Hum se Abu Asim ne bayan kiya, un se Ibn Juraij ne, un se Abdul Hameed Bin Jubair ne aur un se Muhammad Bin Abbad ne ke mein ne Jabir (Radi Allahu Anhu) se poocha kya Nabi Kareem (Sallallahu Alaihi Wasallam) ne Juma ke din roza rakhne se mana farmaya hai ? Unhon ne jawab kiya ke han! Abu Asim ke alawa rawiyon ne ye izafa kiya hai ke khali (ek Juma hi ke din) roza rakhne se Aap (Sallallahu Alaihi Wasallam) ne mana farmaya
.

Hum se Umar Bin Hafs Bin Ghiyas ne bayan kiya, kaha mujh se mere baap ne bayan kiya, un se Amash ne bayan kiya, un se Abu Salih ne bayan kiya aur un se Abu Hurairah (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) se suna, Aap (Sallallahu Alaihi Wasallam) ne farmaya ke koi bhi shakhs Juma ke din is waqt tak roza na rakhe jab tak is se ek din pehle ya is ke ek din baad roza na rakhta ho
.

Hum se Musaddad ne bayan kiya, kaha ke hum se Yahya ne bayan kiya, un se Shuba ne, (doosri sanad) aur Imam Bukhari (Rahimahullah) ne kaha ke mujh se Muhammad ne bayan kiya, kaha ke hum se Ghundar ne bayan kiya, kaha ke hum se Shuba ne bayan kiya, un se Qatada ne, un se Abu Ayyub ne aur un se Juwayriyah Bint Harith (Radi Allahu Anha) ne ke Nabi Kareem (Sallallahu Alaihi Wasallam) un ke yahan Juma ke din tashreef le gaye, (ittefaq se) wo roze se theen. Nabi Kareem (Sallallahu Alaihi Wasallam) ne is par daryaft farmaya ke kal ke din bhi tu ne roza rakkha tha ? Unhon ne jawab diya ke nahi. Phir Aap (Sallallahu Alaihi Wasallam) ne daryaft farmaya kya aayinda kal roza rakhne ka irada hai ? Jawab diya ke nahi. Aap (Sallallahu Alaihi Wasallam) ne farmaya ke phir roza tod do. Hammad Bin Jadh ne bayan kiya ke unhon ne Qatada se suna, un se Abu Ayyub ne bayan kiya aur un se Juwayriyah (Radi Allahu Anha) ne bayan kiya ke Nabi Kareem (Sallallahu Alaihi Wasallam) ne hukm diya aur unhon ne roza tod diya
.

Hum se Musaddad ne bayan kiya, kaha ke hum se Yahya ne bayan kiya, un se Sufyan ne, un se Mansoor ne, un se Ibrahim ne, un se Alqama ne, unhon ne Aisha (Radi Allahu Anha) se poocha ke kya Rasul Allah (Sallallahu Alaihi Wasallam) ne (roza waghera ibadat ke liye) kuch din khas taur par muqarrar kar rakkhe thay ? Unhon ne kaha nahi. Balkay aap ke har amal mein hameshi-gi hoti thi aur doosra kaun hai jo Rasul Allah (Sallallahu Alaihi Wasallam) jitni taqat rakhta ho ?
.

