Hum se Abdullah Bin Abi Shaiba ne bayan kiya, kaha ke hum se Abu Usamah ne bayan kiya, un se Hisham Bin Urwah ne, un se Fatima Bint Munzir ne aur un se Asma Bint Abi Bakr (Radi Allahu Anha) ne ke ek martaba Nabi Kareem (Sallallahu Alaihi Wasallam) ke zamana mein badal tha. Hum ne jab iftar kar liya to sooraj nikal aaya. Is par Hisham (rawi hadees) se kaha gaya ke phir unhein is roze ki qaza ka hukm hua tha ? to unhon ne batlaya ke qaza ke siwa aur chara-kar hi kya tha ? aur Mamar ne kaha ke mein ne Hisham se yun suna ”mujhe maloom nahi ke in logon ne qaza ki thi ya nahi.“
.

Aur Umar (Radi Allahu Anhu) ne ek nasha baaz se farmaya tha afsos tujh par, tu ne Ramzan mein bhi sharab pi rakkhi hai halankay hamare bache tak bhi roze se hain, phir aap ne is par hadd qayam ki
.

Hum se Musaddad ne bayan kiya, un se Bishr Bin Mufaddal ne bayan kiya, un se Khalid Bin Zakwan ne bayan kiya, un se Rubayyi Bint Muawwidh (Radi Allahu Anha) ne kaha ke Ashura ki subah Nabi Kareem (Sallallahu Alaihi Wasallam) ne Ansar ke muhallon mein kehla bheja ke subah jis ne kha pi liya ho wo din ka baqi hissa (roza dar ki tarah) poore kare aur jis ne kuch khaya piya na ho wo roze se rahe. Rubayyi ne kaha ke phir baad mein bhi (Ramzan ke roze ki farziyat ke baad) hum is din roza rakhte aur apne bachon se bhi rakhwate thay. Unhein hum oon ka ek khilona de kar behlaye rakhte. Jab koi khane ke liye rota to wahi de dete, yahan tak ke iftar ka waqt aa jata
.

(Abu-al-Aaliyah) Tabaiee se aisa manqool hai unhon ne kaha Allah ne farmaya roza raat tak poora karo (jab raat aayi to roza khul gaya ye Ibn Abi Shaiba ne nikala) kyunke Allah Ta'ala ne (Surah al-Baqarah mein) farmaya ”phir tum roza raat tak poora karo.“ Nabi Kareem (Sallallahu Alaihi Wasallam) ne saum-e-wisal se (Allah Ta'ala ke hukm se) mana farmaya, ummat par rahmat aur shafqat ke khayal se taake un ki taqat qayam rahe, aur ye ke ibadat mein sakhti karna makrooh hai
.

Hum se Musaddad ne bayan kiya, kaha ke mujh se Yahya Qattan ne bayan kiya, un se Shuba ne, kaha ke mujh se Qatada ne bayan kiya aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne farmaya (bila sahar-o-iftar) pay dar pay roze na rakkha karo. Sahaba (Radi Allahu Anhum) ne arz ki ke Aap (Sallallahu Alaihi Wasallam) to wisal karte hain ? Aap (Sallallahu Alaihi Wasallam) ne farmaya ke mein tumhari tarah nahi hoon. Mujhe (Allah Ta'ala ki taraf se) khilaya aur pilaya jata hai ya (Aap Sallallahu Alaihi Wasallam ne ye farmaya ke) mein is tarah raat guzarta hoon ke mujhe khilaya aur pilaya jata rehta hai
.

Hum se Abdullah Bin Yusuf ne bayan kiya, unhon ne kaha hum ko Imam Malik (Rahimahullah) ne khabar di, unhein Nafi ne aur un se Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne saum-e-wisal se mana farmaya. Sahaba (Radi Allahu Anhum) ne arz ki ke aap to wisal karte hain ? Aap (Sallallahu Alaihi Wasallam) ne farmaya ke mein tumhari tarah nahi hoon, mujhe to khilaya aur pilaya jata hai
.

Hum se Abdullah Bin Yusuf ne bayan kiya, un se Laith Bin Saad ne bayan kiya, un se Yazid Bin Had ne bayan kiya, un se Abdullah Bin Khabbab ne aur un se Abu Saeed Khudri (Radi Allahu Anhu) ne, unhon ne Rasul Allah (Sallallahu Alaihi Wasallam) se suna ke Aap (Sallallahu Alaihi Wasallam) ne farmaya musalsal (bila sahari-o-iftari) roze na rakho, han agar koi aisa karna hi chahe to wo sahari ke waqt tak aisa kar sakta hai. Sahaba (Radi Allahu Anhum) ne arz ki ya Rasul Allah! aap to aisa karte hain. Is par Aap (Sallallahu Alaihi Wasallam) ne farmaya mein tumhari tarah nahi hoon. Mein to raat is tarah guzarta hoon ke ek khilane wala mujhe khilata hai aur ek pilane wala mujhe pilata hai
.

Hum se Usman Bin Abi Shaiba aur Muhammad Bin Salam ne bayan kiya, kaha ke hum ko Abda ne khabar di, unhein Hisham Bin Urwah ne, unhein un ke baap ne aur un se Aisha (Radi Allahu Anha) ne kaha ke Rasul Allah (Sallallahu Alaihi Wasallam) ne pay dar pay roze se mana kiya tha. Ummat par rahmat-o-shafqat ke khayal se, sahaba (Radi Allahu Anhum) ne arz ki ke Aap (Sallallahu Alaihi Wasallam) to wisal karte hain ? Aap (Sallallahu Alaihi Wasallam) ne farmaya, mein tumhari tarah nahi hoon mujhe mera Rabb khilata aur pilata hai. Usman ne (apni riwayat mein) ”ummat par rahmat-o-shafqat ke khayal se“ ke alfaz zikr nahi kiye hain
.

Is ko Anas (Radi Allahu Anhu) ne Janab Nabi Kareem (Sallallahu Alaihi Wasallam) se riwayat kiya hai
.

Hum se Abu-al-Yaman ne bayan kiya, kaha ke hum ko Shuaib ne khabar di un se Zuhri ne bayan kiya ke mujh se Abu Salma Bin Abdur Rahman ne bayan kiya, un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne musalsal (kai din tak sahari-o-iftari ke baghair) roza rakhne se mana farmaya tha. Is par ek aadmi ne musalmanon mein se arz ki, ya Rasul Allah (Sallallahu Alaihi Wasallam) aap to wisal karte hain ? Aap (Sallallahu Alaihi Wasallam) ne farmaya meri tarah tum mein se kaun hai ? Mujhe to raat mein mera Rabb khilata hai, aur wahi mujhe serab karta hai. Log is par bhi jab saum-e-wisal rakhne se na ruke to Aap (Sallallahu Alaihi Wasallam) ne un ke sath do din tak wisal kiya. Phir eid ka chand nikal aaya to Aap (Sallallahu Alaihi Wasallam) ne farmaya ke agar chand na dikhayi deta to mein aur kai din wisal karta, goya jab saum-o-wisal se wo log na ruke to Aap ne un ko saza dene ke liye ye kaha
.