Hum se Musa bin Ismail ne bayan kiya, kaha hum se Hammaam ne, kaha hum se Ishaaq ne Anas bin Malik ke waaste se naql kiya ke Rasoolullah Sallallahu Alaihi Wasallam ne ek dehaati ko Masjid mein peshaab karte huwe dekha to logon se Aap Sallallahu Alaihi Wasallam ne farmaaya use chhod do jab woh faarigh ho gaya to paani manga kar Aap ne (us jagah) baha diya.

Hum se Abul Yamaan ne bayan kiya, unhon ne kaha hamein Sho’aib ne Zohri ke waaste se khabar di, unhon ne kaha mujhe Ubaidullah bin Abdullah bin ’Utbah bin Mas’ood ne khabar di ke Abu Hurairah Radhiallahu Anhu ne farmaaya ke ek a’raabi khada ho kar Masjid mein peshaab karne laga. To log us par jhapatne lage. (Yeh dekh kar) Rasoolullah Sallallahu Alaihi Wasallam ne logon se farmaaya ke use chhod do aur us ke peshaab par paani ka bhara huwa dol ya kuch kam bhara huwa dol baha do. Kiunki tum narmi ke liye bheje gaye ho, sakhti ke liye nahi.

Hum se Abdan ne bayan kiya, kaha hamein Abdullah ne khabar di, kaha hamein Yahya bin Sa’eed ne khabar di, kaha main ne Anas bin Malik Radhiallahu Anhu se suna, woh Rasoolullah Sallallahu Alaihi Wasallam se riwayat karte hain ke ek dehaati shakhs aaya aur us ne Masjid ke ek kone mein peshaab kar diya. Logon ne us ko mana kiya to Rasoolullah Sallallahu Alaihi Wasallam ne unhein rok diya. Jab woh peshaab kar ke faarigh huwa to Aap Sallallahu Alaihi Wasallam ne us (ke peshaab) par ek dol paani bahaane ka hukm diya. Chunanche baha diya gaya.

Hum se Khalid bin Makhlad ne bayan kiya, kaha hum se Sulaiman ne Yahya bin Sa’eed ke waaste se bayan kiya, kaha main ne Anas bin Malik Radhiallahu Anhu se suna, woh kehte hain ke ek dehaati shakhs aaya aur us ne Masjid ke ek kone mein peshaab kar diya. Logon ne us ko mana kiya to Rasoolullah Sallallahu Alaihi Wasallam ne unhein rok diya. Jab woh peshaab kar ke faarigh huwa to Aap Sallallahu Alaihi Wasallam ne us (ke peshaab) par ek dol paani bahaane ka hukm diya. Chunanche baha diya gaya.

Hum se Abdullah bin Yousuf ne bayan kiya, kaha hum ko Malik ne Hishaam bin ’Urwah se khabar di, unhon ne apne baap (’Urwah) se, unhon ne Umm-ul-Mo’mineen Aisha Radhiallahu Anha se riwayat ki hai ke Rasoolullah Sallallahu Alaihi Wasallam ke paas ek bachcha laaya gaya. Us ne Aap Sallallahu Alaihi Wasallam ke kapde par peshaab kar diya to Aap Sallallahu Alaihi Wasallam ne paani mangaaya aur us par daal diya.

Hum se Abdullah bin Yousuf ne bayan kiya, kaha hamein Malik ne Ibn-e-Shihaab se khabar di, woh Ubaidullah bin Abdullah bin ’Utbah (bin Mas’ood) se yeh Hadees riwayat karte hain, woh Umm-e-Qais bint-e-Mihsan naami ek khatoon se ke woh Rasoolullah Sallallahu Alaihi Wasallam ki khidmat-e-aqdas mein apna chhota bachcha le kar aayein. Jo khaana nahi khaata tha. (Yani sheer khwaar tha) Rasoolullah Sallallahu Alaihi Wasallam ne use apni god mein bitha liya. Us bachche ne Aap Sallallahu Alaihi Wasallam ke kapde par peshaab kar diya. Aap Sallallahu Alaihi Wasallam ne paani manga kar kapde par chidak diya aur use nahi dhoya.

Hum se Adam ne bayan kiya, kaha hum se Sho’bah ne A’mash ke waaste se naql kiya, woh Abu Waail se, woh Huzaifah Radhiallahu Anhu se riwayat karte hain ke Nabi Kareem Sallallahu Alaihi Wasallam kisi qaum ki koodi (kooda karkat daalne ki jagah) par tashreef laaye (pas) Aap Sallallahu Alaihi Wasallam ne wahaan khade ho kar peshaab kiya. Phir paani mangaaya. Main Aap Sallallahu Alaihi Wasallam ke paas paani le kar aaya to Aap Sallallahu Alaihi Wasallam ne Wuzu farmaaya.

Hum se Uthman Ibn-e-Abi Shaibah ne bayan kiya, kaha hum se Jareer ne Mansoor ke waaste se bayan kiya, woh Abu Waail se, woh Huzaifah se riwayat karte hain. Woh kehte hain ke (ek martaba) main aur Rasoolullah Sallallahu Alaihi Wasallam jaa rahe the ke ek qaum ki koodi par (jo) ek deewaar ke peeche (thi) pahunche. To Aap Sallallahu Alaihi Wasallam is tarah khade ho gaye jis tarah hum tum mein se koi (shakhs) khada hota hai. Phir Aap Sallallahu Alaihi Wasallam ne peshaab kiya aur main ek taraf hat gaya. Tab Aap Sallallahu Alaihi Wasallam ne mujhe ishaara kiya to Aap Sallallahu Alaihi Wasallam ke paas (pardah ki gharz se) Aap Sallallahu Alaihi Wasallam ki aydiyon ke qareeb khada ho gaya. Yahan tak ke Aap Sallallahu Alaihi Wasallam peshaab se faarigh ho gaye. (Bawaqt-e-zaroorat aisa bhi kiya jaa sakta hai.)

Hum se Muhammed bin ’Ar’arah ne bayan kiya, kaha hum se Sho’bah ne Mansoor ke waaste se bayan kiya, woh Abu Waail se naql karte hain, woh kehte hain ke Abu Musa Ash’ari peshaab (ke baare) mein sakhti se kaam lete the aur kehte the ke Bani Israel mein jab kisi ke kapde ko peshaab lag jaata to use kaat daalte. Abu Huzaifah kehte hain ke kaash! Woh apne is tashaddud se ruk jaate (kiunki) Rasoolullah Sallallahu Alaihi Wasallam kisi qaum ki koodi (kooda karkat daalne ki jagah) par tashreef laaye aur Aap Sallallahu Alaihi Wasallam ne wahaan khade ho kar peshaab kiya.

Hum se Muhammed Ibn-ul-Muthanna ne bayan kiya, unhon ne kaha hum se Yahya ne Hishaam ke waaste se bayan kiya, un se Fatima ne Asma ke waaste se, woh kehti hain ke ek aurat ne Rasoolullah Sallallahu Alaihi Wasallam ki khidmat mein haazir ho kar arz ki ke ya Rasoolallah! Farmaaiye hum mein se kisi aurat ko kapde mein haiz aa jaaye (to) woh kya kare, Aap Sallallahu Alaihi Wasallam ne farmaaya (ke pehle) use khurche, phir paani se ragde aur paani se dho daale aur usi kapde mein Namaz padh le.