Hum se Musaddad ne bayan kiya, kaha ke hum se Yahya ne bayan kiya, un se Imam Malik (Rahimahullah) ne bayan kiya ke mujh se Salim ne bayan kiya, kaha ke mujh se Umm-e-Fazl (Radi Allahu Anha) ke maula Umair ne bayan kiya aur un se Umm-e-Fazl (Radi Allahu Anha) ne bayan kiya. (doosri sanad) Imam Bukhari (Rahimahullah) ne kaha aur hum se Abdullah Bin Yusuf ne bayan kiya, unhein Imam Malik (Rahimahullah) ne khabar di, unhein Umar Bin Abdullah ke ghulam Abu-al-Nadr ne, unhein Abdullah Bin Abbas (Radi Allahu Anhuma) ke ghulam Umair ne aur unhein Umm-e-Fazl Bint Harith (Radi Allahu Anha) ne ke un ke yahan kuch log Arafat ke din Nabi Kareem (Sallallahu Alaihi Wasallam) ke roze ke baare mein jhagarr rahe thay. Baaz ne kaha ke Aap (Sallallahu Alaihi Wasallam) roze se hain. Aur baaz ne kaha ke roze se nahi hain. Is par Umm-e-Fazl (Radi Allahu Anha) ne aap ki khidmat mein doodh ka ek piyala bheja (taake haqeeqat zahir ho jaye) aap apne ont par sawar thay, aap ne doodh pi liya
.

Hum se Yahya Bin Suleiman ne bayan kiya, kaha ke hum se Ibn Wahb ne bayan kiya, (ya un ke samne hadees ki qira'at ki gayi). Kaha ke mujh ko Amr ne khabar di, unhein Bukair ne, unhein Kuraib ne aur unhein Maimuna (Radi Allahu Anha) ne ke Arafa ke din kuch logon ko Nabi Kareem (Sallallahu Alaihi Wasallam) ke roze ke mutaliq shakk hua. Is liye unhon ne aap ki khidmat mein doodh bheja. Aap is waqt Arafat mein wuquf farma thay. Aap ne doodh pi liya aur sab log dekh rahe thay
.

Hum se Abdullah Bin Yusuf ne bayan kiya, unhon ne kaha ke hum ko Imam Malik (Rahimahullah) ne khabar di, unhein Ibn Shihab ne, unhon ne kaha ke hum se Ibn Azhar ke ghulam Abu Ubaid ne bayan kiya ke Eid ke din mein Umar Bin Khattab (Radi Allahu Anhu) ke khidmat mein hazir tha. Aap ne farmaya ye do din aise hain jin ke rozon ki Nabi Kareem (Sallallahu Alaihi Wasallam) ne maman'at farmayi hai. (Ramzan ke) rozon ke baad iftar ka din (Eid-ul-Fitr) aur doosra wo din jis mein tum apni qurbani ka gosht khate ho (yaani Eid-ul-Adha ka din). Imam Bukhari (Rahimahullah) ne kaha Sufyan Bin Uyainah ne kaha, jis ne Abu Ubaid ko Ibn Azhar ka ghulam kaha is ne bhi theek kaha, aur jis ne Abdur Rahman Bin Auf (Radi Allahu Anhu) ka ghulam kaha is ne bhi theek kaha. (Is ki wajah ye hai ke Ibn Azhar aur Abdur Rahman Bin Auf Radi Allahu Anhu donon is ghulam mein shareek thay)
.

Hum se Musa Bin Ismail ne bayan kiya, un se Wuhaib ne bayan kiya, kaha ke hum se Amr Bin Yahya ne bayan kiya, un se un ke walid ne aur un se Abu Saeed Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne Eid-ul-Fitr aur qurbani ke dinon ke rozon ki maman'at ki thi aur ek kapra saare badan par lapait lene se aur ek kapre mein got maar kar baithne se
.

Aur subah aur asr ke baad namaz parhne se (mana farmaya)
.

Hum se Ibrahim Bin Musa ne bayan kiya, kaha ke hum ko Hisham ne khabar di, un se Ibn Juraij ne bayan kiya ke mujhe Amr Bin Dinar ne khabar di, unhon ne Ata Bin Mina se suna, wo Abu Hurairah (Radi Allahu Anhu) se ye hadees naqal karte thay ke aap ne farmaya, Nabi Kareem (Sallallahu Alaihi Wasallam) ne do roze aur do qism ki khareed-o-farokht se mana farmaya hai. Eid-ul-Fitr aur Eid-ul-Adha ke roze se. Aur mulamasat aur munabazat ke sath khareed-o-farokht karne se
.