to Aap (Sallallahu Alaihi Wasallam) ne farmaya. Ae Usamah! Kya tu Allah ki hudood mein se ek hadd ke baare mein mujh se sifarish karta hai? Phir Aap (Sallallahu Alaihi Wasallam) kharay hue aur khutba diya (jis mein) Aap (Sallallahu Alaihi Wasallam) ne farmaya. Pichli bahut si ummatein is liye halak ho gayeen ke jab un ka koi shareef aadmi chori karta to ise chor dete aur agar koi kamzor chori karta to is par hadd qaim karte aur Allah ki qasam! Agar Fatima Bint-e-Muhammad (Sallallahu Alaihi Wasallam) bhi chori kare to mein is ka bhi hath kaat daloon
.

Hum se Adam Bin Abi Iyas ne bayan kiya, kaha hum se Shuba ne bayan kiya, kaha hum se Abdul Malik Bin Maisarah ne bayan kiya, kaha ke mein ne Nazzal Bin Sabrah Hilali se suna aur un se Abdullah Bin Masood (Radi Allahu Anhu) ne bayan kiya ke mein ne ek sahabi (Amr Bin Al-Aas) ko Quran Majeed ki ek aayat parhte suna. Wohi aayat Nabi Kareem (Sallallahu Alaihi Wasallam) se is ke khilaf qiraat ke sath mein sun chuka tha, is liye mein unhein sath le kar Aap (Sallallahu Alaihi Wasallam) ki khidmat mein hazir hua aur Aap (Sallallahu Alaihi Wasallam) se ye waqia bayan kiya lekin mein ne Aap (Sallallahu Alaihi Wasallam) ke chehra mubarak par is ki wajah se narazgi ke aasar dekhe. Aap (Sallallahu Alaihi Wasallam) ne farmaya tum dono accha parhte ho. Aapas mein ikhtilaf na kiya karo. Tum se pehle log isi qism ke jhagron se tabah ho gaye
.

Hum se Umar Bin Hafs ne bayan kiya, kaha hum se mere baap Hafs Bin Ghiyas ne bayan kiya, kaha hum se Amash ne bayan kiya ke ke mujh se Shaqiq Bin Salamah ne bayan kiya ke Abdullah Bin Masood (Radi Allahu Anhu) ne kaha mein goya Nabi Kareem (Sallallahu Alaihi Wasallam) ko is waqt dekh raha hoon. Aap Bani Israel ke ek Nabi ka waqia bayan kar rahe thay ke un ki qoum ne unhein mara aur khoon alood kar diya. Lekin wo Nabi khoon saaf karte jate aur ye dua karte «Allahum-maghfir li-qoumi» ke ae Allah! Meri qoum ki maghfirat farma. Ye log jante nahi hain
.

Hum se Abu Al-Walid ne bayan kiya, kaha hum se Abu Awana ne bayan kiya, un se Qatada ne un se Uqbah Bin Abdul Ghafir ne un se Abu Saeed Khudri (Radi Allahu Anhu) ne aur un se Nabi Kareem (Sallallahu Alaihi Wasallam) ne ke guzashta ummaton mein ek aadmi ko Allah Ta'ala ne khoob doulat di thi. Jab is ki mout ka waqt aaya to is ne apne beton se poocha mein tumhare haq mein kaisa baap sabit hua? Beton ne kaha ke aap hamare behtareen baap thay. Is shakhs ne kaha lekin mein ne umr bhar koi naik kaam nahi kiya. Is liye jab mein mar jaoon to mujhe jala dalna, phir meri haddiyon ko pees dalna aur (raakh ko) kisi sakht aandhi ke din hawa mein ura dena. Beton ne aisa hi kiya. Lekin Allah Paak ne ise jama kiya aur poocha ke tu ne aisa kyun kiya? Is shakhs ne arz kiya ke parwardigar tere hi khauf se chunancha Allah Ta'ala ne ise apne sayah-e-rahmat mein jagah di. Is hadees ko Muaz Anbari ne bayan kiya ke hum se Shuba ne bayan kiya, un se Qatada ne, unhon ne Uqbah Bin Abdul Ghafir se suna, unhon ne Abu Saeed Khudri (Radi Allahu Anhu) se aur unhon ne Nabi Kareem (Sallallahu Alaihi Wasallam) se
.

