Hum se Asbagh ne bayan kiya, kaha mujhe Ibn-e-Wahb ne khabar di, kaha mujhe ’Amr ne Bukair se, unhon ne Kuraib se, un ko Maimunah Radhiallahu Anha zauja-e-Rasoolullah Sallallahu Alaihi Wasallam ne batlaaya ke Aap Sallallahu Alaihi Wasallam ne un ke yahan (bakri ka) shaana khaaya phir Namaz padhi aur naya Wuzu nahi farmaaya.

Hum se Yahya bin Bukair aur Qutaibah ne bayan kiya, unhon ne kaha hum se Laith ne bayan kiya, woh Uqail se, woh Ibn-e-Shihaab se, woh Ubaidullah bin Abdullah bin ’Utbah se, woh Abdullah bin Abbas Radhiallahu Anhuma se riwayat karte hain ke Rasoolullah Sallallahu Alaihi Wasallam ne doodh piya, phir kulli ki aur farmaaya is mein chiknaayi hoti hai. Is Hadees mein Uqail ki Younus aur Saleh bin Kaisaan ne Zohri se Mutaba’at ki hai.

Hum se Abdullah bin Yousuf ne bayan kiya, kaha mujh ko Malik ne Hishaam se, unhon ne apne baap se khabar di, unhon ne Aisha Radhiallahu Anha se naql kiya ke Rasoolullah Sallallahu Alaihi Wasallam ne farmaaya ke jab Namaz padhte waqt tum mein se kisi ko oongh aa jaaye, to chaahiye ke woh so rahe yahan tak ke neend (ka asar) us se khatm ho jaaye. Is liye ke jab tum mein se koi shakhs Namaz padhne lage aur woh oongh raha ho to woh kuch nahi jaanega ke woh (Allah Ta’ala se) maghfirat talab kar raha hai ya apne nafs ko bad-dua de raha hai.

Hum se Abu Ma’mar ne bayan kiya, kaha hum se Abdul Waris ne, kaha hum se Ayyub ne Abu Qilaabah ke waaste se naql kiya, woh Anas Radhiallahu Anhu se riwayat karte hain, woh Rasoolullah Sallallahu Alaihi Wasallam se Aap Sallallahu Alaihi Wasallam ne farmaaya ke jab tum Namaz mein oonghne lago to so jaana chaahiye. Phir us waqt Namaz padhe jab jaan le ke woh kya padh raha hai.

Hum se Muhammed bin Yousuf ne bayan kiya, kaha hum se Sufyan ne ’Amr bin Amir ke waaste se bayan kiya, kaha main ne Anas Radhiallahu Anhu se suna. (Doosri sanad se) hum se Musaddad ne bayan kiya, kaha hum se Yahya ne, woh Sufyan se riwayat karte hain, un se ’Amr bin Amir ne bayan kiya, woh Anas Radhiallahu Anhu se riwayat karte hain. Unhon ne farmaaya ke Rasoolullah Sallallahu Alaihi Wasallam har Namaz ke liye naya Wuzu farmaaya karte the. Main ne kaha tum log kis tarah karte the, kehne lage hum mein se har ek ko us ka Wuzu us waqt tak kaafi hota, jab tak koi Wuzu todne waali cheez pesh na aa jaati. (Yani peshaab, pakhana, ya neend waghera).

Hum se Khalid bin Makhlad ne bayan kiya, unhon ne kaha hum se Sulaiman ne bayan kiya, unhon ne kaha mujhe Yahya bin Sa’eed ne khabar di, unhein Bushair bin Yasaar ne khabar di, unhon ne kaha mujhe Suwaid bin No’man Radhiallahu Anhu ne batlaaya unhon ne kaha ke hum Khaibar waale saal Rasoolullah Sallallahu Alaihi Wasallam ke hamraah jab Sahba mein pahunche to Rasoolullah Sallallahu Alaihi Wasallam ne hamein Asr ki Namaz padhaayi. Jab Namaz padh chuke to Aap Sallallahu Alaihi Wasallam ne khaane mangwaaye. Magar (khaane mein) sirf sattu hi laaya gaya. So hum ne (usi ko) khaaya aur piya. Phir Rasoolullah Sallallahu Alaihi Wasallam Maghrib ki Namaz ke liye khade ho gaye. To Aap Sallallahu Alaihi Wasallam ne kulli ki, phir hamein Maghrib ki Namaz padhaayi aur (naya) Wuzu nahi kiya.