Hum se Musaddad ne bayan kiya kaha, hum se Abu Awana ne un se Abdul Malik Bin Umair ne, un se Rabee Bin Hirash ne bayan kiya ke Uqbah Bin Amr Abu Masood Ansari ne Huzaifah (Radi Allahu Anhu) se kaha ke aap ne Nabi Kareem (Sallallahu Alaihi Wasallam) se jo hadeesein suni hain wo aap hum se kyun bayan nahi karte? Huzaifah (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) ko ye kehte suna tha ke ek shakhs ki mout ka waqt jab qareeb hua aur wo zindagi se bilkul naamid ho gaya to apne ghar walon ko wasiyat ki ke jab meri mout ho jaye to pehle mere liye bahut si lakriyan jama karna aur is se aag jalana. Jab aag mere jism ko khakastar bana chuke aur sirf haddiyan baqi reh jayein to haddiyon ko pees lena aur kisi sakht garmi ke din mein ya (yun farmaya ke) sakht hawa ke din mujh ko hawa mein ura dena. Lekin Allah Ta'ala ne ise jama kiya aur poocha ke tu ne aisa kyun kiya tha? Is ne kaha ke tere hi darr se. Aakhir Allah Ta'ala ne is ko bakhsh diya. Uqbah (Radi Allahu Anhu) ne kaha ke mein ne bhi Aap (Sallallahu Alaihi Wasallam) ko farmate hue ye hadees suni hai. Hum se Musa ne bayan kiya kaha hum se Abu Awana ne bayan kiya kaha hum se Abdul Malik ne bayan kiya aur kaha ke is riwayat mein «fi yaumin ra-hin» hai (siwa shak ke) is ke maani bhi kisi taiz hawa ke din ke hain
.

Hum se Abdul Aziz Bin Abdullah ne bayan kiya, kaha hum se Ibrahim Bin Saad ne bayan kiya un se Ibn Shihab ne un se Ubaidullah Bin Abdullah Bin Utbah ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Ek shakhs logon ko qarz diya karta tha aur apne nokaron ko is ne ye keh rakkha tha ke jab tum kisi ko muflis pao (jo mera qarz dar ho) to ise maaf kar diya karo. Mumkin hai Allah Ta'ala bhi humein maaf farma de." Rasul Allah (Sallallahu Alaihi Wasallam) ne farmaya "Jab wo Allah Ta'ala se mila to Allah ne ise bakhsh diya
."

Hum se Abdullah Bin Muhammad Musandi ne bayan kiya kaha hum se Hisham ne bayan kiya kaha hum ko Maamar ne khabar di, unhein Zuhri ne unhein Humaid Bin Abdur Rahman ne aur unhein Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Ek shakhs bahut gunah kiya karta tha jab is ki mout ka waqt qareeb aaya to apne beton se is ne kaha ke jab mein mar jaoon to mujhe jala dalna phir meri haddiyon ko pees kar hawa mein ura dena Allah ki qasam! Agar mere Rabb ne mujhe pakar liya to mujhe itna sakht azab kare ga jo pehle kisi ko bhi is ne nahi kiya hoga. Jab wo mar gaya to (is ki wasiyat ke mutabiq) is ke sath aisa hi kiya gaya. Allah Ta'ala ne zameen ko hukam farmaya ke agar ek zarra bhi kaheen is ke jism ka tere pas hai to ise jama kar ke la. Zameen hukam baja layi aur wo banda ab (apne Rabb ke samne) khara hua tha. Allah Ta'ala ne daryaft farmaya: Tu ne aisa kyun kiya? Is ne arz kiya: Ae Rabb! Tere darr ki wajah se. Aakhir Allah Ta'ala ne is ki maghfirat kar di. Abu Hurairah (Radi Allahu Anhu) ke siwa doosre Sahaba ne is hadees mein lafz «khashyatika» ke badal «makhafatika» kaha hai (dono lafzon ka matlab ek hi hai)
.

Mujh se Abdullah Bin Muhammad Bin Asma ne bayan kiya kaha hum se Juwairiyah Bin Asma ne bayan kiya, un se Nafay ne un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya " (Bani Israel ki) ek aurat ko ek billi ki wajah se azab diya gaya tha jise is ne qaid kar rakkha tha jis se wo billi mar gayi thi aur is ki saza mein wo aurat dozakh mein gayi. Jab wo aurat billi ko baandhe hue thi to is ne ise khane ke liye koi cheez na di, na peene ke liye aur na is ne billi ko chora hi ke wo zameen ke kiray makoray hi kha leti
."

Hum se Ahmad Bin Yunus ne bayan kiya, un se Zuhair ne kaha hum se Mansoor ne bayan kiya un se Rabee Bin Hirash ne kaha hum se Abu Masood Uqbah Bin Amr (Radi Allahu Anhu) ne kaha ke Nabi Kareem (Sallallahu Alaihi Wasallam) ne farmaya "Logon ne agle paighambaron ke kalam jo paye un mein ye bhi hai ke jab tujh mein haya na ho to phir jo ji chahe kar
."

Hum se Adam Bin Abi Iyas ne bayan kiya, kaha hum se Shuba ne bayan kiya un se Mansoor ne bayan kiya unhon ne kaha mein ne Rabee Bin Hirash se suna wo Abu Masood Ansari (Radi Allahu Anhu) se riwayat karte thay ke Nabi Kareem (Sallallahu Alaihi Wasallam) ne farmaya "Agle paighambaron ke kalam mein se logon ne jo paya ye bhi hai ke jab tujh mein haya na ho phir jo ji chahe kar
."