Hum se Uthman ne bayan kiya, kaha hum se Jareer ne Mansoor ke waaste se naql kiya, woh Mujaahid se woh Ibn-e-Abbas Radhiallahu Anhuma se riwayat karte hain ke Rasoolullah Sallallahu Alaihi Wasallam ek dafa Madinah ya Makke ke ek baagh mein tashreef le gaye. (Wahaan) Aap Sallallahu Alaihi Wasallam ne do shakhson ki aawaaz suni jinhein un ki qabron mein azaab kiya jaa raha tha. Aap Sallallahu Alaihi Wasallam ne farmaaya ke in par azaab ho raha hai aur kisi bahut bade gunaah ki wajah se nahi phir Aap Sallallahu Alaihi Wasallam ne farmaaya baat yeh hai ke ek shakhs in mein se peshaab ke cheenton se bachne ka ihtimaam nahi karta tha aur doosra shakhs chughulkhori kiya karta tha. Phir Aap Sallallahu Alaihi Wasallam ne (khajoor ki) ek daali mangwaayi aur us ko tod kar do tukde kiya aur un mein se (ek ek tukda) har ek ki qabr par rakh diya. Logon ne Aap Sallallahu Alaihi Wasallam se poocha ke ya Rasoolallah! Yeh Aap Sallallahu Alaihi Wasallam ne kiun kiya. Aap Sallallahu Alaihi Wasallam ne farmaaya is liye ke jab tak yeh daaliyaan khushk hon shayad us waqt tak in par azaab kam ho jaaye.

Aur yeh ke Rasoolullah Sallallahu Alaihi Wasallam ne ek qabr waale ke baare mein farmaaya tha ke woh apne peshaab se bachne ki koshish nahi kiya karta tha, Aap Sallallahu Alaihi Wasallam ne aadmi ke peshaab ke alawah kisi aur ke peshaab ka zikr nahi farmaaya.

Hum se Ya’qoob bin Ibrahim ne bayan kiya, unhon ne kaha hum ko Ismail bin Ibrahim ne khabar di, kaha mujhe Rooh bin Al-Qasim ne batlaaya, kaha mujh se Ata bin Abi Maimunah ne bayan kiya, woh Anas bin Malik Radhiallahu Anhu se riwayat karte hain ke Rasoolullah Sallallahu Alaihi Wasallam jab rafa-e-haajat ke liye bahar tashreef le jaate to main Aap Sallallahu Alaihi Wasallam ke paas paani laata. Aap Sallallahu Alaihi Wasallam us se istinja farmaate.

Hum se Muhammed bin Al-Muthanna ne bayan kiya, unhon ne kaha hum se Muhammed bin Khazim ne bayan kiya, unhon ne kaha hum se A’mash ne Mujaahid ke waaste se riwayat kiya, woh Taaus se, woh Abdullah bin Abbas Radhiallahu Anhuma se riwayat karte hain ke (ek martaba) Rasoolullah Sallallahu Alaihi Wasallam do qabron par guzre to Aap Sallallahu Alaihi Wasallam ne farmaaya ke in dono qabr waalon ko azaab diya jaa raha hai aur kisi bade gunaah par nahi. Ek to in mein se peshaab se ehtiyaat nahi karta tha aur doosra chughulkhori kiya karta tha. Phir Aap Sallallahu Alaihi Wasallam ne ek hari tehni le kar beech se us ke do tukde kiye aur har ek qabr par ek tukda gaad diya. Logon ne poocha ke ya Rasoolallah! Aap Sallallahu Alaihi Wasallam ne (aisa) kiun kiya? Aap Sallallahu Alaihi Wasallam ne farmaaya, shayad jab tak yeh tehniyaan khushk na hon in par azaab mein kuch takhfeef rahe. Ibn-ul-Muthanna ne kaha ke is Hadees ko hum se Wakee’ ne bayan kiya, un se A’mash ne, unhon ne Mujaahid se isi tarah suna.